ខេត្តសៀមរាប ÷ បន្ទាប់ពីអាក់ខានដោយសារការរាតត្បាតជាសាកលនៃជំងឺកូវីដ-១៩ រយៈពេលជាង ២ឆ្នាំកន្លងមកនេះ តុក្កតាយក្សឆ្នាំ២០២៣ នឹងបង្ហាញខ្លួនម្តងទៀតនៅក្នុងក្រុងសៀមរាប នាចុងសប្ដាហ៍នេះ ក្រោមប្រធាន “ខ្មែរក្លាហាន” ដើម្បីលើកស្ទួយនូវវិស័យសិល្បៈ វប្បធម៌ បរិស្ថាន និងស្ដារឡើងវិញនូវក្បួនដង្ហែតុក្កតាយក្ស សម្រាប់ទាក់ទាញភ្ញៀវទេសចរណ៏។
លោក អ៊ុន សាវ៉ាន់ អ្នករៀបចំកម្មវិធីតុក្ដាយក្ស បានឱ្យដឹងថា តុក្កតាយក្សឆ្នាំ២០២៣ មានកុមារជាង ៤០០នាក់ បានចូលរួមរៀបចំរចនាឡើងនូវតុក្ដាយក្សចំនួន៧ដែលពួកគាត់មកពីអង្គការក្រៅរដ្ឋាភិបាលក្នុងស្រុក និងសាលាបឋមសិក្សាមួយចំនួន។ ការបង្កើតតុក្កតាយក្ស គឺជាការបង្រៀនកុមារ និងយុវជន ឱ្យស្គាល់ពីសិល្បៈអាចបង្កើនជីវិត ផ្តល់ការស្រមើស្រមៃបញ្ឆេះមោទនភាពចំពោះបេតិកភណ្ឌដ៏សម្បូរបែបរបស់ពួកគេ និងបង្រួបបង្រួមសហគមន៍។ លោកថា ប្រធានបទ “ខ្មែរក្លាហាន” ព្រោះប្រជាពលរដ្ឋខ្មែរបានចេញផុតពីកូវីដ-១៩ ហើយបញ្ចាំងពីធាតុនៃបរិស្ថានសង្គមវប្បធម៌ និងធម្មជាតិរបស់ប្រទេសកម្ពុជា ពីសត្វជិតផុតពូជ សត្វត្រី ពស់ជាដើម។
លោក អ៊ុន សាវ៉ាន់ បានបញ្ជាក់ថា តុក្កតាយក្សនឹងរួមបញ្ចូល កសិករ, មាតា និងព្រះវេស្សន្ត ដើម្បីបង្ហាញពីភាពធន់និងស្មារតីកម្ពុជា។ គម្រោងនេះមានរយៈពេលជាង ១២ឆ្នាំមកហើយ ដោយចាប់ផ្តើមនៅឆ្នាំ២០០៧ ដែលទទួលបានជោគជ័យក្នុងក្រុងសៀមរាប និងមានការរីកចម្រើនជារៀងរាល់ឆ្នាំ។
សម្រាប់ឆ្នាំ២០២៣នេះ ក្បួនដង្ហែតុក្កតាយក្ស ធ្វើឡើងតាមដងផ្លូវមាត់ស្ទឹងសៀមរាប ដែលនឹងចាប់ផ្តើមនៅវេលាម៉ោង ០៦ នឹង៣០នាទីល្ងាច ថ្ងៃសៅរ៍ ទី១១ ខែមីនា ឆ្នាំ២០២៣ ចេញពីខាងក្រៅវត្តដំណាក់ និងជួប ជុំគ្នាប្រគុំតន្ដ្រីជិតព្រះរាជដំណាក់ក្នុងខេត្តសៀមរាប ដើម្បីបង្ហាញស្នារដៃពីសិល្បៈ បង្ហាញពីតួរអង្គនិមួយៗរបស់តុក្កតា និងដើម្បីទាក់ទាញអ្នកទេសចរ។
ក្បួនដង្ហែរ នៅតាមដងផ្លូវក៏មានហ្វូងមនុស្សយ៉ាងច្រើនកុះករនឹងត្រេកអរចំពោះកុមារ តន្រ្តីករ និងអ្នកសំដែងដែលជះពន្លឺភ្លើង នាពេលយប់ដោយភាពរីករាយផងដែរ៕
ដោយ ÷ ពន្លឺ
