ប្រជាពលរដ្ឋមានជីវភាពលំបាកជាង២៥០គ្រួសារ ទទួលបានការឧបត្ថម្ភពីមេបញ្ជាការអង្គរក្ស

ខេត្តសៀមរាប ÷ ប្រជាពលរដ្ឋមានជីវភាពលំបាកជាង២៥០គ្រួសារ ទទួលបានការឧបត្ថម្ភពីមេបញ្ជាការអង្គរក្ស ប្រជាពលរដ្ឋនិងលោកយាយលោកតាដែលមានជីវភាពខ្វះខាត ដែលរស់នៅក្នុងឃុំរុនតាឯក និងឃុំព្រះដាក ស្រុកបន្ទាយស្រីខេត្តសៀមរាប ចំនួន ២៥២គ្រួសារ បានទទួលអំណោយសប្បុរសធម៌ របស់ ឯកឧត្តម នាយឧត្តមសេនីយ៍ផ្កាយមាស៤ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការ រង ខ.ភ.ម និងជាមេបញ្ជាការដ្ឋានអង្គរក្ស សម្តេច តេជោ ហ៊ុន សែន នាយករដ្ឋមន្ត្រី នាថ្ងៃទី២៦ ខែ មីនាឆ្នាំ២០២៣ ។

ប្រជាពលរដ្ឋទាំង២៥២គ្រួសារក្នុងមួយគ្រួសារទទួលបានអង្ករ២០គីឡូ សារ៉ុងឬក្រម៉ា១ ថវិកា៣០.០០០រៀល ផ្តល់តាមរយៈឯកឧត្តម ឧត្តមសេនីយឯក គង់ ប៊ុនលី មេបញ្ជាការរងអង្គរក្សតំណាងដ៏ខ្ពង់ខ្ពស់ ឯកឧត្តមនាយឧត្តមសេនីយ៍ផ្កាយមាស៤ កិត្តិបណ្ឌិត ហ៊ីង ប៊ុនហៀង ហើយការផ្តល់ ជូនសម្ភារទាំងនេះ បានធ្វើឡើងក្នុងបរិវេណនៅទីបញ្ជាការដ្ឋានអង្គរក្សស្ថិតនៅក្នុង ស្រុកបន្ទាយស្រីខេត្តសៀមរាប និងមានការអញ្ជើញចូលរួមពីសំណាក់លោកប្រធានក្រុមប្រឹក្សាស្រុក លោកស្រីអភិបាលរងស្រុក លោកមេឃុំ ព្រមទាំងសប្បុរសជនជាច្រើននាក់ផងដែរ។

មានប្រសាសន៍សំណេះសំណាលនាពេលនោះដែរ ឯកឧត្តម ឧត្តមសេនីយឯក គង់ ប៊ុនលី បាននាំយកប្រសាសន៍សាកសួរសុខទុក្ខ  របស់ឯកឧត្តម  ហ៊ីង ប៊ុនហៀង ជូនចំពោះប្រជាពលរដ្ឋនៅទីនេះ និងសូមឱ្យបងប្អូនខិតខំដាំដំណាំ បង្កបង្កើនផលចិញ្ចឹមសត្វដើម្បីបង្កើតប្រាក់ចំណូលសេដ្ឋកិច្ចគ្រួសារនិងរួមគ្នាថែរក្សាភាពសុខសានរបស់យើងទាំងអស់គ្នា។

ឯកឧត្តម គង់ ប៊ុនលី មានប្រសាសន៍ថា ៖ កម្ពុជាធ្លាប់ជួបនូវវិបត្តសង្គ្រាមផ្ទៃក្នុងរ៉ាំរ៉ៃអស់ជាច្រើន     ទសវត្សមកហើយ តែពេលនេះយើងមានសុខសន្តិភាពពេញលេញដែលទទួលបានមកដោយការលំបាក និងការលះបង់ខ្ពស់ របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី ជាស្ថាបនិកនិងជាមគ្គុទេសក៍ក្នុងការស្វែងរកសន្តិភាពតាមរយៈ នយោ បាយឈ្នះឈ្នះ បាននាំមកនូវការផ្សះផ្សានិងបង្រួបបង្រួបជាតិ ក្រោមឆ័ត្រសន្តិភាពតែមួយ ។

ឯកឧត្តម បន្ថែមថា៖ដោយសារស្ថេរភាពនៃសន្តិភាពនេះហើយ ទើបនាំមកនូវការអភិវឌ្ឍ លើគ្រប់វិស័យ ជូនប្រជាជនទូទាំងប្រទេស និងបានបង្កលក្ខណៈឱ្យពលរដ្ឋគ្រប់រូបមានសិទ្ធិសេរីភាព ក្នុងការប្រកបរបរចិញ្ចឹមជីវភាពដោយភាពសុខសាន្ត រស់នៅប្រកប ដោយភាពថ្លៃថ្នូរ ហេតុនេះ យើងទាំងអស់គ្នាត្រូវចូលរួមថែរក្សាសន្តិភាព និងដឹងគុណសន្តិភាព ពីព្រោះសន្តិភាពមានតម្លៃមិនអាចកាត់ថ្លៃបាន សម្រាប់មនុស្សជាតិលើពិភពលោក ។

ឯកឧត្តម ឧត្តមសេនីយឯក គង់ ប៊ុនលី ក៏បានអំពាវនាវបានដល់បងប្អូនប្រជាពលរដ្ឋដែលគ្រប់អាយុនិងមានឈ្មោះក្នុងបញ្ជីបោះឆ្នោត នៅថ្ងៃទី២៣ខែកក្កដាឆ្នាំ២០២៣ខាងមុខនេះ ជាថ្ងៃបោះឆ្នោតជ្រើសរើសសមាជិកសភាតំណាងរាស្ត្រអាណត្តិទី៧ ហេតុនេះសូមបងប្អូនបោះឆ្នោតទៅតាមឆន្ទៈដើម្បីជ្រើសរើសថ្នាក់ដឹកនាំប្រទេសដែលមានឧត្តមគតិស្រឡាញ់ជាតិ គិតប្រយោជន៍ជាតិជាធំ ដើម្បីបន្តការដឹកនាំអភិវឌ្ឍប្រទេសជាតិឱ្យកាន់តែរីកលូតលាស់ស្មើមុខស្មើមាត់ទៅនឹងប្រទេសជឿនលឿននានាក្នុងសកលលោកផងដែរ៕

ដោយ ÷ ពន្លឺ