ខេត្តសៀមរាប ÷ អំណោយមាន មី , ទឹកត្រី ទឹកស៊ីអ៊ីវ ,ត្រីងៀត សាច់ក្រក ,ទឹកសុទ្ធ និង ភេសជ្ជះមួយចំនួន របស់សមាគមចលនាយុវជនកម្ពុជា(ក្រុម១៥៧) ដឹកនាំដោយលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប និង អស់លោក លោកស្រីជាអនុប្រធាន ,លេខាធិការ និងសមាជិកសមាជិកា សមាគមក្រុង ស្រុក បាននាំយក ទៅប្រគល់ជូនដល់កងដឹកជញ្ជូន របស់យោធភូមិភាគទី៤ និង កងពលតូចដឹកជញ្ជូនលេខ៩០ និងកងពលតូចលេខ៤១ និង៤២ ប្រើប្រាស់កម្លាំងចំនួន២៦៥នាក់ ដែលមានភារៈកិច្ចជួយដឹកជញ្ជូនសម្ភារៈបងប្អូនប្រជាពលរដ្ឋដែលស្ម័គ្រចិត្តផ្លាស់ប្តូរទីលំនៅដ្ឋាន ទៅរស់នៅតំបន់អភិវឌ្ឍន៍ភូមិធម្មជាតិរុនតាឯក និងតំបន់អភិវឌ្ឍន៍ភូមិពាក់ស្នែងថ្មី ។
ពិធីប្រគល់ អំណោយនេះក្រោមវត្តមានរបស់ឯកឧត្តម ម៉ៅ ដារិន សមាជិកក្រុមប្រឹក្សាខេត្ត តំណាងឯកឧត្តម អ៊ាន ឃុន ប្រធានក្រុម ប្រឹក្សាខេត្តសៀមរាប និង លោកឧត្តមសេនីយ៍ទោ សុក រីនណា មេបញ្ជាការរង នាយសេនាធិការយោធភូមិភាគទី៤ តំណាងឯកឧត្តមឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ ព្រមទាំងអាជ្ញាធរក្រុងចូលរួម នៅទីតាំងអតីតៈយោធភូមិភាគទី៤ ចាស់មុខអង្គរវត្ត ។
តាមការបញ្ជាក់របស់លោកឧត្តមសេនីយ៍ទោ សុក រីនណា មេបញ្ជាការរង នាយសេនាធិការយោធភូមិភាគទី៤ បានឲ្យដឹងថាក្រោយទទួលបាននូវបទបញ្ជារបស់ប្រមុខរាជរដ្ឋាភិបាល ក្នុងការរៀបចំតំបន់រមណីយដ្ឋានអង្គរឲ្យមានស្ថានភាពស្រស់ត្រកាលប្រកបដោយពណ៌បៃតង និងមានបរិស្ថានអនាម័យល្អ ក្នុងការអនុវត្តទៅតាមការកំណត់របស់អង្គការយូនីស្កូ ដើមី្បថែរក្សាសោភណ្ឌភាពប្រាង្គប្រាសាទ និង ទីបូរាណដ្ឋាន ហើយដែលបានស្ម័គ្រចិត្តរុះរើផ្ទះនៅក្នុងតំបន់រមណីយដ្ឋានអង្គរ និង បានចាប់ឆ្នោតយកក្បាលដីឡូតិ៍នៅភូមិធម្មជាតិរុនតាឯក ស្រុកបន្ទាយស្រី ដើម្បីឲ្យអាជ្ញាធរជាតិអប្សរា រៀបចំតំបន់រមណីយដ្ឋានអង្គរឲ្យកាន់ តែមានភាពទាក់ទាញឡើង ។ លោកបានបញ្ជាក់ថា កងដឹកជញ្ជូនដែលក្រសួងការពារជាតិបានផ្តល់ឲ្យ រួមនឹងកងដឹកជញ្ជូនរបស់ យោធភូមិភាគទី៤មានចំនួន សរុប ៣៥គ្រឿង មានកម្លាំង ២៦៥ នាក់ ក្នុងការដឹកជញ្ជូនលំនៅដ្ឋានបងប្អូនប្រជាពលរដ្ឋ ប្រមាណជាង ៧ពាន់ខ្នងផ្ទះ ហើយបានដឹកញ្ជូនជូនបងប្អូនដែលបានស្ម័គ្ររុះរើសំណង់ខុសច្បាប់របស់ខ្លួន ចេញពីតំបន់រមណីយដ្ឋានអង្គរ ទៅតាំងលំនៅដ្ឋានថ្មីស្ថិតនៅតំបន់ភូមិធម្មជាតិរុនតាឯក ស្រុកបន្ទាយស្រី តាមរយៈនៃចាប់ឆ្នោតទទួលយកដីឡូតិ៍ ដែលផ្តល់ដោយរាជរដ្ឋាភិបាល មកដល់ពេលនេះបាន ប្រមាណ១ពាន់ខ្នងផ្ទះហើយ ។
មានប្រសាសន៍នោះដែរលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប បានធ្វើការកោតសរសើរចំពោះ វីរៈភាពរបស់កងកម្លាំងខេមរភូមិន្ទ មានភាពអត់ធ្មត់មិនថា នៅក្រោមកំដៅថ្ងៃ ឬភ្លៀង បានធ្វើការយ៉ាងមុះមុត ទៅតាមបទបញ្ជារបស់រាជរដ្ឋាភិបាល ក្នុងការចុះជួយធ្វើការលើកដាក់ ដឹកជញ្ជូនសម្ភារៈ ផ្ទះសម្បែងរបស់បងប្អូនប្រជាពលរដ្ឋស្ម័ត្រចិត្ត រុះរើសំណង់របស់ខ្លួន ចាកចេញពីតំបន់រមណីយដ្ឋានអង្គរ ទៅតាំងលំនៅដ្ឋានថ្មីស្ថិតនៅតំបន់ភូមិធម្មជាតិរុនតាឯក ស្រុកបន្ទាយស្រី ។ លោកបានបន្តថា ដើមី្បចូលរួមជាមួយរាជរដ្ឋាភិបាលកម្ពុជា និងការលើកទឹកចិត្តដល់បងប្អូនកងកម្លាំង នៃយោធភូមិភាគទី៤ សមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បាននាំយកអំណោយ ជាគ្រឿងឧបភោគបរិភោគ ក្នុងការដោះស្រាយនូវការខ្វះខាតរបស់បងប្អូន។ លោកក៏បានធ្វើការថ្លែងអំណរគុណ ដល់រាជរដ្ឋាភិបាល និង កងកម្លាំងយោធភូមិភាគទី៤ ដែលបានយកចិត្តទុកដាក់ខ្ពស់ ជួយសម្រាលនូវទុក្ខលំបាករបស់ប្រជាពលរដ្ឋ និងបង្កភាពងាយស្រួលដល់បងប្អូនក្នុងពេលធ្វើការផ្តាស់ប្តូរទីតាំងនេះ។ ម៉្យាងទៀត សមាគមចលនាយុវជនកម្ពុជា ក្រុម១៥៧ សាខាខេត្តសៀមរាប ក៏នៅតែបន្តធ្វើសកម្មភាពមនុស្សធម៌ នៅគ្រប់មូលដ្ឋាន ដែលជួបការលំបាក និងខ្វះខាត ។
ក្នុងនោះដែរឯកឧត្តម ម៉ៅ ដារិន សមាជិកក្រុមប្រឹក្សាខេត្ត ក្នុងនាមរដ្ឋបាលខេត្តសៀមរាប បានថ្លែងអំណរគុណ ចំពោះយោធភូមិភាគទី៤ និងសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប ដែលតែងតែធ្វើការសហការជាមួយរដ្ឋបាលខេត្ត ក្នុងវិស័យសង្គមកិច្ច និងសេដ្ឋកិច្ច ។ ឯកឧត្តមបានបន្តទៀតថា ចំពោះប្រជាពលរដ្ឋកាន់កាប់ដីធ្លី និងសំណង់ខុសច្បាប់ក្នុងតំបន់រមណីយដ្ឋានអង្គរ និង តំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ដែលបានស្ម័គ្រចិត្តរុះរើចេញពីទីតាំងនោះ ដើម្បីមករស់នៅតំបន់ថ្មី នឹងជួយធ្វើឲ្យប្រាសាទអង្គរវត្ត មិនប្រឈមនឹងការដកចេញពីបញ្ជីសម្បត្តិបេតិកភណ្ឌពិភពលោក។ ម៉្យាងទៀត សកម្មភាពមនុស្សធម៌នេះ ជាប្រពៃណីដែលយើងមិនអាចខ្វះបាន ដែលសមាគមចលនាយុវជនកម្ពុជា(ក្រុម១៥៧)សាខាខេត្តសៀមរាប ដែលតែងតែជួយគ្រឿងឧបភោគបិភោគដល់កងទ័ព និងប្រជាពលរដ្ឋក្រីក្រពិតប្រាកដនៅក្នុងសង្គមជាតិ និងសូមឲ្យបន្តប្រពៃណីចែករំលែកនេះ ចូលជ្រៅទៅដល់មូលដ្ឋានដែលជួបការខ្វះខាតបន្តទៀតផងដែរ ៕
ដោយ ÷ ពន្លឺ
