មន្ទីរសុរិយោដីខេត្តនិងរដ្ឋបាលស្រុកសូទ្រនិគមចាប់ផ្តើមប្រកាសបិទផ្សាយជាសាធារណៈនូវឯកសារវិនិច្ឆ័យ ការចុះបញ្ជីដីធ្លីមានលក្ខណៈជាប្រព័ន្ធ នៅឃុំខ្ចាស់

ខេត្តសៀមរាប ÷ នៅព្រឹកថ្ងៃទី២៩ ខែមីនា ឆ្នាំ២០២៣ នេះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយ រដ្ឋបាលស្រុកសូទ្រនិគម បានធ្វើការបិទផ្សាយជាសាធារណៈ នូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា នៅក្នុងវត្តខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប សរុបចំនួន ៧.៩៨៦ ក្បាលដី សម្រាប់ភូមិចំនួន៧ក្នុង ឃុំខ្ចាស់ រួមមាន ភូមិថ្លាត ភូមិថ្មី ក្បូន គោកសង្កែ ជ្រៃ យាងទេស និងភូមិខ្ចាស់។ ពិធីបិទផ្សាយនេះ បានប្រព្រឹត្តទៅក្រោមអធិបតីភាព លោក គិម វណ្ណៈ អភិបាល នៃគណៈអភិបាលស្រុកសូទ្រនិគម , លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប និង មានការចូលរួមពីសំណាក់លោក លោកស្រី មន្រ្តីអនុវត្តកម្មវិធីអនុវិស័យរដ្ឋបាលដីធ្លី ព្រមទាំង លោកមេឃុំ លោកមេភូមិ និងប្រជាពលរដ្ឋម្ចាស់ក្បាលដីក្នុងភូមិទាំង៧ ផងដែរ។

ការបិទប្រកាសនេះមានរយៈពេល១៥ថ្ងៃគឺចាប់ពីថ្ងៃទី២៩ ខែមីនា រហូតដល់ថ្ងៃទី១២ ខែមេសា ឆ្នាំ ២០២៣ ដោយគិតរួមទាំងថ្ងៃបុណ្យ និងថ្ងៃឈប់ សម្រាក ។ លោក ផាត់ ដា មេឃុំខ្ចាស់ បានសំណូម ពរដល់មន្ទីរស្ថាប័នពាក់ព័ន្ឋ ជាពិសេសបងប្អូនប្រជាពលរដ្ឋដែលជាម្ចាស់ក្បាលដី សូមចូលរួមពិនិត្យផ្ទៀងផ្ទាត់ឱ្យបានគ្រប់គ្នា ព្រោះនេះជាលើកចុងក្រោយដែលម្ចាស់ក្បាលដីត្រូវតែពិនិត្យផ្ទៀងផ្ទាត់កុំបីខាន បើអាក់ ខានឬយឺតយ៉ាវវានាំឱ្យបាត់បង់ផលប្រយោជន៍របស់ បងប្អូន។

លោក ប៊ូ ជុំសម្បត្តិ អនុប្រធានមន្ទីររៀបចំដែនដី     នគរូបនីយកម្ម សំណង់ និងសុរិយោដីខេត្ត មានប្រសាសន៍ថា៖ ក្រោយពីបញ្ចប់ការបិទផ្សាយជាសាធារណៈ នូវឯកសារនៃការវិនិច្ឆ័យនេះទៅ គណៈ កម្មការរដ្ឋបាល និងលើកសំណើជូនទៅ ឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ដែលជាម្ចាស់ដី និង អ្នកកាន់កាប់ដីរូបណា ដែលបានបំពេញ លក្ខខណ្ឌគ្រប់គ្រាន់តាមនីតិវិធីច្បាប់ និងជាក្បាលដីមិនមានទំនាស់។ អាស្រ័យហេតុនេះ សូមបងប្អូនលោកយាយលោកតាអ៊ុំពូមីង ជាម្ចាស់ដីនិងអ្នកកាន់កាប់ដីព្រមទាំងស្ថាប័ននិងអង្គភាពពាក់ព័ន្ឋទាំងអស់មកពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា ជាពិសេសផ្ទៀងផ្ទាត់នៅលើឈ្មោះម្ចាស់ដី សាវតា ទំហំដី ប្រភេទទ្រព្យ និងត្រូវពិនិត្យផងដែរនៅលើប្លង់សុរិយោដីនូវទីតាំងដីនិងរូបរាងដី ព្រោះនេះជាឱកាសចុងក្រោយដែលបងប្អូននិងអ្នកពាក់ព័ន្ឋទាំងអស់មានសិទ្ឋិធ្វើការកែតម្រូវឬជំទាស់តវ៉ាក្នុងករណីដែលពិនិត្យទៅឃើញថាមានកំហុសឆ្គង ជូនមកគណៈកម្មការរដ្ឋបាលពិនិត្យនិងកែតម្រូវជូន ទាំងនេះមានសារៈ សំខាន់ណាស់ដើម្បីធានាបានភាពសុក្រឹត្យត្រឹមត្រូវក្នុងការចេញវិញ្ញាបនបត្រសម្គាល់ម្ចាស់អចលនវត្ថុ។

លោក គិម វណ្ណៈ អភិបាលស្រុកសូទ្រនិគម មានប្រសាសន៍ថា៖ស្រុកនេះបានបិទផ្សាយជាសាធារណៈនូវឯកសារនៃការវិនិច្ឆ័យនិងចែកប័ណ្ណបានចំនួន ៨.៤១៣ប័ណ្ណនៅឃុំដំដែកនិងកំពុងដំណើរការប្រមូលទិន្នន័យនៅឃុំខ្ចាស់និងឃុំចាន់ស។ លោក បញ្ជាក់ថា៖ការចុះបញ្ជីដីធ្លីមានលក្ខណៈជាប្រព័ន្ឋ ពិតជាអនុវត្តទៅតាមនីតិវិធីនិងបច្ចេកវិទ្យាទំនើប មានតម្លាភាពនិងការទទួលខុសត្រូវដែលប្រទេសជៀន លឿននៅក្នុងពិភពលោកកំពុងអនុវត្តហើយមានប្រសិទ្ឋភាពខ្ពស់ក្នុងការគ្រប់គ្រងដីធ្លី។ នេះជាប្រការ សមស្របបំផុតដែលបានកំណត់នៅក្នុងគោលនយោ បាយដីធ្លីរបស់រាជរដ្ឋាភិបាលដើម្បីកាត់បន្ថយភាពក្រីក្រនិងទំនាស់ដីធ្លីក្នុងសង្គមជាតិយើង។ លោក អភិបាលស្រុកបន្ថែមថា៖ ជាលទ្ធផល រដ្ឋ និងប្រជាពលរដ្ឋជាម្ចាស់ដី ឬនិងអ្នកកាន់កាប់ដី ទទួលបាននូវសារៈប្រយោជន៍ ដូចជា ៖ រដ្ឋគ្រប់គ្រងបានដីធ្លី ទាំងដីរដ្ឋ និងដីឯកជន ដែលធ្វើអោយរដ្ឋមានការងាយស្រួលក្នុងការងាររៀបចំ ដែនដីរដ្ឋបាលដីធ្លី ការបែង ចែកដី ការលើកស្ទួយកំរិតជីវភាពរស់នៅរបស់ប្រជាពលរដ្ឋ និងការកាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ និងអាចធ្វើការបង្កបង្កើនផល ឬប្រកបមុខរបរផ្សេងៗទៀត លើដីធ្លីរបស់ខ្លួនដោយគ្មានការព្រួយបារម្ភ និងអាចប្រើប្រាស់វិញ្ញាបនបត្រសម្គាល់ម្ចាស់អចលនវត្ថុ ដើម្បីផលប្រយោជន៍ផ្សេងៗក្នុងការប្រកបមុខរបរឬអាជីវកម្មរបស់ខ្លួនជាដើម៕

ដោយ ÷ ពន្លឺ