សាកលវិទ្យាល័យអង្គរខេត្តសៀមរាបប្រារព្ធកម្មវិធីសង្រ្កាន្តមហាវិទ្យាល័យដើម្បីអបអរពិធីបុណ្យចូលឆ្នាំខ្មែរ ក្រោមប្រធានបទ ”ការដាស់ព្រលឹងអង្គរ”

ខេត្តសៀមរាប ÷ សាកលវិទ្យាល័យអង្គរខេត្តសៀមរាបបានប្រារព្ធកម្មវិធីសង្រ្កាន្តមហាវិទ្យាល័យដើម្បីអបអរពិធីបុណ្យចូលឆ្នាំខ្មែរ ក្រោមប្រធានបទ “ការដាស់ព្រលឹងអង្គរ” ដែលរយៈពេល ៣ថ្ងៃ ពីថ្ងៃទី២៣ ដល់ ២៥ ខែមីនា ឆ្នាំ២០២៣ ដោយមានកម្មវិធីកម្សាន្តជាច្រើនដូចជា ល្បែងប្រជាប្រិយខ្មែរ រាំម៉ាឌីហ្សុន ពូនភ្នំខ្សាច់ លើកទង់ ស្តាប់ព្រះធម៌ទេសនា សម្តែងសិល្បៈបរទេស ស្រង់ព្រះ ព្រមទាំងមានស្តង់លក់អារហារ និងផលិតផល ជាពិសេស កម្មវិធីប្រឡងចម្រៀង ៤ គុណ ៤ សំណាង និងប្រដាល់គុនខ្មែរហើយព្រមទាំងមាន មានយុវជន យុវនារី សិស្ស និស្សិតប្រមាណជិត៥០០នាក់ បានមក ជួបជុំគ្នា ដើម្បីដង្ហែរក្បួនសង្ក្រាន្ដសាកលវិទ្យាល័យ ដើម្បីបំផុសគំនិតដល់ប្រជាពលរដ្ឋឱ្យនឹករំលឹកដល់វប្បធម៌អរិយធម៌ខ្មែរ និងដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ក្រោមប្រធានបទ “ការដាស់ព្រលឹងអង្គរ”ផងដែរ ។

លោក ញ៉ិល រដ្ឋា សាកលវិទ្យាធិការ បានបង្ហាញថា៖ឆ្នាំនេះ បានជាយក ការដាស់ព្រលឹងអង្គរ ជាប្រធាន បទ ក៏ព្រោះថា៖ដួងព្រលឹងត្រូវបានចាត់ទុកជា ផ្នែកខាងវិញ្ញាណ ឬភាពអរូបិយនៃមនុស្ស ឬសត្វ ហើយវាមានភាពជាអមតៈ។ បុព្វបុរសខ្មែរបានបង្ហាញភាពខ្លាំងរបស់ខ្លួនរាប់ពាន់ឆ្នាំ ហើយត្រូវបានបង្ហាញតាមរយៈការបន្សល់វប្បធម៌យ៉ាងសម្បូរបែប ជាពិសេសប្រាសាទថ្មដ៏អស្ចារ្យ។ ទោះជាអ្វីៗដែលបានកសាងជាង១000ឆ្នាំមុន ហើយបានបន្សល់ត្រឹមតែអតីតកាលក៏ដោយ ក៏ដួងព្រលឹងអង្គរនៅតែបន្តជាអមតៈជាមួយយើងទាំងអស់គ្នា ដូចនេះការដាស់ព្រលឹងអង្គរឡើងវិញជាកតព្វកិច្ចរបស់ពួកយើងទាំងអស់គ្នា។

លោកបណ្ឌិត សុខ តុញ អនុប្រធានក្រុមប្រឹក្សាភិបាលនៃសាកលវិទ្យាល័យអង្គរនិងជាអ្នករៀបចំកម្មវិធីបានមានប្រសាសន៍ថា សង្ក្រាន្ដសាកលវិទ្យាល័យនេះ ធ្វើឡើងដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ ក្រោមប្រធានបទ”ការដាស់ព្រលឹងអង្គរ” ដើម្បីបង្កបរិយាកាសឱ្យនិស្សិតសប្បាយរីករាយជុំគ្នា ថែរក្សាប្រពៃណីទំនៀមទំលាប់សាសនារបស់ដូនតាខ្មែរ តាមរយៈការលេងល្បែងប្រជាប្រិយ និងពិធីសាសនា នានា និងជាសារផ្សព្វផ្សាយទៅដល់មហាជនទូទៅឱ្យដឹងថាជិតដល់ពេលចូលឆ្នាំប្រពៃណីជាតិហើយជាមួយគ្នានេះដែរសាកលវិទ្យាល័យអង្គរបានត្រៀមរួចជាស្រេចនឹងដឹកនាំក្រុមនិស្សិតទៅចូលរួមក្នុងព្រឹត្តិការណ៍អង្គរសង្ក្រាន្តផងដែរ ហើយជាពិសេស កាលពីថ្ងៃទី២៣ ខែមីនា នេះ សាកលវិទ្យាល័យបានធ្វើ កំណត់ត្រា រាំម៉ាឌីហ្សុន ៤៤៤នាក់ដើម្បីចូលរួមគាំទ្រ ជាមួយព្រឹត្តិការណ៍បំបែកឯតទគ្គកម្មពិភពលោក រាំម៉ាឌីហ្សុន ៣.០០០នាក់នៃកម្មវិធីអង្គរសង្ក្រាន្តនាឱកាសចូលឆ្នាំប្រពៃណីជាតិខាងមុខនេះ។ លោកក៏បានបន្ដ ប្រធានបទដាស់ព្រលឹងអង្គរនៅក្នុងព្រឹត្ដិការណ៍សង្ក្រាន្ដគឺនេះ លោកចង់ឱ្យយុវជនសិស្ស និស្សិត រំលឹកឡើងវិញនូវភាពរីកចំរើននាសម័យបុព្វបុរសខ្មែរដែលបានកសាងប្រាសាទអង្គរ ក៏ដូចជារំលឹកដល់ព្រលឹងដូនតាខ្មែរដែលបានបន្សល់ទុកនូវភាពអស្ចារ្យនេះ សម្រាប់កូនខ្មែរជំនាន់ក្រោយបានស្គាល់និងបន្ដចូលរួមថែរក្សាអភិរក្សទៅថ្ងៃខាងមុខទៀតផងដែ ។ លោកបណ្ឌិត សុខ តុញ បានមានប្រសាសន៍បន្ថែមទៀតថា នេះគឺជាលើកទី៤ហើយដែលសាកលវិទ្យាល័យអង្គរ រៀបចំប្រារព្ធកម្មវិធីសង្រ្កាន្តមហាវិទ្យាល័យ ក្រោមប្រធានបទ៖ការដាស់ព្រលឹងអង្គរ គឺក្នុងបំណង ពញ្ញាក់ ស្មារតីយុវជន និស្សិត ក៏ដូចជាមហាជនទូទៅ ការបង្កើនភាពជឿជាក់ និងហ៊ានទទួលស្គាល់ការពិតនូវអ្វីដែលខ្លួនមានក្នុងពេលបច្ចុប្បន្ន និងត្រូវយល់ថា គ្រប់ស្ថានភាពសង្គមយើងត្រូវផ្សារភ្ជាប់ រវាងបច្ចុប្បន្នទៅនឹងអតីតកាល និងអនាគតកាលផងដែរ អោយធ្វើការពិចារណា ប្រើការគិត និងប្រើប្រាស់អារម្មណ៍ជម្នះជាមួយឧបសគ្គ ដើម្បីសម្រេចគោលដៅនៃជីវិតយើងម្នាក់ៗជាដើម។

លោកបណ្ឌិត សុខ តុញ មានប្រសាសន៍បញ្ជាក់បន្ថែម ថា ៖ សង្ក្រាន្តអន្តរជាតិសាកលវិទ្យាល័យអង្គរឆ្នាំនេះក៏មានរៀបចំវេទិកាប្រឡងចម្រៀងរបស់និស្សិត និងផ្តល់អាទិភាព អាហារូបករណ៏១០០%សម្រាប់សិក្សា ៤ឆ្នាំពេញ ដល់បេក្ខភាពលេខ១ និងមានរៀបចំការប្រកួតប្រដាល់គុនដណ្តើមពានរង្វាន់ ឯកឧត្តម អ្នកឧកញ៉ាសៀង ណាំ របស់កីឡាប្រដាល់អាជីវពមកពីខេត្តនានា និងផ្សេងពីនេះក្នុងរយៈពេល៣ថ្ងៃ ក៏មានកម្មវិធីកម្សាន្តជាច្រើនដូចជា ល្បែងប្រជាប្រិយខ្មែរ រាំម៉ាឌីហ្សុន ពូនភ្នំខ្សាច់ លើកទង់ ស្តាប់ព្រះធម៌ទេសនា សម្តែងសិល្បៈខ្មែរ-បរទេស ស្រង់ព្រះ ព្រមទាំងមានស្តង់លក់អាហារ និងរាំកំសាន្តផងដែរ៕

ដោយ ÷ ពន្លឺ