ខេត្តសៀមរាប÷ ក្រុមប្រជាពលរដ្ឋមានទីលំនៅក្បែរសណ្ឋាគារអង្គរអេរ៉ា ដែលមានទីតាំងនៅក្នុងភូមិខ្នា សង្កាត់ជ្រាវ ក្រុង-ខេត្តសៀមរាប បានឲ្យដឹងថា សណ្ឋាគារមួយនេះ បានក្លាយទៅឃ្លាំងស្តុកឈើប្រណិតទៅហើយ ដែលពុំមានសមត្ថកិច្ចជំនាញណាមួយហ៊ានប៉ះពាល់និងដើម្បីបង្រ្កាបឡើយ ។
តាមប្រភពព័ត៌មានបានអោយដឹងថា ស្ទើរតែរៀងរាល់ពេលថ្ងៃនិងពេលយប់គេឃើញមានឡានតូចៗប្រភេទភីកអាប់ ពាក់ស្លាកលេខ ខ.ម ដឹកឈើចូលតាមទ្វារខាងក្រោយរបស់សណ្ឋាគារនេះ។ សេចក្ដីរាយការណ៍ថា ម្ចាស់សណ្ឋាគារមួយនេះ ឈ្មោះ ស៊ីណា ជាមន្រ្តីអធិការកិច្ចយោធាភូមិភាគ៤។
យ៉ាងណាក៍ដោយកាលពីថ្ងៃទី០៩ ខែ វិច្ឆិកា គេហទំព័រសារព័ត៌មាន រស្មីក្រុងយើង (www.rksynews.com) មិនទាន់អាចស្វែងរកការបំភ្លឺពីម្ចាស់សណ្ឋាគារខាងលើបាន ដើម្បីបញ្ជាក់ពីករណីនេះ នៅឡើយទេ ដោយសារតែគ្មានលខទូរស័ព្ទ រីឯអ្នកចាត់ការទូទៅក៏មុនមានដែល។
បញ្ហានេះប្រជាពលរដ្នបានសំណូមពរអោយថ្នាក់លើ ពិនិត្យនិងស្រាវជ្រាវមើលឃ្លាំងស្តុកឈើប្រណិតក្នុងសណ្ឋាគារមួយនេះផង៕
ដោយ ៖ ប៊ុនថន
