ខេត្តសៀមរាប ÷នៅព្រឹកថ្ងៃទី១៧ ខែមីនា ឆ្នាំ២០២៣ នេះរដ្ឋបាលខេត្តសៀមរាប និង សហភាពសហព័ន្ធយុវជនកម្ពុជាខេត្តសៀមរាបព្រមទាំងមានការចូលរួមពីមន្ទីរបរិស្ថានខេត្ត ថ្នាក់ដឹកនាំមន្រ្តីរាជការ មន្ទីរ-អង្គភាពនានាក្នុងខេត្ត កងកម្លាំងប្រដាប់អាវុធ ក្រុមហ៊ុនឯកជន អាជ្ញាធរក្រុង លោកគ្រូ អ្នកគ្រូ សិស្សានុ សិស្ស រួមនឹងប្រជាពលរដ្ឋជាច្រើនរូប ដើម្បីធ្វើទិវាសម្អាតអនាម័យបរិស្ថាននៅតាមដងផ្លូវ និងតាមមាត់ស្ទឹងក្នុងក្រុងសៀមរាប ដែលដឹកនាំដោយលោក ឃឹម ហ្វីណង់ អភិបាលរងខេត្ត និងជាអនុប្រធានសហភាពសហព័ន្ធយុវជនកម្ពុជាខេត្តសៀមរាប។នៅក្នុងឱកាសនោះ លោក ឃឹម ហ្វីណង់ អភិបាលរងខេត្តបានថ្លែង ថា យុទ្ធនាការសម្អាតអនាម័យ និងបរិស្ថាននាពេលនេះ ពិតជាមានសារៈសំខាន់ណាស់ដែលធ្វើឲ្យក្រុងសៀមរាបរបស់យើងក្លាយជាទីក្រុងគ្របដណ្តប់ដោយបរិស្ថានស្អាត មានបរិយាកាសល្អ រុក្ខជាតិខៀវខ្ចី ផ្កាចម្រុះពណ៌ និងបង្កើនការយល់ដឹងអំពីអនាម័យបរិស្ថានដល់សាធារណជនដែលក្នុងគោលបំណងបង្កើនបរិស្ថានស្អាតក្នុងការរស់នៅរបស់ប្រជាពលរដ្ឋប្រកបដោយអនាម័យល្អដែលនាំមកនូវសុខភាពល្អ។
លោកអភិបាលរងខេត្តក៏បានបន្តទៀតថាទិវាសម្អាតបរិស្ថានអនាម័យបរិស្ថាននាពេលនេះគឺដើម្បីជំរុញឲ្យប្រជាពលរដ្ឋទូទៅចូលរួមថែរក្សាអនាម័យ និងបរិស្ថាន ក្នុងសហគមន៍ ជៀសផុតពីការចោលសំរាមគ្មានសណ្ដាប់ធ្នាប់ហើយម្យ៉ាងវិញទៀតក្នុងនាមយើងជាម្ចាស់ផ្ទះនៅក្នុងខេត្តសៀមរាបនឹងមានព្រឹត្តិការណ៍ធំដូចជា៖ ព្រះរាជពិធីប្រោសព្រះរាជទានព្រះអគ្គីកីឡា ដែលនឹងប្រារម្ភធ្វើឡើងនៅប្រាសាទអង្គរវត្ត នាថ្ងៃទី២១ ខែមីនា ឆ្នាំ២០២៣ខាងមុខនេះ ក្រោមព្រះរាជវត្តមានដ៏ខ្ពស់របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលព្រះអង្គនឹងយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីប្រោសព្រះរាជទាន «ព្រះអគ្គីកីឡា» ដែលជាពេលវេលាដ៏ល្អ ព្រះអាទិត្យរះចំពីលើកណ្តាលកំពូលប្រាសាទអង្គរវត្ត ដើម្បីរៀបចំធ្វើជាភ្លើងគប់រត់នៅខេត្តសៀមរាប និងបណ្តាប្រទេសក្នុងតំបន់អាស៊ាន សម្រាប់ព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ .ព្រឹត្តិការណ៍រៀបចំអង្គរសង្រ្កាន្ត និងក្នុងដើខែឧសភា ខេត្តនិងទទួលធ្វើម្ចាស់ផ្ទះការប្រគួតកីឡាស៊ីហ្គេម លើកទី៣២ផងដែរ ។
លោក ឃឹម ហ្វីណង ក៏បានជំរុញដល់បណ្ដាស្ថាប័ន អាជ្ញាធរគ្រប់លំដាប់ថ្នាក់រួមនឹងប្រជាពលរដ្ឋ ត្រូវចូលរួមទាំងអស់គ្នា ក្នុងការធ្វើអនាម័យ និងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន។ ជាពិសេសស្នើឲ្យអាជ្ញាធរមូលដ្ឋាន ជាមួយអ្នកពាក់ព័ន្ធ បន្តធ្វើការអប់រំផ្សព្វផ្សាយដល់ប្រជាពលរដ្ឋ ពីការគ្រប់គ្រងទុកដាក់សំរាម និងសំណល់រឹងឲ្យបានត្រឹមត្រូវ និងមានប្រសិទ្ធភាព។ ហើយសម្រាប់ការប្រារព្ធទិវានាពេលនេះដែរ វាក៏ជាចរន្តចលករមួយ ដែលជំរុញអោយមានការផ្តើមធ្វើសកម្មភាពមេត្រីភាពបរិស្ថានចេញពីបុគ្គលម្នាក់ៗ ឲ្យចេះទទួលខុសត្រូវ ក្នុងការទុកដាក់សំរាម សំណល់រឹង ដោយមិនបោះចោល ពាសវាលពាសកាលនៅតាមទីសាធារណ: ជាហេតុធ្វើអោយប៉ះពាល់ដល់សុខភាព និងសោភ័ណភាពទីក្រុង ដែលពោរពេញដោយសម្រស់ធម្មជាតិមួយនេះ ជាពិសេសគឺសេចក្តីថ្លៃថ្នូរបស់ខ្លួនឯងផ្ទាល់។ ជាមួយគ្នានោះដែរ លោកអភិបាលរងខេត្ត បន្តថាទន្ទឹមនឹងនេះការចូលរួមរបស់ប្រជាពលរដ្ឋគ្រប់រូប ក្នុងការលើកកម្ពស់អនាម័យ និងគុណភាពបរិស្ថាន គឺជាការចាំបាច់ និងជាវិភាគទានដ៏សំខាន់បំផុត ដើម្បីចូលរួមជាមួយរាជរដ្ឋាភិបាល ។ លោកក៏បានមានប្រសាសន៍បញ្ជាក់បន្ថែមទៀតថា ការធ្វើអនាម័យបរិស្ថាន កឺមិនមែនធ្វើតែពេលដែលរៀបចំមានបុណ្យទានឬព្រឹត្តិការណ៍ធំៗនោះទេ គឺសូមបងប្អូនទាំងអស់គ្នាគឺត្រូវធ្វើជាប្រចាំ ហើយត្រូវយល់ដឹងអំពីកិច្ចគាំពារបរិស្ថាន ការគ្រប់គ្រង និងទុកដាក់សំណល់ដោយការទទួលខុសត្រូវ និងមានការចូលរួមពីកម្លាំងគ្រប់ស្រទាប់វណ្ណ: ក្នុងការចូលរួមអនាម័យតាមលំនៅដ្ឋាន និងតាមទីសាធារ ណ: ដោយចេះទុកដាក់សំណល់ក្នុងធុងសំរាម ឲ្យបានត្រឹមត្រូវ និងការដាំដើមឈើ ដើម្បីឲ្យមានភាពបៃតងស្រស់ជាពិសេសចូលរួមកាត់បន្ថយប្លាស្ទិក ដើម្បីរួមគ្នាលើកស្ទួយសោភណ័ភាពទីក្រុង ទីប្រជុំជនឲ្យមានបរិស្ថានល្អខ្យល់អាកាសបរិសុទ្ធ ទេសភាពស្រស់ត្រកាលផងដែរ៕
ដោយ ÷ ពន្លឺ
