ខេត្តសៀមរាប ÷ វេលាម៉ោង ៨និង៣០នាទីព្រឹកនៅថ្ងៃទី ២៨ ខែមករា ឆ្នាំ ២០២៣ ស្ថិតនៅភូមិថ្មី សង្កាត់ស្វាយដង្គំ ក្រុង/ខេត្តសៀមរាប មានករណីគ្រោះថ្នាក់ចរាចរណ៍មួយ ដោយរថយន្តដឹកដី បានថយក្រោយ កិនកូនក្មេង បណ្ដាលឲ្យបែកក្បាលចេញខួរស្លាប់ភ្លាម ៗនៅនិងកន្លែង បង្កការភ្ញាក់ផ្អើល រួចហើយអ្នកបើក បរបានចុះពីរថយន្តគេចខ្លួនបាត់ស្រមោល។
តាមប្រភពពីសមត្ថកិច្ចបានឲ្យថា ក្មេងរងគ្រោះឈ្មោះ សួរ គឹមស្រៀង ភេទប្រុសអាយុ ១ខួប១ខែ ឪពុក ឈ្មោះ យិម គឹមសួរ ភេទប្រុស អាយុ ៣៥ ឆ្នាំ ម្ដាយឈ្មោះ លៀង វណ្ណា ភេទ ស្រី អាយុ ៣៧ ឆ្នាំមុខរបរនៅផ្ទះ ស្នាក់នៅ បន្ទប់ជួល ជិតកន្លែងបូមខ្យល់រថយន្ត ហើយកំពុងរត់លេងស្រាប់តែរថយន្តដឹកដីដែលចូលបាញ់អ៊ែ ហើយបានថយក្រោយកិនក្មេងនោះស្លាប់តែម្តង។ ក្រោយកើតហេតុអ្នកបើកបររថយន្តបានគេចខ្លួនបាត់តែម្តង ។ សូមបញ្ជាក់ថា ក្មេងរងគ្រោះពុំទាន់បានធ្វើសំបុត្រកំណើត ។ ក្នុងករណីនេះ គឺបណ្តាលពីការធ្វេសប្រហែសរបស់ឪពុកម្តាយ និង មុនឡើងបើកបររថយន្ត ម្ចាស់រថយន្តមិនបានធ្វើការត្រួតពិនិត្យរថយន្តជាមុនចេញដំណើរ ។
ក្រោយកើតហេតុ ជំនាញការិយាល័យនគរបាលចរាចរណ៍ផ្លូវគោក បានចុះមកវាស់វែងនិងចាត់ការតាមនីតិវិធីច្បាប់ ។ បច្ចុប្បន្ន កម្លាំងនគរបាលការិយា ល័យជំនាញ បានប្រគល់សាកសព ជូនក្រុមគ្រួសារ យកទៅធ្វើបុណ្យតាមប្រពៃណី។ ចំណែក វត្ថុតាងបានយកទៅរក្សាទុកនៅក្នុងបរិវេណស្នងការដ្ឋាននគរបាលខេត្តសៀមរាប ដើមី្បរង់ចាំដោះស្រាយតាមផ្លូវច្បាប់ ៕
ដោយ ÷ ពន្លឺ
