ខេត្តសៀមរាប ÷ ស្ពានថ្មមួយកន្លែងស្ថិតនៅផ្លូវចូលវត្តអារញ្ញសាគរ ក្នុងភូមិអារញ្ញ សង្កាត់សៀមរាប ក្រុង ខេត្តសៀមរាប ដែលគម្រោងកែលម្អស្ទឹងសៀមរាបជំហាន២ ត្រូវធ្វើការសាងសង់ស្ពានថ្មី ហើយត្រូវបានព្រះវិភត្តិមុនីញាណ វិសារទោ ហ៊ាក់ គឹមហ៊ត់ ព្រះ រាជាគណៈកិត្តិយស និងជាព្រះគ្រូចៅអធិការវត្តអារញ្ញសាគរ រួមគណៈកម្មការ អាចារ្យ ពុទ្ធបរិស័ទចំណុះជើងវត្ត បានមូលមតិគ្នាធ្វើពិធីក្រុងពលី រុះរើស្ពានចាស់ និងសាងសង់ស្ពានថ្មី កាលពីរសៀលថ្ងៃទី ១៣ ខែ កុម្ភះ ឆ្នាំ២០២៣ ក្រោមវត្តមាន ចូលរួមរបស់លោក ពិន ប្រាកដ អភិបាលរងនៃគណៈអភិបាលខេត្តសៀមរាប និងភរិយា ព្រមទាំងលោកចៅសង្កាត់ ក្រុមអ្នកបច្ចេកទេសសាងសង់ក្រុមហ៊ុន ឌុងសុង អ៊ីនជីនារីន ខូអិលធីឌី មេភូមិ លោកគ្រូអ្នកគ្រូ សិស្សានុ សិស្ស និង ប្រជាពុទ្ធបរិស័ទផងដែរ ។
ពិធីនេះត្រូវបានប្រារព្ធឡើងតាមបែបព្រហ្មមាញ្ញសាសនាសុទ្ធសាធ ដែលនៅក្នុងនោះរួមមានពិធីថ្វាយគ្រឿងសក្ការៈ និងប្រកាសបួងសួង និង ពិធីប្រគុំតន្ត្រីថ្វាយទសបារមី ដែលមួយផ្នែកនៃពិធីនេះគឺធ្វើឡើងដើម្បីបូជាព្រះភូមិ និងមួយផ្នែកទៀតសម្រាប់បូជាស្តេចក្រុងពាលី ដើម្បីរុះរើស្ពានចាស់ ផ្លាស់ធ្វើស្ពានថ្មី ដែលបានប្រព្រឹត្តទៅតាមកម្មវិធីដែលលោកអាចារ្យបានគ្រោងទុក ។ ពិធីប្រកាសបួងសួងនិងពិធីប្រគុំតន្ត្រីថ្វាយទសបារមី ដែលមួយផ្នែកនៃពិធីនេះគឺធ្វើឡើង ដើម្បីបូជាព្រះភូមិ និងមួយផ្នែកទៀតសម្រាប់បូជាស្តេចក្រុងពាលី ។
មានសង្ឃដិកានោះដែរ ព្រះវិភត្តិមុនីញាណ វិសារទោ ហ៊ាក់ គឹមហ៊ត់ ព្រះ រាជាគណៈកិត្តិយស និងជាព្រះគ្រូចៅអធិការវត្តអារញ្ញសាគរ បានឲ្យដឹងផងដែរ អំពីជីវប្រវត្តិនៃការសាងសង់ស្ពានថ្មនេះ ដែលមានអាយុកាលប្រមាណជាង៥០ឆ្នាំមកហើយ ដោយព្រះគ្រូឧបជ្ឈា ព្រះនាម ម៉ៅ ប៊ុន ដែលមានសទ្ធាជ្រះថ្លាកសាងស្ពានថ្មនេះ ។ ព្រះអង្គមានសង្ឃដិកាបញ្ជាក់ថា ដើមី្បធ្វើឲ្យ បានត្រឹមត្រូវទៅតាមទំនៀមទម្លាប់ប្រពៃណី ក្បួនខ្នាតពីបូរាណកាលមក មុនធ្វើការរុះរើ ឬ កសាងអ្វីមួយ ក៏យើងត្រូវធ្វើការសុំ ខមាទោស ពីម្ចាស់ដើម និង ត្រូវធ្វើពិធីសុំម្ចាស់ទឹកម្ចាស់ដីព្រៃព្រឹក្សា អ្នកតាវ័រ ដែលបានគង់ប្រថាននៅក្នុងទីវត្តអារ័ញ្ញសាគរ ក៏ដូចដងស្ទឹងប្រវត្តិសៀមរាបនេះ ក្នុងគោលបំណងសុំនូវសេចក្តីសុខដល់យើងគ្រប់ៗគ្នា ទើបធ្វើឲ្យមានព្រឹត្តិការណ៍នាពេលនេះ ។
តាមការបញ្ជាក់របស់តំណាងក្រុមហ៊ុន ឌុងសុង អ៉ីនជីនារីន ខូអិលធីឌី បានឲ្យដឹងថា គម្រោងកែលម្អស្ទឹងសៀមរាបជំហាន២ នេះ ក្រោមកម្ចីឥណទាន ធនាគារនីហរ័ណ អាហរ័ណ នៃសាធារណរដ្ឋកូរ៉េ ដែលក្រសួងសាធារណការ និង ដឹកជញ្ជូន ជាម្ចាស់ គម្រោង ដោយមានទីប្រឹក្សាបច្ចេកទេស ឌុងសុង អ៊ីនជីនារីន ខូអិលធីឌី សហការជាមួយ ខ្មែរខនសាល់ថិន អ៉ីនជីនារីន ខភើរេសិន ខូអិលធីឌី ដែលមានក្រុមហ៊ុនសាងសង់ យ៉ុងជីង ខនស្ត្រាក់សិន អាយអិនស៊ី ។ លោកក៏បានបញ្ជាក់ ថា ស្ពានដែលត្រូវសាងសង់ក្នុងគម្រោងកែលម្អស្ទឹងសៀមរាបជំហាន២ នេះ មានចំនួន ៣កន្លែង ហើយស្ពានដែលត្រូវសាងសង់ជំនួសស្ពានថ្មចាស់ចូលទៅវត្តអារញ្ញសាគរនេះ មានបណ្តាយ ៣០ម៉ែត្រ ទទឹង ១៣ម៉ែត្រ ដែលចំណាយថវិកា ប្រមាណជាង ២០ម៉ឺនដុល្លា ដែលជាមូលនិធិ EDCF ដែលត្រូវសាងសង់រួចរាល់រយៈពេល៨ខែ ។
មានប្រសាសនោះដែរលោក ពិន ប្រាដក អភិបាលរងខេត្តសៀមរាប បានឲ្យដឹងថា គម្រោងកែលម្អស្ទឹងសៀមរាបជំហាន២ នេះ ក្រោមកម្ចីឥណទាន ធនាគារនីហរ័ណ អាហរ័ណ នៃសាធារណរដ្ឋកូរ៉េ ដែលមានក្រសួងសាធារណការ និង ដឹកជញ្ជូន ជាម្ចាស់ គម្រោង ។ ម៉្យាងទៀតគម្រោងនេះត្រូវបានអាក់ខាន ដោយនៅលើពិភពលោកបានជួបនូវវិបត្តិកូវិដ១៩ ដែលធ្វើឲ្យ គម្រោងនេះបានអូសបន្លាយមកដល់ពេលនេះ ។ គម្រោងកែលម្អស្ទឹងសៀមរាបនេះ ដើមី្បធ្វើឲ្យដងស្ទឹងប្រវត្តិសាស្ត្រមួយនេះ ឲ្យកាន់តែមានសោភណ្ឌភាពស្រស់ត្រកាលប្រកបទៅដោយសម្រស់ធម្មជាតិបៃតងស្រស់ បរិស្ថាន អនាម័យល្អ ក្នុងការទាក់ទាញអារម្មណ៍ភ្ញៀវទេសចរណ៍ជាតិ អន្តរជាតិ មកទស្សនាលំហែកម្សាន្តតាមដងស្ទឹង និង ធ្វើឲ្យចរន្តទឹកហូរលឿន បញ្ជៀសនូវការលិចលុងក្រុងសៀមរាបផងដែរ ។ ការរុះរើស្ពានចាស់ផ្លាស់ ធ្វើស្ពានថ្មី គឺធ្វើឲ្យតែមានភាពប្រសើរឡើង សម្រាប់បងប្អូនប្រជាពុទ្ធបរិស័ទ សិស្សានុសិស្ស ធ្វើដំណើរឆ្លងកាត់ មានភាពទូលំ ទូលាយ ព្រមទាំងធ្វើឲ្យដងស្ទឹងអារញ្ញ កាន់តែទាក់ទាញអារម្មណ៍ ស្របតាមចម្រៀងមួយបទរបស់លោកតា ស៊ិន ស៊ីសាមុត ទៀតផង៕
ដោយ ÷ ពន្លឺ
