ខេត្តសៀមរាប ÷ កាលពីរសៀលថ្ងៃទី២២ ខែកុម្ភៈ ឆ្នាំ២០២៣នេះ លោក ឃឹម ហ្វីណង់ អភិបាលរង នៃគណៈអភិបាលខេត្តសៀមរាប បានទទួលជួបពិភាក្សាការងារមួយចំនួនរវាងរដ្ឋបាលខេត្តជាមួយគណៈប្រតិភូខេត្តហឺណាននិង ប្រតិភូក្រុង Zhengzhou នៃសាធារណរដ្ឋប្រជាមានិតចិនដែលដឹកនាំដោយលោក He Xiong អភិបាលក្រុងនៃរដ្ឋបាលនៃប្រជាជនក្រុង Zhengzhou នៅរដ្ឋបាលខេត្តសៀមរាប ។
នៅក្នុងជំនួបពិភាក្សានេះគឺផ្តោតជាសំខាន់ទៅលើការជំរុញធុរកិច្ច និងវិនិយោគរវាងខេត្តហឺណាន និងក្រុងZhengzhouប្រទេសចិន និងខេត្តសៀមរាប ។ ក្នុងកិច្ចពិភាក្សានោះដែរ លោក ឃឹម ហ្វីណង់ មានប្រសាសន៍ថា ក្នុងរយៈពេលបីឆ្នាំនេះខេត្តសៀមរាប ក៏ដូចជាប្រទេសកម្ពុជាបានជួបនូវការធ្លាក់ចុះនៃសេដ្ឋកិច្ច ជាពិសេស ខេត្តសៀមរាបយើងនេះមានវិស័យមួយចំនួន ដូចជាវិស័យទេសចរណ៍ និង វិស័យកសិកម្ម បានជួបការប៉ះពាល់យ៉ាងខ្លាំងពីការរីករាល ដាលនៃជំងឺកូវីដ-១៩ ដែលជាហេតុធ្វើអោយប្រជាពលរដ្ឋក្នុងខេត្តសៀមរាបបាត់បង់ការងារស្ទើរតែទាំងស្រុង។ លោកអភិបាលរងខេត្តបានជម្រាបជូន គណៈប្រតិភូខេត្តហៃណាន អំពីដំណើរទស្សនកិច្ចផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី៩ ដល់ថ្ងៃទី១១ ខែកុម្ភៈ ឆ្នាំ២០២៣កន្លងទៅនេះ នៅសាធារណរដ្ឋប្រជាមានិតចិន។ លោកក៏បានលើកឡើងពីសមទ្ធិផល ដែលកើតឡើងពីកិច្ចទំនាក់ទំនង សហប្រតិបត្តិការរវាងខេត្តសៀមរាប នៃព្រះរាជាណាចក្រកម្ពុជា និង ខេត្តហឺណាន នៃសាធារណរដ្ឋប្រជាមានិតចិន ដែលកាន់តែធ្វើឲ្យប្រជាជន នៃខេត្តទាំងពីរ បានផ្សារភ្ជាប់គ្នាជានិច្ច និងរួមសុខរួមទុក្ខជាមួយគ្នា ធ្វើឲ្យចំណងមិត្តភាពកម្ពុជា ចិន កាន់តែរឹងមាំទ្វេឡើង ។
ក្នុងនោះដែរលោកអភិបាលរងខេត្ត ក៏បានគួរបញ្ជាក់ផងដែរថា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទំនាក់ទំនង និងកិច្ចសហប្រតិបត្តិការ រវាងកម្ពុជា ចិន ត្រូវបាន លើកកម្ពស់មួយកម្រិតដ៏ធំថែមទៀតរហូតប្រសិទ្ធនាមថា “ភាពជាដៃគូយុទ្ធសាស្ត្រគ្រប់ជ្រុងជ្រោយ ជាមិត្តដែកថែប ហើយកម្ពុជាតែងប្រកាន់ជំហគាំទ្រគោលនយោបាយការបរទេសចិន ជាពិសេសគោលនយោបាយចិនតែមួយ និង គំនិតផ្តួចផ្តើមស្ដីពី “BRI (គំនិតផ្តួចផ្តើម ខ្សែក្រវ៉ាត់មួយ និងផ្លូវមួយ)” ហើយស្ថិតក្នុងស្ថានភាពដ៏លំបាកនៃការ រីករាលដាលជំងឺកូវីដ-១៩ រដ្ឋាភិបាលចិន បានក្លាយជាប្រទេសដែលបានផ្ដល់ជំនួយវ៉ាក់សាំង និងសម្ភារផ្សេងៗ ដ៏ច្រើនសន្ធឹកសន្ធាប់ដល់រាជរដ្ឋាភិបាលកម្ពុជា ក្នុងការទប់ស្កាត់ និងប្រយុទ្ធប្រឆាំងជំងឺកូរីដ ១៩។ ស្ថិតក្នុងឱកាសដ៏ថ្លៃថ្លា នៃជំនួបសម្ដែងការគួរសម និងពិភាក្សាការងារនាពេលនេះដែរលោក ឃឹម ហ្វីណង់ ក៏បានសម្ដែងការកោត សរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំចិន និងប្រជាពលរដ្ឋចិននៅទូទាំងប្រទេស ដែលបាននឹងកំពុង អភិវឌ្ឍប្រទេសឱ្យរីកចម្រើនប្រកបដោយកិត្យានុភាពក្នុងតំបន់ និង សកលលោក ហើយជាមួយគ្នានេះ លោកអភិបាលរងក៏បានធ្វើការ វាយតម្លៃខ្ពស់ចំពោះថ្នាក់ដឹកនាំខេត្ត ហឺណាន និងថ្នាក់ដឹកនាំក្រុងZhengzhou សម្រាប់កិច្ចការរួមចំណែកនូវកិច្ច អភិវឌ្ឍរបស់ខេត្ត និងពលរដ្ឋខេត្តសៀមរាបយើងខ្ញុំ ជាបន្តបន្ទាប់។ សម្ព័ន្ធមេត្រីភាពរវាងខេត្ត-ក្រុងយើងទាំងពីរពិតជាបម្រើឱ្យប្រយោជន៍សាធារណៈ និងសង្គមដែលមិនអាចកាត់ថ្លៃបាន ហើយនឹងកាន់តែពង្រឹងនូវចំណងមិត្តភាព សាមគ្គីភាព និងកិច្ចសហប្រតិបត្តិការកាន់តែល្អប្រសើរ និងរឹងមាំជានិរន្ត ហើយលោក ក៏មានសង្ឃឹមជឿជាក់ថា ប្រតិភូខេត្តហឺណាន និង ប្រតិភូក្រុងZhengzhou នៃសាធារណរដ្ឋប្រជាមានិតចិននៅតែបន្តការជួយគាំទ្រដល់ការអភិវឌ្ឍន៍ខេត្តសៀមរាប ឲ្យមានការរីកចម្រើនផងដែរ ព្រមទាំងជម្រុញអ្នកវិនិយោគចិន និងភ្ញៀវទេសចរ មកកាន់ខេត្តសៀមរាបច្រើនឡើងថែមទៀត ដើម្បីលើកំពស់សេដ្ឋកិច្ចខេត្តសៀមរាបផងដែរ។
មានប្រសាសន៍នាពេលនោះដែរ លោក He Xiong អភិបាលក្រុងនៃរដ្ឋបាលនៃប្រជាជនក្រុង Zhengzhou ក៏បានលើកឡើងពីកិច្ចទំនាក់ទំនងសហប្រតិបត្តិការប្រទេសទាំងពីរ កម្ពុជា ចិនមានតាំងពីសម័យដ៏យូរលុងមកកម្លេះ ហើយត្រូវបានសម្ដេចព្រះនរោត្តម សីហនុ ព្រះបរមរតនកោដ្ឋ បាន ពូនផ្ដុំ និងសម្ដេចតេជោ ហ៊ុន សែន បានថែរក្សារនូវចំណង់មិត្តភាពប្រទេសទាំងពីរកាន់តែមានភាពរឹងមាំទ្វេរឡើង។ លោក He Xiong ក៏បានបញ្ជាក់ពីសក្ដានុពលរបស់ហឺណាន និងខេត្តសៀមរាប ដែលមានសក្ដានុពលប្រហាក់ប្រហែលគ្នា លើវិស័យកសិកម្ម និងទេសចរណ៍។ ក្នុងនោះដែរលោក He Xiong ក៏បានលើកឡើងថា ដំណើរទស្សនកិច្ចរបស់ប្រតិភូនៅលើទឹកដីប្រវត្តិសាស្រ្តនេះ បានចាប់អារម្មណ៍យ៉ាងខ្លាំងលើវិស័យទេសចរណ៍ ដែលធ្វើឲ្យខេត្តយើងទាំងពីរចាប់ដៃគូនឹងគ្នាក្នុងការពង្រឹងសក្ខានុពលផ្នែកវិស័យទេសចរណ៍ ឲ្យមានភាពរីកចម្រើនរឹងមាំថែមទៀត ហើយដំណើរទស្សនៈកិច្ចនេះ កាន់តែធ្វើឲ្យចំណងមិត្តភាពប្រទេសទាំងពីរ សំខាន់ខេត្តសៀមរាប និង ខេត្ត ហឺណាន កាន់តែមានកិច្ចសហប្រតិបត្តិការនឹងគ្នាលើវិស័យទេសចរណ៍ និង កសិកម្មឲ្យមានការរីកចម្រើន ៕
ដោយ ÷ ពន្លឺ
