ខេត្តរតនគិរី៖ ទោះជាថ្មីៗនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានចេញ លិខិតព្រមានដកតំណែងចៅហ្វាយខេត្តបីរូប នៅភូមិភាគឦសាន្តនៃប្រទសកម្ពុជាពាក់ព័ន្ធនឹងការមិនបង្ក្រាបបទ ល្មើសព្រៃឈើតាមបទបញ្ជាសម្តេចតេជោនាយករដ្ឋមន្ត្រី ហ៊ុន សែន បែបណាក៏ដោយ ក៏នៅតែមានសេចក្តីរាយការណ៍ជាហូរហែរ ស្តីពីសកម្មភាព ក្រុមឈ្មួញបានជួលកម្មករ សម្រុកលួចកាប់ឈើក្នងព្រៃសហគមន៏យ៉ាងរង្គាសដឹកចេញនិងអូសតាមត្រាក់ទ័រចំនួន១៣ កាលពីយប់ថ្ងៃទី២៣ខែតុលាឆ្នាំ២០១៨ថ្មីៗកន្លងទៅនេះ ។
តាមសេចក្តីរាយកេណ៍ពីប្រជាពលរដ្ខនៅ ស្រុកអណ្តូងមាស ខេត្តរតនគិរី បានអោយដឹងថា មេឈ្មួញរកស៊ីឈើខុសច្បាប់ ដែលគេនិយាយតៗគ្នាថា ជាសេនាដៃស្តាំរបស់សមត្ថកិច្ចប្រដាប់អាវុធខេត្តរតនគីរី បានសម្រុកលួចកាប់ដឹកជញ្ជូនឈើខុសច្បាប់យ៉ាងកក្រើក នៅភូមិភិ ឃុំសេសាន ស្រុកអូរយ៉ាដាវ រហូតដល់បង្គោល១៤-១៥ ឃុំញ៉ាង ស្រុកអណ្តូងមាសទំលាក់ អូសបាកុងចូលទន្លេសេសានបណ្តែតក្បូនទៅស្រុកយួនដូចហែរកឋិន គ្មានមន្ត្រី និងសមត្ថកិច្ចណាហ៊ានក្អកជាមួយមេឈ្មួញរូបនេះឡើយ។
លោក ថង សាវុន អភិបាលខេត្តរតនគិរី និងលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ត្រូវបានមជ្ឈដ្ឋាន ប្រជាពលរដ្ឋមួយចំនួនរិះគន់ថា បានឃុបឃិតបើកដៃឲ្យមានបទល្មើសព្រៃឈើយ៉ាងរាលដាលគ្មានការទប់ស្កាត់និងបង្រ្កាប អោយមានប្រសិទ្ធភាព បណ្តែតបណ្ដោយឲ្យមេឈ្មួញ ហូវ ជីវ៉ៃ និងឈ្មោះ ស៊ី នឿន បង្កើនសកម្មភាពបំផ្លាញព្រៃឈើ ក្នុងតំបន់កន្ទុយនាគ ស្រុកអណ្តូងមាស យ៉ាងគឃ្លើនប្រឆាំង នឹងបទបញ្ជារបស់សម្តេចតេជោ ។
មន្ត្រីតូចតាច នៅស្រុកអណ្តូងមាស បានប្រាប់ថា ព្រៃឈើនៅកន្ទុយនាគកំពុងរងការវិនាសហិនហោចដោយការកាប់លក់យ៉ាងរង្គាលពីពួកអ្នកមាន អំណាចមានលុយនៅកាងពីក្រោយ ។ចំណែកលោក សាយ សំអាល់ រដ្ឋមន្ត្រីក្រសួងបរិស្ថាន ដែលមានប្រធានមន្ទីរបរិស្ថានខេត្ត ជាសេនាធិការសម្ងំស្ងៀមឈឹង ដោយមិនអើរពើរពីការបំផ្លិចបំផ្លាញព្រៃឈើតំបន់កន្ទុយនាគក្រោមស្នាដៃក្រុមឈ្មួញ ឃុបឃិតជាមួយសមត្ថកិច្ចពាក់ព័ន្ធ ។
ប្រសិនបើលោករដ្ឋមន្ត្រីបរិស្ថានមានចំណាត់ការ តែបន្តិចនោះច្បាស់ជាមន្ត្រីដែលពាក់ពាន់ មេឈ្មួញ ហូវ ជីវ៉ៃ និងឈ្មោះ ស៊ី នឿន គេជឿថាពួកឈ្មួញមិនហ៊ានថ្លើមធំបំផ្លាញព្រៃឈើដូចពេលនេះទេ ។ នេះនិយាយត្រឹមតែអំណាចរបស់លោក សាយ សំអាល់ រដ្ឋមន្រ្តី ក្រសួងបរិស្ថានទេ មិននិយាយដល់អំណាចរបស់លោកនាយ ឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទ ប្រទេសនោះទេ ដែលជាប្រធានក្រុមបង្ក្រាបបទល្មើសព្រៃឈើធំជាងគេម៉ាស្រុកខ្មែរជាអ្នកទទួលអនុវត្តបទបញ្ជារបស់សម្តេច តេជោ ហ៊ុន សែន មានសិទ្ធិ អំណាចជិះឧត្ថម្ភាគចក្រ និង បាញ់ រ៉ូក្កែតដោយកាំភ្លើងស្វ័យប្រវត្តិក្នុងប្រតិបត្តិការបង្ក្រាប ក្រុមឧក្រិដ្ឋជនកាប់បំផ្លាញ ដឹកជញ្ជូនធ្វើចរាចរឈើនាំចេញ ទៅបរទេស តែមកដល់ពេលនេះគេមិនទាន់បានឃើញការ ដឹកនាំកម្លាំងសមត្ថកិច្ចPM បង្រ្កាបបទល្មើសព្រៃឈើដោយ ជិះឧត្ថម្ភាគចក្រលើមេឃពីសំណាក់លោកនាយឧត្តមសេនីយ៍ សៅ សុខា ម្តងនៅឡើយទេ។
គេពុំដឹងថាមកពីមូលហេតុអ្វីដែរ ទោះជាមានការក្រើនរំលឹក និងការព្រមានធ្ងន់ៗពីសម្តេចក្រ ឡាហោម ស ខេង យ៉ាងណាក៏ដោយក៏ខាងអាវុធហត្ថលើផ្ទៃ ប្រទសនៅត្រជាក់ល្ហឹមជាមួយមេឈ្មួញឈើធំៗ ដែលមាន ឈ្មោះក្នុងបញ្ជីខ្មៅរបស់សមត្ថកិច្ច ? ។
ករណីខាងលើនេះ អង្គភាពគេហទំព័រសារព័ត៌មាន រស្មីក្រុងយើងមិនទាន់ស្វែងរកការបំភ្លឺពីអ្នកនាំពាក្យសាលាខេត្តរតនគីរី ឬមន្ត្រិជំនាញណាមួយនៅឡើយទេ។ អង្ភភាពយើងស្វាគមន៍គ្រប់ពេលវេលា ដើម្បីផ្សព្វផ្សាយការបកស្រាយបំភ្លឺពីភាគីពាក់ព័ន្ធ ៕
ដោយ ៖ វិចិត្រ
