លោកជំទាវ ហ៊ុន សេងនី អញ្ជើញកាត់ខ្សែបូរដាក់ឱ្យប្រើប្រាស់គរុភ័ណ្ឌក្នុងវត្តអង្គរខាងជើង

ខេត្តសៀមរាប ÷ ក្រោយពីបានជួសជុលកែលំអលាប ព៌ណ និងសាងសង់បន្ថែមនូវព្រះវិហារ សាលាធម្មសភា និងសមិទ្ឋផលនានា នៃវត្តឥន្ទបត្តបុរីហៅវត្តអង្គរខាងជើងស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប សមិទ្ឋផលទាំងនេះ ត្រូវបានកាត់ខ្សែបូរដាក់ឱ្យប្រើប្រាស់ទុកជាសម្បត្តិសាធារណៈសម្រាប់វត្តនិងបានដាក់បាត្រឆ្លង វេរភ័ត្តាហារប្រគេនព្រះសង្ឃចំនួន៧៥អង្គ នៅថ្ងៃទី២៣ ខែមីនាឆ្នាំ២០២៣ ក្រោមអធិបតីភាព មហាឧបាសិកាបណ្ឌិត ហ៊ុន សេងនី និងក្រុមគ្រួសារព្រមទាំងញាតិធម៌ ។

បើតាមថេរដីការបស់ លោក គង់ សុភាព ជាអតីត ព្រះគ្រូចៅអធិការជំនាន់ទី១០នៃវត្តឥន្ទបត្តបុរីអង្គរខាងជើងថា ៖ វត្តនេះបានបង្កើតឡើងនៅឆ្នាំ១៤៣២ ក្នុងរជ្ជកាលព្រះបាទពញាយ៉ាត។ ដោយសារកត្តាអាកាសធាតុ កត្តាសង្គ្រាម និងកត្តាមនុស្ស ទីអារាមនេះរងនូវការខូចខាតជាអន្លើរៗនិងទទួលការជួសជុលថែទាំជាបន្តបន្ទាប់។ ជាក់ស្តែងក្នុងអំឡុងឆ្នាំ២០២០ ចៅអធិការ និងគណៈកម្មការវត្តបានស្រុះស្រួលមូលមតិគ្នា ជួសជុលដំបូលនិងលាបពណ៌នៃព្រះវិហារ ជួសជុលកែលំអនិងសាងសង់បន្ថែមនូវទីសេនាសេនៈ មានកុដិ សាលាធម្មសភា អគារសាលាពុទ្ឋិកបឋមសិក្សា បន្ទប់ទឹក សួនច្បារ ជាដើម។ល។ ដោយចំណាយថវិកាអស់ជាង៨៥២,២០៣ដុល្លារ (ជាង៨៥ម៉ឺនដុល្លារ)ជាបច្ច័យបានមកពីសទ្ឋាជ្រះថ្លា របស់មហាឧបាសិកាបណ្ឌិត ហ៊ុន សេងនី និងកូនចៅក្រុមគ្រួសារព្រមទាំងញាតិធម៌និងពុទ្ឋបរិស័ទជិតឆ្ងាយទាំងក្នុងនិងក្រៅប្រទេស។

លោក គង់ សុភាព បន្ថែមថា៖ការជួយទំនុកបំរុងដល់ព្រះសង្ឃក៏ដូចជាហេដ្ឋារចនាសម្ព័ន្ឋនានាក្នុងវត្តនេះ គឺបង្ហាញនូវសទ្ឋាជ្រះថ្លាដ៏មុតមាំផ្តើមចេញពីទឹកចិត្តរបស់មហាឧបាសិកានិងញាតិធម៌ សប្បុរសជនជិតឆ្ងាយ នូវក្តីគោរព ស្រឡាញ់ និងជឿជាក់លើគុណព្រះពុទ្ឋព្រះធម៌ ព្រះសង្ឃ និងក៏ជាការរួមចំណែកដើម្បីថែរក្សាព្រះពុទ្ឋសាសនា ប្រពៃណីវប្បធម៌ទំនៀមទំលាប់របស់បុព្វបុរសដូនតាខ្មែរដែលមានតាំងពីយូរលង់ណាស់ មកហើយៗ ឱ្យស្ថិតស្ថេររុងរឿងជានិរន្តន៍។

ព្រះតេជគុណ តាត មហាទី ប្រធានគណៈគ្រប់គ្រងវត្តអង្គរខាងជើង និងជាព្រះធម្មធរអនុគណក្រុងសៀមរាប បានបង្ហាញព្រះទ័យសោមនស្សរីករាយ និងបានចាត់ទុកការចូលរួមបរិច្ចាគធនធានថវិកាទោះតិចក្តីច្រើនក្តី គឺជាការជួយជ្រោមជ្រែងដល់វិស័យព្រះពុទ្ឋសាសនាឱ្យកាន់តែរីកចម្រើនឡើង។ ព្រះអង្គថា៖ការសាងសង់ ឬជួសជុលវិហារ សាលា ឬកុដិជាដើមតម្កល់ទុកជាទានក្នុងព្រះពុទ្ឋសាសនា ថាជាកុសលបានផល្លានិសង្ឃច្រើនជាអនេក ព្រោះជាការអាចញ៉ាំងព្រះពុទ្ឋសាសនា រុងរឿងអស់កាលជាអង្វែង ដូច្នេះសុំឲ្យមន្ត្រីសង្ឃ និងភិក្ខសាម ណេរ ទាំងអស់ត្រូវរួមមគ្នាថែរក្សាសមិទ្ឋផលក្នុងវត្តឱ្យស្ថិតស្ថេរនិងបន្តកិច្ចកែលំអ និងអភិវឌ្ឍគរុភណ្ឌ័នានាក្នុងអារាមឱ្យបានរីកចម្រើន ទៅតាមលទ្ឋភាព ដើម្បីលើកស្ទួយវិស័យព្រះពុទ្ឋសាសនា ឱ្យកាន់តែខ្ពស់ត្រដែតឡើងថែមទៀត៕

ដោយ ÷ ពន្លឺ