ខេត្តសៀមរាប ÷ នៅចុងសប្តាហ៍ព្រឹកថ្ងៃទី ២៨ ខែ មករា ឆ្នាំ២០២៣ នៅអធិការដ្ឋាននគរបាលក្រុងសៀមរាប ធ្វើសន្និសីទ្ធកាសែត មួយស្ដីអំពី ការគ្រប់គ្រងសន្តិសុខ សុវត្ថិភាព និងសណ្ដាប់ធ្នាប់ទូទៅនៅក្នុងខេត្ត និង ការបង្ហាញមុខក្រុមចោរលួចម៉ូតូយ៉ាងសកម្មមួយក្រុម មានគ្នា០៩នាក់ ហើយត្រូវឃាត់ខ្លួនបានជនសង័្សយចំនួន ០៨នាក់ ហើយម្នាក់ទៀតបានកំពុងស្រាវជ្រាវបន្ត ព្រមទាំងបានដកហូតនូវវត្ថុតាង មានម៉ូតូ ០៦គ្រឿង និង ឧបករណ៍សម្ភារៈកែច្នៃមួយចំនួនទៀត ។
អង្គសន្និសីទ្ធកាសែតនេះបានធ្វើឡើងក្រោមវត្តមានរបស់លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប និង លោកវរសេនីយ៍ឯក ដា ចំរើន អធិការក្រុងសៀមរាប រួមទាំងមន្ត្រីនគរបាលជំនាញផងដែរ ។
តាមការបញ្ជាក់របស់លោកឧត្តមសេនីយ៍ត្រី ភឹង ចិន្តារ៉េត ស្នងការរងខេត្ត ស្តីអំពីការងារសន្តិសុខនូវទូទាំងខេត្ត គឺ បានផ្តល់នូវភាពល្អប្រសើរឡើង បើប្រៀបធៀបទៅក្នុងទស្សវត្សឆ្នាំ១៩៩០ គឺនាពេលបច្ចុប្បន្ននេះពុំមានករណីចោរប្លន់ នោះឡើយ ។ លោកបានបន្តទៀតថា ដោយខេត្តសៀមរាប គឺជាតំបន់គោលដៅទេសចរណ៍ របស់ភ្ញៀវជាតិ អន្តរជាតិ ចូលមកទស្សនាកម្សាន្ត ហើយក៏ត្រូវបានប្រមុខរាជរដ្ឋាភិបាល បានយកចិត្តទុកដាក់ខ្ពស់ ព្រមទាំងបានផ្តល់ផ្លូវដ៏ស្រស់ ស្អាតចំនួន៣៨ខ្សែ ដល់ក្រុងសៀមរាប ក្នុងពេលដែលប្រទេសជាតិកំពុងជួបវិបត្តិជម្ងឺកូវិដ១៩ ។ លោកបានបន្តទៀតថា ដោយកត្តានេះហើយ គណៈបញ្ជាការឯកភាពរដ្ឋបាលខេត្តសៀមរាប បានយកចិត្តទុកដាក់ខ្ពស់លើការងារសន្តិសុខ សណ្តាប់ធ្នាប់ និង សុវត្ថិភាពជូនប្រជាពលរដ្ឋ និងភ្ញៀវទេសចរជាតិ អន្តរជាតិ ដែលបានមកស្នាក់នៅកម្សាន្ត ទស្សនានៅតាមប្រាង្គប្រាសាទបូរាណ និង រមណីយដ្ឋានធម្មជាតិក្នុងខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត ក៏បាន លើកផងដែរ អំពីលទ្ធផលដែលកងកម្លាំងនៃស្នងការដ្ឋាននគរបាលខេត្ត បានសហការល្អជាមួយស្នងការដ្ឋាននគរបាល ខេត្តកំពង់ធំ និង អធិការដ្ឋាននគរបាលក្រុងសៀមរាប និង ស្រុកមួយចំនួន ក្នុងការចុះធ្វើការស្រាវជ្រាវនូវមុខសញ្ញាយ៉ាងសកម្ម ក្នុងការលួចម៉ូតូនៅក្រុងសៀមរាប រហូតទទួលបានលទ្ធផល ដោយបានបំបែកនូវសំបុកចោរមួយក្រុម ដែលមានបក្ខពួក ០៩នាក់ ត្រូវបានឃាត់ខ្លួន ០៨នាក់ នៅទីកន្លែងផ្សេងគ្នា និង ម្នាក់ទៀតបានកំពុងរត់គេចខ្លួន ។ លោកក៏បានបញ្ជាក់ថា ករណីចោរឆក់ និង លួច បើធៀបពីឆ្នាំ២០២១ និងឆ្នាំ២០២២មានការថយចុះ ដោយកម្លាំងយើងបានធ្វើការល្បាតបានជាប្រចាំ ទាំងយប់ទាំងថ្ងៃក្នុងក្រុងនិងតាមមូលដ្ឋាន សំខាន់នៅក្នុងតំបន់រមណីយដ្ឋាននានា ព្រមទាំងបានកំណត់និងគ្រប់គ្រងនូវមុខសញ្ញាជនបង្ក ដែលទើបចេញពីមណ្ឌលកែប្រែ ព្រមទាំងដោយមានការចូលរួមពីប្រជាពលរដ្ឋ និង ស្ថាប័នពាក់ព័ន្ធ បានចូលរួមអនុវត្តលើ ផែនសន្តិសុខ ព្រមទាំងបានប្រើប្រាស់វិធានការជំនាញច្បាស់លាល់ ។ ក្នុងនោះលោកស្នងការរង ក៏បានលើកនូវវិធានការមួយចំនួន ជូនដល់ប្រជាពលរដ្ឋ និង គ្រប់ស្ថាប័ន ចូលរួមទាំងអស់គ្នាអនុវត្ត ដែលជាគោលការចំបង ដើមី្បកាត់បន្ថយនូវរាល់បទល្មើស ព្រមទាំងត្រូវ លុបបំបាត់នូវបទល្មើសដែលបង្កឡើងដោយខ្លួនឯង ដែលធ្វើឲ្យបំពុលដល់សង្គម ។ ម៉្យាងទៀត ក៏ត្រូវចូលរួមទាំងអស់គ្នា ក្នុងការការពារទ្រព្យសម្បត្តិរបស់ខ្លួន និង ផ្តល់ព័ត៌មានដល់អាជ្ញាធរមូលដ្ឋាន ហើយចំពោះជនដែលប្រព្រឹត្តបទល្មើសនឹងត្រូវ ទទួលទោសទៅតាមច្បាប់ ។
ក្នុងឱកាសនោះដែរបងប្អូនប្រជាពលរដ្ឋ ដែលរងគ្រោះបាត់ម៉ូតូ ដោយក្រុមជនសង្ស័យទាំង០៨នាក់ លួចយកកន្លងមក នៅក្នុងភូមិសាស្ត្រខេត្តសៀមរាប ត្រូវបានលោកវរសេនីយ៍ឯក ដា ចំរើន អធិការក្រុងសៀមរាប ធ្វើការប្រគល់ជូនបងប្អូន ព្រមទាំងអំពាវ នាវដល់បងប្អូនដែលបាត់ម៉ូតូ មកពិនិត្យមើលម៉ូតូរបស់ខ្លួន នៅអធិការដ្ឋាននគរបាលក្រុងសៀមរាបផងដែរ ។
សូមបញ្ជាក់ថា ក្រោយពីសមត្ថកិច្ចជំនាញបានធ្វើតេស្ត៍រកសារធាតុញៀនលើជនសង័្សយទាំង០៨នាក់ បានរកឃើញ មាន វិជ្ជមាន សារធាតុញៀន ហើយត្រូវបានសមត្ថកិច្ចជំនាញរៀបចំកសាងសំណុំរឿងបញ្ជូនទៅសាលាដំបូងខេត្ត ចាត់ការ ទៅតាមនីតិវិធីច្បាប់ ៕
ដោយ ÷ ពន្លឺ
