ខេត្តសៀមរាប ÷ នៅរសៀលថ្ងៃទី ២២ ខែមីនា ឆ្នាំ២០២៣ នេះ លោកជំទាវ ទាង អេង ទៀ សីហា ភរិយាឯកឧត្តម ទៀ សីហា អភិបាលខេត្តសៀមរាប រួមទាំងលោកស្រីជាភរិយាថ្នាក់ដឹកនាំ និងក្រុមតោះតោះទៅសៀមរាប បានអញ្ជើញចុះជួបធ្វើការសំណេះសំណាល សួរសុខទុក្ខ ព្រមទាំងនាំយកនូវនំចំណីចែកជូនក្មួយៗប្អូនៗ នៅវិទ្យាល័យអប់រំពិសេសខេត្តសៀមរាប និងចូលរួមយុទ្ធនាការ លើសពីការប្រកួត (Beyond The Games) ដើមី្បធ្វើការបត់ក្រដាសបេះដូងឆ្ពោះទៅបំបែកកំណត់ត្រាពិភពលោក នៅក្នុងព្រឹត្តការណ៍អង្គរសង្ក្រាន្តឆ្នាំ២០២៣ ខាងមុខនេះ នៅលើទឹកដីប្រវត្តិសាស្ត្រអង្គរ សៀមរាប ។
ក្នុងការសំណេះសំណាលនោះលោកជំទាវ ទាង អេង ទៀ សីហា បានពាំនាំនូវការផ្តាំផ្ញើរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប និងឯកឧត្តម ទៀ សីហា អភិបាលនៃគណៈអភិបាលខេត្ត ជូនចំពោះលោកគ្រូ អ្នកគ្រូ និងប្អូនៗកុមារគថ្លង់ និងពិការភ្នែក ។
លោកជំទាវបានគូសបញ្ជាក់ថា មុនចាប់ដំណើរការ បត់បេះដូងក្រដាស ក្នុងការគាំទ្រកីឡាករ កីឡាការិនី ដែលមានពិការភាពដើម្បីបំបែកឯកទគ្គកម្មពិភព លោក នាពេលថ្ងៃខាងមុខនេះ។ ក្នុងឱកាសដែលកម្ពុជាធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើក ទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នេះ សហភាពសហព័ន្ធយុវជនកម្ពុជា បានបង្កើតយុទ្ធនាការ Beyond The Games ឬលើសពីការប្រកួត ក្នុងគោលបំណងចូលរួមផ្សព្វផ្សាយ អំពីព្រឹត្តិការណ៍កីឡាដ៏ធំទាំងពីរនេះ ដើម្បីលើកកម្ពស់មោទកភាពជាតិ ដែលកម្ពុជាធ្វើជាម្ចាស់ផ្ទះទទួលរៀប ចំការប្រកួតទាំងពីរជាលើកដំបូង ក្នុងប្រវត្តិសាស្ត្រ ដើម្បីជាការផ្សារភ្ជាប់ប្រជាពលរដ្ឋខ្មែរ ទៅនឹងភាពជាម្ចាស់ផ្ទះ និងបង្កើតនូវអនុស្សាវរីយ៍ ដែលមិនអាចបំភ្លេចបានរបស់យុទ្ធនាការ Beyond The Games ដែលបានផ្តួចផ្តើមបង្កើតការបំបែកឯតទគ្គកម្ម (បេះដូង ច្រើនជាងគេលើពិភពលោក ) ជាការប្រមូលផ្តុំការចូលរួមរបស់ប្រជាពលរដ្ឋខ្មែរគ្រប់មជ្ឈដ្ឋាន ដើម្បីបង្ហាញពីទំហំទឹកចិត្ត ក្នុងការគាំទ្រដល់កីឡាករកីឡាការិនីគ្រប់រូប និងបង្ហាញពីការសាទរនៃភាពជាម្ចាស់ផ្ទះលើកដំបូងរបស់កម្ពុជាផង ។
លោកជំទាវ ទាង អេង ទៀ សីហា បានបញ្ជាក់ថាក្នុងនាមយើងជាយុវជនខ្មែរ និង ជាសសរទ្រូងរបស់ប្រទេសជាតិ គឺត្រូវចូលរួមចំណែកក្នុងយុទ្ធនាការ Beyond The Games ដោយចូលរួមបត់បេះដូងក្រដាស ដើម្បីបំបែកឯតទគ្គកម្ម។ ម៉្យាងទៀតបេះដូងច្រើនជាងគេលើពិភពលោក ដែលនឹងគ្រោងយកទៅដាក់តាំងបង្ហាញ ក្នុងព្រឹត្តិការណ៍អង្គរសង្ក្រាន្តនាពេលខាងមុខ លើសពីនេះក៏បង្ហាញឲ្យឃើញពីការួមសហ ការគ្នារបស់កម្ពុជា ក្នុងការចែករំលែកក្ដីស្រលាញ់ ការលើកទឹកចិត្ត និង ការគាំទ្រជាតិមាតុភូមិ ជាពិសេសផ្សព្វផ្សាយឲ្យសកលលោកបានឃើញពីសាមគ្គីភាព សន្តិភាព អរិយធម៌ វប្បធម៌ និង សក្តានុពលរបស់កម្ពុជាផងដែរ ។ ដោយកត្តានេះ ហើយក៏ត្រូវការចូលរួមរបស់លោកគ្រូ អ្នកគ្រូ និងប្អូនៗកុមារគថ្លង់ និងកុមារពិការភ្នែក ក្នុងយុទ្ធការ Beyond The Games នាពេលនេះ ពិតជាមានសារសំខាន់ណាស់ដើម្បី ឈានឆ្ពោះទៅការបំបែកឯតទត្តកម្ម (បេះដូងច្រើនជាងគេលើពិភពលោក ) និងជាការលើកទឹកចិត្តដល់កីឡាករ កីឡាកាវិនីដែលមានពិការភាព ពិសេសក៏បង្ហាញពីបរិយាបន្នសង្គមផងដែរ។ ក្នុងឱកាសខួប ១០ឆ្នាំនៃព្រឹត្តការណ៍អង្គរសង្ក្រាន្តឆ្នាំ២០២៣នេះ ព្រះរាជាណាចក្រកម្ពុជា និងយកយុទ្ធនាការពីរ ដើម្បីបំបែកកំណត់ត្រាពិភពលោកគឺ រាំម៉ាឌីហ្សុន ៣ពាន់នាក់ និង ការបត់បេះដូងក្រដាសចំនួន ១លាន ដោយកម្ពុជាធ្លាប់ទទួលបានជោគជ័យម្ដងរួចមកហើយ នូវការរាំម៉ាឌីហ្សុនបំបែកកំណត់ត្រាពិភពលោកនេះ ៕
ដោយ ÷ ពន្លឺ