ក្រុមការងារបក្សខេត្តសៀមរាប ចុះជួបសំណេះ សំណាលនិងសួរសុខទុក្ខប្រជាពលរដ្ឋដែលផ្លាស់ទីលំនៅ ពីសង្កាត់ស្លក្រាមទៅនៅភូមិធម្មជាតិរុនតាឯក

ខេត្តសៀមរាប ÷ កាលពីថ្ងៃទី០១ ខែមេសាឆ្នាំ២០២៣ នេះ លោក សឹង្ហ សំរឹទ្ធ អនុប្រធានក្រុមការងារបក្សប្រជាជនខេត្តសៀមរាប ចុះមូលដ្ឋានសង្កាត់ស្លក្រាម ព្រមទាំងអស់លោកលោកស្រី ក្រុមការងារចុះជួយសង្កាត់ស្លក្រាម ក្រុងសៀមរាប បានអញ្ជើញជួបសំណេះសំណាលជាមួយបងប្អូនប្រជាពលរដ្ឋ ដែលជាសមាជិក សមាជិកា របស់គណបក្សប្រជាជនកម្ពុជាដែលស្ថិតនៅក្នុងភូមិទ្រាំង និងភូមិមណ្ឌល៣ ដែលបានស្ម័គ្រចិត្តរុះរើលំនៅឋានចេញពីតំបន់ឧទ្យានអង្គរ មករស់នៅក្នុងភូមិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ។

លោក សឹង្ហ សំរឹទ្ធ បានមានប្រសាសន៍លើកឡើងថា៖ រយៈពេល៤៤ឆ្នាំកន្លងទៅនេះ បន្ទាប់ពីបានផ្ដួលរំលំរបបប្រល័យពូជសាសន៍ ប៉ុល ពត នៅថ្ងៃទី ០៧ ខែមករា ឆ្នាំ១៩៧៩ ឈរលើមូលដ្ឋាននេះបានបង្ហាញច្បាស់អំពីការផ្លាស់ប្តូរជាប្រវត្តិសាស្ត្រដ៏ធំធេងនៃកម្ពុជា ក្នុងដំណើរឈានទៅមុខឥតឈប់ឈរលើមាគ៌ាសន្តិភាព ប្រជាធិបតេយ្យ និងអភិវឌ្ឍន៍ ដែលកើតចេញពីការដឹកនាំដ៏ត្រឹមត្រូវរបស់គណបក្សប្រជាជនកម្ពុជា, ដោយការចូលរួមយ៉ាងផុសផុលរបស់ប្រជាជនគ្រប់មជ្ឈដ្ឋាន គ្រប់ជនជាតិ គ្រប់ជំនឿសាសនា ដោយទឹកចិត្ដស្នេហាជាតិដ៏ជ្រាលជ្រៅ, ពីការខិតខំរបស់គ្រប់ក្រសួង ស្ថាប័នរដ្ឋ និងអាជ្ញាធរគ្រប់លំដាប់ថ្នាក់, ពីការចូលរួមនៃវិស័យឯកជន សង្គមស៊ីវិល និងមជ្ឈដ្ឋានផ្សេងៗទៀត ព្រមទាំងការគាំទ្រ និងជួយឧបត្ថម្ភដ៏ស្មោះសរពីសំណាក់បណ្តាប្រទេសជាមិត្តជិតឆ្ងាយ និងសហគមន៍អន្តរជាតិ។ លោក សឹង្ហ សំរឹទ្ធបន្តថា ដើម្បីគាំទ្រដល់ការអនុវត្តន៍ នូវគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយភាពវៃឆ្លាត របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា យើងទាំងអស់គ្នាត្រូវបន្តគាំទ្របេក្ខភាពសម្តេចតេជោ ហ៊ុន សែន ជានាយករដ្ឋមន្ត្រីអាណត្តិនេះ នឹងអាណត្តិក្រោយៗទៀត ។ និងបន្តគាំទ្រឯកឧត្តម បណ្ឌិតហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេន ផងដែរ ។ ក្នុងនោះដែរ លោក សឹង្ហ សំរឹទ្ធ ក៏បានមានប្រសាសន៍ណែនាំដល់សមាជិក សមាជិកា គណបក្ស ប្រជាជនកម្ពុជាគ្រប់មូលដ្ឋានត្រូវ ពង្រឹងរចនាសម្ព័ន្ធរបស់ខ្លួននិង កសាងសមាជិក សមាជិការធនធានមនុស្ស របស់គណបក្ស ជាពិសេសចលនាយុវជនបន្តវេនប្រកបសីលធម៌ ចរិយាធម៌ និងមានសក្តានុពល ថែមទាំងកៀរគរឲ្យមានការចូលរួមពីសប្បុរសជនគ្រប់ស្រទាប់វណ្ណៈផងដែរ។

លោក សឹង្ហ សំរឹទ្ធ អនុប្រធានក្រុមការងារបក្សប្រជាជនខេត្តសៀមរាបបានមានប្រសាសន៍ដល់ក្រុមការងារទាំងអស់ត្រូវពង្រឹងសមាជិកបក្សតាមក្រុម ពិនិត្យសមាជិកតាមក្រុម ពិនិត្យ និងស្រាវជ្រាវសមាជិកជួបការខ្វះខាតស្បៀង ត្រូវរាយការណ៍ជូនក្រុមការងារ ដោយរក្សាចាស់ កសាងថ្មី ត្រូវដោះស្រាយបញ្ហាប្រឈមមាននៅក្នុងភូមិក្នុងឃុំ បង្កើនការកសាងសមាជិកថ្មី បន្ថែមទៀតត្រូវតែចុះសួរសុខទុក្ខសមាជិកសមាជិកាតាមខ្នងផ្ទះ។ លោកក៏បានណែនាំអំពីតួនាទីភារកិច្ច ដល់មេក្រុមបក្សដែលបានចូលរួមក្នុងពិធីនេះ ដោយត្រូវអនុវត្តតាមតួនាទីភារកិច្ចរបស់ខ្លួន ក្នុងការគ្រប់គ្រងសមាជិកបក្ស ទាំងបរិមាណ និងគុណភាព។ ត្រូវមានឯកសារគ្រប់គ្រាន់ និងជាពិសេសប្រធានក្រុមបក្សនីមួយៗ ត្រូវមានភារកិច្ចដឹកនាំសមាជិករបស់ខ្លួនបានទៅបោះឆ្នោតជូនគណបក្សប្រជាជនកម្ពុជនឲ្យបានគ្រប់ៗគ្នា ដោយអនុវត្តពាក្យស្លោក(សមាជិកម្នាក់ សន្លឹកឆ្នោតមួយសន្លឹក) ដើម្បីបន្តដណ្ដើមយកជ័យជម្នះជាថ្មីទៀតក្នុងការបោះឆ្នោតជ្រើសតាំងតំណាងរាស្រ្ត ដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ នៅពេលខាងមុខនេះផងដែរ៕

ដោយ ÷ ពន្លឺ