ខេត្តសៀមរាប ÷ នៅព្រឹកថ្ងៃទី0១ ខែមីនា ឆ្នាំ២០២៣ នេះ អគ្គលេខាធិការដ្ឋានក្រុមប្រឹក្សាសកម្មភាពជនពិការ និងក្រុមប្រឹក្សាសកម្មភាពជនពិការខេត្តសៀម រាបបានបើកកិច្ចប្រជុំត្រីមាសទី១បូកសរុបវឌ្ឍនភាពការងារឆ្នាំ២០២២ និងផែនការឆ្នាំ២០២៣ដែលមានការគាំទ្រដោយកម្មវិធីអភិវឌ្ឍសហប្រជាជាតិ UNDP ក្រោមកម្មវិធី ACCESS (អាសេស) ស្ថិតក្រោមអធិបតីភាព ឯកឧត្តម អ៊ុង សម្បត្តិ អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាសកម្មភាព ជនពិការ (តាមរយៈប្រព័ន្ធវីដេអូហ្សូម) និង លោក នាក់ ណេរ៉ុន អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តសៀមរាប ព្រមទាំងមានការចូលរួមពីសំណាក់សមាជិសមាជិកាក្រុមប្រឹក្សាសកម្មភាពជនពិការខេត្តសៀមរាប និងអង្គការដៃគូពាក់ព័ន្ធចូលរួម ផងដែរ ។ គោលបំណងនៃកិច្ចប្រជុំនេះគឺពិភាក្សាលើលទ្ធផលសម្រេចបានរបស់ ក.ស.ជ.ខេត្តក្នុងឆ្នាំ២០២២(មកពីមន្ទីរពាក់ព័ន្ធ).ពិនិត្យនិងសម្រេចលើផែនការសកម្មភាពឆ្នាំ២០២៣ និងពង្រៀងផែនការសកម្មភាពនិងថវិកាឆ្នាំ២០២៤ ។
ឯកឧត្តម អ៊ុង សម្បត្តិ អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ បានមានប្រសាសន៍តាមរយៈប្រព័ន្ធវីដេអូហ្សូម ថា៖ ការបើកកិច្ចប្រជុំត្រីមាសទី១បូកសរុបវឌ្ឍនភាពការងារឆ្នាំ២០២២ និងផែនការឆ្នាំ២០២៣របស់ក្រុមប្រឹក្សាសកម្មភាពជនពិការខេត្តសៀមរាបគឺពិតជាមានសារៈសំខាន់ណាស់ ហើយក៏បានបង្ហាញពីការគិតគូរ និងយកចិត្តទុកដាក់ខ្ពស់ ចំពោះបងប្អូនជនមានពិការភាពដែលជាជនងាយរងគ្រោះ ហើយ កំពុងតែត្រូវការចាំបាច់នូវការជួយឧបត្ថម្ភគាំទ្រទាំងជីវភាព ស្មារតី សម្ភារៈ លើកកម្ពស់តួនាទី ផលប្រយោជន៍ និង ការការពារសិទ្ធិ ពីគ្រប់មជ្ឈដ្ឋាន អង្គការដៃគូអភិវឌ្ឍន៍ សហគមន៍ និងរាជរដ្ឋាភិបាលកម្ពុជាយើង។ ឯកឧត្តម អ៊ុង សម្បត្តិ បានបន្តថារាជរដ្ឋាភិបាលកម្ពុជា ក៏បានបង្កើតច្បាប់ស្តីពីកិច្ចការពារ និងលើកកម្ពស់សិទ្ធិជនពិការរួចមកហើយ ដែលច្បាប់នេះ គឺកំពុងធ្វើវិសោធនកម្មថ្មី ទាំងអស់នេះ បានបង្ហាញឱ្យឃើញពីការយកចិត្តទុកដាក់ខ្ពស់ អំពីសុខទុក្ខ ជីវភាពរស់នៅរបស់បងប្អូន ជាជនមានពិការភាព និងគ្រួសារឲ្យមានភាពល្អប្រសើរឡើងពីមួយថ្ងៃទៅមួយថ្ងៃ ក្នុងការគោរពភាពថ្លៃថ្នូរពីកំណើត និងការរស់នៅដោយឯករាជ្យ ព្រមទាំងសុខុមាលភាពពេញលេញ ការលើកកម្ពស់ភាពស្មើគ្នាចំពោះមុខច្បាប់ និងការទទួលបានសេវាយុត្តិធម៌ ការចាកផុតពីការធ្វើទារុណកម្ម ការរំលោភបំពាន ការកេងប្រវ័ញ្ច អំពើហិង្សា និងដំណោះស្រាយ គ្រាមានអាសន្ន ព្រមទាំងលើកស្ទួយសមភាពស្រ្តីពិការ កុមារពិការ និងជនមានពិការភាពគ្រប់ប្រភេទផង ដែរ។
មានប្រសាសន៍បើកកិច្ចប្រជុំនាពេលនោះដែរ លោក នាក់ ណេរ៉ុន អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តសៀមរាប បានមានប្រសាសន៍ថា គោលដៅដ៏ចម្បងរបស់រាជរដ្ឋាភិបាលកម្ពុជា គឺការកាត់ បន្ថយភាពក្រីក្រ ការលើកកម្ពស់កម្រិតជីវភាពរស់នៅ និងគុណភាពជីវិតរបស់ប្រជា ជនដែលកំពុងមានកំណើន យ៉ាងឆាប់រហ័ស។ ហើយរាជរដ្ឋាភិបាលកម្ពុជាបានចាត់ទុកថា ភាពក្រីក្រ គឺជាការខាតបង់តម្លៃធនធានសេដ្ឋកិច្ច ដែល មិនត្រឹមតែមិនអាចទទួលយកបានខាងផ្នែកផ្លូវចិត្តប៉ុណ្ណោះទេ ប៉ុន្តែវាអាចបណ្ដាលឲ្យមានការបែកខ្ញែក និង អស្ថិរភាពក្នុងសង្គមថែមទៀត។ លោកបានបន្តទៀតថា ក្នុងអាណត្តិទី៦ របស់រដ្ឋសភា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេច តេជោ ហ៊ុន សែន បានដាក់ចេញនូវយុទ្ធសាស្ត្រចតុកោណ ដំណាក់កាលទី៤ ដែលបានផ្តោតជាសំខាន់ទៅ លើយុទ្ធសាស្ត្រគាំពារសង្គមសម្រាប់ជនក្រីក្រ និងជនងាយរងគ្រោះ ជាគោលនយោបាយអាទិភាពរបស់ រាជរដ្ឋាភិបាល ដែលធានាឱ្យបងប្អូនទទួលបានផលប្រយោជន៍ពីប្រព័ន្ធជំនួយសង្គម និងរបបសន្តិសុខសង្គមបានកាន់តែល្អប្រសើរឡើង។ លោកអភិបាល រងខេត្តក៏បានមានប្រសាសន៍បញ្ជាក់បន្ថែមថាការអនុវត្តការងាររបស់ក្រុមប្រឹក្សាសកម្មភាពជនពិការខេត្តសៀមរាបគឺធ្វើការជាពហុវិស័យដោយ មានការ ចូលរួមគាំទ្រពីសមាជិកក្រុមការងារមកពីស្ថាប័ននានា ដែលមានសេវាសម្រាប់ផ្តល់ជូនដល់ បងប្អូនជន មានពិការភាពត្រូវការមានដូចជា៖ សេវាស្តារលទ្ធភាព ពលកម្មកាយសម្បទា ការកំណត់អត្តសញ្ញាណកម្មជនពិការ ការបណ្តុះបណ្តាលវិជ្ជាជីវៈ ផ្តល់ជម្រក ស្បៀងអាហារ សុខភាព អប់រំដល់សិស្សខ្សោយបញ្ញា ផ្លូវច្បាប់ ការងារបង្កើតអាជីវកម្មខ្នាតតូច រកការងារឱ្យធ្វើ និងក្នុងការតស៊ូមតិ ។ល។ ហើយ សកម្មភាពទាំងនេះគឺមានការគាំទ្រតាមរយៈអង្គការដៃគូ ទទួលគម្រោងកម្មវិធីACCESS) មិនតែប៉ុណ្ណោះកន្លងមកថ្មីៗនេះកម្មវិធី ACCESS បានជ្រើសរើស យកខេត្ត កំពង់ស្ពឺធ្វើទស្សនៈកិច្ចសិក្សាវាយតម្លៃអំពីលទ្ធផលការងារគាំទ្រដោយកម្មវិធី ACCESS ។ លោក នាក់ ណេរ៉ុន ក៏បានសម្ដែងការកោតសរសើរ ចំពោះអង្គការ UNDP ជាពិសេសកម្មវិធីសហប្រតិបត្តិការអូស្ត្រាលី-កម្ពុជា ដើម្បីសេវាប្រកបដោយសមធម៌ និង និរន្តរភាព ហៅកាត់ថា ACCESS ដែលបានគាំទ្រកន្លងមកផងដែរ៕
ដោយ ÷ ពន្លឺ
