ខេត្តសៀមរាប ÷ ព្រះសពកន្តធម្មោ មី ពេជ្រ អតីតព្រះចៅអធិការវត្តពោធិ៍ញាណអារញ្ញសោមនស្ស(ហៅវត្តចក) ត្រូវធ្វើពិធីបុណ្យ រំលាយព្រះសពហើយកាលពីយប់ថ្ងៃទី១៦ ខែមីនា ឆ្នាំ២០២៣ នេះ បន្ទាប់ពីបានតម្កល់ព្រះសពព្រះអង្គអស់រយៈពេល ៣ឆ្នាំកន្លង មកនៅក្នុងវត្តពោធិ៍ញាណអារញ្ញសោមនស្ស(ហៅវត្តចក) ដែលស្ថិតនៅភូមិស្វាយព្រៃ សង្កាត់ស្វាយដង្គំ ក្រុងសៀមរាប ខេត្តសៀមរាប ។ គួររំលឹកថា ព្រះសព កន្តធម្មោ មី ពេជ្រ ព្រះអង្គបានទទួលអនិច្ចធម្មកាលពី ថ្ងៃទី២៦ខែ មីនា ឆ្នាំ២០២០ ក្នុងព្រះជន្មាយុ ៧៤ព្រះវស្សាដោយព្រះរោគាពាធ។ ក្នុងនាមជាចៅអធិការវត្តវត្តពោធិ៍ញាណអារញ្ញសោមនស្ស(ហៅវត្តចក) ព្រះកន្តធម្មោ មី ពេជ្រ បានដឹក នាំភិក្ខុសង្ឃ សាមណេរ និងពុទ្ធបរិស័ទចំណុះជើងវត្តប្រកបដោយភាពជោគ ជ័យ និងខ្ជាប់ខ្ជួន នៅក្នុងវិស័យព្រះពុទ្ធសាសនា ហើយបានបន្សល់នូវស្នាព្រះហស្ថយ៉ាងច្រើន ។ ក្រៅពីសមិទ្ធផលផ្នែកសាសនា ព្រះតេជព្រះគុណកន្តធម្មោ មី ពេជ្រ បានកសាងសមទ្ធិផលធំៗជាច្រើន ទុកជាសម្បត្តិសាធារណៈ ក្នុងការបម្រើដល់ផលប្រយោជន៍ជាតិមាតុភូមិ ដើម្បីលើកស្ទួយនូវប្រពៃណី ទំនៀមទម្លាប់ វប្បធម៌ ដោយពុំបានគិតនូវពីផលប្រយោជន៍បុគ្គលរបស់ខ្លួនឡើយ ។ នៅក្នុងពិធីរំលាយព្រះសពនោះដែរក៏មានការនិមន្ត និងអញ្ជើញ ផ្ដល់ព្រះអគ្គីដល់ព្រះសព ព្រះតេជព្រះគុណកន្តធម្មោ មី ពេជ្រ ពីសំណាក់ព្រះសិរីសម្នតិវង្ស ទេព ផាន ព្រះរាជាគណៈថ្នាក់ត្រី សមាជិកថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា និង ព្រះធម្មសិរី អាភាករោ ជុំ គឹមឡេង ព្រះរាជាគណៈកិត្តិយស និងជាព្រះសុមង្គលសិលាចារ្យ ព្រះមេគណខេត្តសៀមរាប ឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប និង លោកជំទាវ ស៊ិន ណម សមាជិកក្រុមប្រឹក្សាខេត្ត ព្រមទាំងមានវត្តមាននិមន្តអញ្ជើញចូលរួមពី មន្ត្រីសង្ឃក្នុងខេត្ត អស់ លោក លោកស្រីជាថ្នាក់ដឹកនាំមន្ទី និង កងកម្លាំងប្រដាប់អាវុធទាំងបី មន្ត្រីរាជការ បងប្អូនពុទ្ធបរិស័ទជិតឆ្ងាយចូលរួមយ៉ាងច្រើនផងដែរ ។
ក្នុងនាមរដ្ឋបាលខេត្តសៀមរាបលោកជំទាវ ស៊ិនណម សមាជិកក្រុមប្រឹក្សាខេត្ត និង ឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប បានសំដែងនូវក្តីសោកស្តាយ ចំពោះការបាត់បង់ ព្រះតេជព្រះគុណកន្តធម្មោ មី ពេជ្រ ពិតជាបានធ្វើឲ្យមន្ត្រីរាជការ សិស្សគណ និង ពុទ្ធបរិស័ទមានសេចក្តីទុក្ខសោកសង្រេងជាពន់ពេក ទោះជាព្រះអង្គ បានសុគតលាចាកលោកទៅក៏ពិតមែន តែគុណធម៌ និង កេរ្តិ៍ឈ្មោះ កិត្តិយស ដែលកើតពីអំពើល្អរបស់ព្រះអង្គនៅតែដក់ជាប់ ក្នុងដួងចិត្តយើងទាំង ឡាយ គ្មានថ្ងៃសាបសូន្យឡើយ ។ មានព្រះរាជបន្ទូល នាឱកាសនោះ ព្រះសិរីសម្នតិវង្ស ទេព ផាន បានផ្តល់នូវព្រះឱវាទ ដល់អ្នកចូលរួមក្នុងពិធីដើម្បីយកទៅអនុវត្តន៍និងប្រតិបត្តិតាមក្នុងការអប់រំបុត្រធីតា ជាពិសេសអប់រំខ្លួនឯងផ្ទាល់ស្របទៅតាមគន្លងឱវាទព្រះពុទ្ឋបរមគ្រូនៃយើង ។ ព្រះអង្គបានមានព្រះរាជបន្ទូលដាស់តឿនឲ្យប្រជាពុទ្ឋបរិស័ទទាំងអស់ពិចារ ណា ដោយដើរតាមផ្លូវនូវឱវាទព្រះពុទ្ធជាម្ចាស់ ស្អាតត្រង់នោះ ដោយការសម្អាតកាយវាចារចិត្ត និង ស្អាតឥរិយាបថទាំងបួន ព្រមទាំងការអាស្រ័យនូវគ្រឿងអាហារបរិភោគ រកទទួលទានប្រចាំថ្ងៃក៏ត្រូវពិចារណាឲ្យបានសមរម្យតាមការគួរ ជាពិសេសត្រូវប្រតិបត្តិឲ្យ បានខ្ជាប់នូវនិច្ចសីល ។ នៅពេលបន្ដិចទៀតនេះព្រះរូប ព្រះកាយរបស់ព្រះតេជព្រះគុណកន្តធម្មោ មី ពេជ្រ ព្រះអគ្គីនិងលេបត្របាក់ឆាបឆេះ នឹងឃ្លាតឆ្ងាយពីយើងទាំអស់គ្នា ប៉ុន្ដែអ្វីៗដែលនៅសេសសល់ ពុំអាចរលត់រលាយទៅបាននោះ គឺ សេចក្ដីល្អ អំពើល្អ កិត្ដិយស សេចក្ដីថ្លៃថ្នូរ ភាពសកម្មអំណត់ព្យាយាម ម៉ឺងម៉ាត់ក្នុងការងារ នៅតែស្ថិតនៅជាប់ក្នុងអារម្មណ៏ នៃយើងជានិច្ចកាល គ្មានថ្ងៃបំភ្លេចបានឡើយ និងសូម ឧទិ្ទសកុសលផលបុណ្យ ថ្វាយជូនព្រះវិញ្ញាណ ក្ខ័ន្ធរបស់ព្រះអង្គ បាននិមន្តទៅកាន់ព្រះបរមសុគតិភព ឲ្យបានគ្រប់ៗជាតិ ៕
ដោយ ÷ ពន្លឺ
