ប្រជាពលរដ្ឋរងគ្រោះដោយខ្យល់កន្ត្រាក់ ក្នុងស្រុកបន្ទាយស្រី និងស្រុកស្វាយលើ បានទទួលអំណោយពីសាខាកាកបាទក្រហមកម្ពុជាខេត្តសៀមរាប!

ខេត្តសៀមរាប ÷ កាលពីរសៀលថ្ងៃទី៥ ខែមេសា ឆ្នាំ២០២៣ នេះ ឯកឧត្ដម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំក្រុមការងារចុះសួរសុខទុក្ខ និងនាំយកអំណោយមនុស្សធម៌ចែកជូនដល់ប្រជាពលរដ្ឋរងគ្រោះដោយសារខ្យល់កន្ត្រាក់កាលពីពេលថ្មីៗកន្លងទៅ នៅស្រុកចំនួន២ ក្នុងនោះស្រុកបន្ទាយស្រី ចំនួន៤៣គ្រួសារ បណ្ដាលឲ្យ រលំ២១ខ្នង របើកដំបូល២២ខ្នង និងស្រុកស្វាយលើ ចំនួន ១៨ គ្រួសារ បណ្ដាលឲ្យ រលំ២ខ្នង និងរបើកដំបូល ១៦ខ្នង។

មានប្រសាសន៍នាឱកាសនោះ ឯកឧត្ដម គុជ លីណា បាននាំយកនូវការផ្ដាំផ្ញើសួរសុខទុក្ខ ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌ សម្បុរ ជំនឿសាសនា ឬនិន្នាការនយោបាយណាមួយឡើយ។ ចំពោះការខូចខាតផ្ទះសំបែង ទ្រព្យសម្បត្តិ សោយសារគ្រោះមហន្តរាយដោយធម្មជាតិនេះ លោកក៏បានសំដែងនូវការសោកស្ដាយជាពន់ពេក ក៏ព្រោះតែហេតុការណ៍នេះគឺគ្មាននរណាម្នាក់ចង់ជួបប្រទះឡើយ។

ឯកឧត្ដម គុជ លីណា មានប្រសាសន៍ទៀតថា ចំពោះអំណោយមនុស្សធម៌ដែលបាននាំយកមកចែកជូនបងប្អូននាពេលនេះ ក៏នឹងអាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។

សូមជម្រាបថា អំណោយមនុស្សធម៌ដែលបានផ្ដល់ ជូននាពេលនេះ៖

-សម្រាប់គ្រួសាររលំផ្ទះក្នុងមួយគ្រួសារទទួលបាន៖ អង្ករ៣០គីឡូក្រាម ស័ង្កសី១៦ សន្លឹក មុង១ ភួយ១ សារុង១ ក្រមា១ កន្ទេល១ អាវយឺត១ មី១កេស ទឹកត្រី១យួរ ត្រីខ១យួរ និងថវិកា ១សែន ៥ម៉ឺនរៀល។

-ចំពោះគ្រួសាររបើកដំបូលក្នុងមួយគ្រួសារទទួលបាន៖ អង្ករ៣០គីឡូក្រាម ស័ង្កសី១០សន្លឹក មុង១ ភួយ១ សារុង១ ក្រមា១ កន្ទេល១ អាវយឺត១ មី១កេស ទឹកត្រី១យួរ ត្រីខ១យួរ និងថវិកា ១សែនរៀលផងដែរ៕

ដោយ ÷ ពន្លឺ