ខេត្តសៀមរាប÷នៅព្រឹកថ្ងៃទី១៧ ខែមីនា ឆ្នាំ២០២៣ នេះ លោកឧកញ៉ា បណ្ឌិត ហ៊ុយ ភៀវ ប្រធានសភា ពាណិជ្ជកម្មខេត្ត សៀមរាប -ឧត្តរមានជ័យ បានដឹកនាំ អនុប្រធាន សមាជិក សមាជិកា សភាពាណិជ្ជកម្មខេត្តចូលជួបសម្តែងការគួរសម និងសុំមតិយោបល់ល្អៗ ពី ឯកឧត្តម អ្នកឧកញ៉ា បណ្ឌិត សៀង ណាំ អ្នកតំណាងរាស្រ្តមណ្ឌលសៀមរាប ។ លោកឧកញ៉ា បណ្ឌិត ហ៊ុយ ភៀវ បានមានប្រសាសន៍អោយដឹងថា កន្លងឯកឧត្តម អ្នកឧកញ៉ា បណ្ឌិត សៀង ណាំ តែងតែគាំទ្រដល់សភាពាណិជ្ជកម្មខេត្តសៀមរាប-ឧត្តរមានជ័យ ក្នុងការដឹកនាំការគៀងគរអ្នកវិនិយោគដែលមានដូច ជាវិស័យពាណិជ្ជកម្ម កសិកម្ម និងទេសចរណ៍ អោយមកវិនិយោគ នៅក្នុងខេត្តសៀមរាប។ លោកឧកញ៉ា បណ្ឌិត ហ៊ុយ ភៀវ បានអោយដឹងបន្ថែមទៀតថា សភាពាណិជ្ជកម្មមណ្ឌលខេត្តសៀមរាប-ឧត្តរមាន ជ័យ ជាផ្នែកមួយដ៏សំខាន់ជួយ សម្របសម្រួលដល់វិស័យពាណិជ្ជកម្ម សេវាកម្ម កសិកម្ម ឧស្សាហកម្ម និងសិប្បកម្ម ជាពិសេសបានធ្វើឱ្យវិស័យឯកជនចូលរួមយ៉ាងសកម្មជាមួយរដ្ឋបាលខេត្ត និងបានទាក់ទាញអ្នកវិនិយោគទុនជាច្រើនមកបណ្តាក់ទុននៅក្នុងខេត្ត ដែលប្រការនេះ គឺពិតជាបានជំរុញដល់កំណើនសេដ្ឋកិច្ចរបស់ខេត្តទាំងពីរឱ្យបានកាន់តែប្រសើរថែមទៀតផងដែរ។ លោកប្រធាន បានបន្ថែមថា ការងារ ដែលសភាពាណិជ្ជកម្ម ចាំបាច់ត្រូវធ្វើ គឺការគៀងគររកអ្នកវិនិយោគិនទាំងក្នុង និងក្រៅប្រទេស មកបណ្តាក់ទុករកស៊ីនៅក្នុងខេត្តដោយធ្វើយ៉ាងណាត្រូវមានវិធីសាស្រ្តក្នុងការអូសទាញ ក្រុមអ្នក វិនិយោគឲ្យបាន តាមដែលអាចធ្វើទៅបាន លោកថា តួនាទីសភា ពាណិជ្ជកម្មនេះ សំខាន់ខ្លាំងណាស់ អាចនិយាយបានថាសម្របសម្រួលការប្រកបអាជីវកម្មក្នុងខេត្តនិងទាក់ទាញអ្នកវិនិយោគក្នុងស្រុកនិងនៅក្រៅប្រទេស មកវិនិយោគនៅក្នុងខេត្ត ដើម្បីបង្កើតការងារឲ្យបានច្រើនជូនបងប្អូនប្រជាពលរដ្ឋបានធ្វើ មានចំណូល សម្រាប់ទ្រទ្រង់ជីវភាពនិងជួយកាត់បន្ថយការចំណាកស្រុករបស់ប្រជាពលរដ្ឋផងដែរ។ លោកឧកញ៉ា បណ្ឌិត ហ៊ុយ ភៀវ បានមានប្រសាសន៍បន្តទៀតថា សភាពាណិជ្ជកម្មគឺជាស្ថាប័នតំណាងវិស័យឯកជនក្នុងខេត្ត សម្រាប់ជួយដំណោះរការអាជីវកម្មនៅក្នុងខេត្តនិងជួយទាក់ទាញ ការវិនិយោគ ដើម្បីអភិវឌ្ឍន៍ សេដ្ឋកិច្ច ខេត្ត ឲ្យមានការរីកចម្រើន ស្របតាមគោលនយោបាយរបស់រាជរដ្ឋាភិបាលកម្ពុជា ដើម្បីបង្កើតការងារលើកកម្ពស់ សហគ្រាសធុនតូច និងមធ្យម សហគ្រិនភាព ពង្រឹងភាពប្រកួតប្រជែងក្បាលម៉ាស៊ីន និងជំរុញ សេដ្ឋកិច្ច ក្នុងខេត្ត ឲ្យមានដំណើរការបានឆាប់រហ័សបន្ថែមទៀតផងដែរ៕
ដោយ ÷ ពន្លឺ
