កិច្ចប្រជុំត្រៀមរៀបចំព្រឹត្តិការណ៍រត់ប្រណាំងចម្ងាយឆ្ងាយ នៅតំបន់អង្គរ លើកទី០៦ ឆ្នាំ២០២៣

ខេត្តសៀមរាប ÷ រដ្ឋបាលខេត្តសៀមរាបនាព្រឹកថ្ងៃទី២៧ ខែមករា ឆ្នាំ២០២៣ នេះបានបើកិច្ចប្រជុំត្រៀមរៀបចំព្រឹត្តិការណ៍រត់ប្រណាំងចម្ងាយឆ្ងាយ នៅតំបន់អង្គរ លើកទី០៦ ឆ្នាំ២០២៣ ដែលដឹកនាំកិច្ចប្រជុំដោយ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិ អូឡាំពិកកម្ពុជា និងលោក យុន លីនណេ អភិបាលរង នៃគណៈអភិបាលខេត្តសៀមរាប ព្រមទាំងមានការអញ្ជើញចូលរួមពីសំណាក់តំណាងអាជ្ញាធរជាតិអប្សារា.គ្រឹះស្ថានអង្គរ.សហភាពសហព័ន្ធយុវជនកម្ពុជាខេត្តសៀមរាប .ស្នងការនគរបាលខេត្ត. មន្ទីរអង្គភាពជុំវិញខេត្តដែលមានពាក់ព័ន្ធអញ្ជើញចូលរួមផងដែរ។

ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ អូឡាំពិកកម្ពុជា បានមានប្រសាសន៍ថា ព្រឹត្តិ ការណ៍នេះ រៀបចំឡើង ក្រោមកិច្ចសហការ រវាងគណៈកម្មាធិការជាតិអូឡាំពិកកម្ពុជា និងក្រុមហ៊ុន Phoenix Voyage ដោយចាប់ផ្ដើមកម្មវិធីរត់ នៅម៉ោង ៤ភ្លឺ ក្នុងថ្ងៃទី០៤ខែមកុម្ភៈ ឆ្នាំ២០២៣ខាងមុខនេះ ដោយក្នុងនោះមានកីឡាករ កីឡាការនីចូលរួម ចំនួនប្រមាណជាង៩០០នាក់មកពី៣៩ប្រទេស លើពិភពលោកដែលបែងចែកចេញជា៦វិញ្ញាសារ ដោយក្នុងនោះមានវិញ្ញាសារត់ចម្ងាយចំនួន១០០គីឡូម៉ែត្រ .ចម្ងាយ៦៤គីឡូម៉ែត្រ.៤២គីឡូម៉ែត្រ.៣២គីឡូម៉ែត្រ.១៦គីឡូម៉ែត្រ និង៨គីឡូម៉ែត្រ ដែលត្រូវចេញដំណើរ ជាបន្ដបន្ទាប់ ហើយកីឡាករ -កីឡាការិនីម្នាក់ៗ អាចចំណាយពេលវេលា ដើម្បីរត់កាត់វាលស្រែ ផ្លូវលំ ផ្លូវព្រៃជុំវិញតំបន់អង្គរ ដោយគ្មានការឈប់សម្រាកឡើយ។

ឯកឧត្តម វ៉ាត់ ចំរើន បានបន្ថែមថាការរៀបចំព្រឹត្តិ ការណ៍ រត់ចម្ងាយឆ្ងាយ លើកទី៦លើទឹកដីអង្គរនេះ គឺជាកីឡាបែបទេសចរណ៍ ដោយផ្ដោតលើគោល បំណងសំខាន់ គឺផ្សព្វផ្សាយឲ្យ បណ្ដាប្រទេស លើពិភពលោក ពិសេសភ្ញៀវទេសចរ ជិត៤០ ប្រទេសដែលបានមកចូលរួម និងបានដឹងពីស្ថេរភាព សន្ដិភាព និងការអភិវឌ្ឍលើគ្រប់វិស័យ ក្នុងប្រទេសកម្ពុជា ក៏ដូចជាផ្សព្វផ្សាយ និងចូលរួមថែរក្សា គោលដៅទេសចរណ៍ ប្រវត្ដិសាស្ដ្ររបស់កម្ពុជា គឺតំបន់អង្គរ ខេត្តសៀមរាប។ ហើយក៏ជាចូលរួមចំណែកក្នុងការស្វែងរកមូលនិធិ សម្រាប់ជួយដល់ការងារមនុស្សធម៌តាមអង្គការ និងមន្ទីរពេទ្យមួយចំនួន ព្រមទាំងមានការទាក់ទាញភ្ញៀវទេសចរណ៏ ឱ្យកាន់តែច្រើនផង ដែរ។

ក្នុងនាមអាជ្ញាធរខេត្តសៀមរាប លោក យុន លីណេ អភិបាលរងខេត្តសៀមរាប បានមានប្រសាសន៍ណែ នាំ ដល់រដ្ឋបាលក្រុងស្រុកដែលមានភូមិសាស្រ្តជាប់ពាក់ព័ន្ធ រួមទាំងកងកម្លាំងទាំង៣ប្រភេទ និងមន្ទីរអង្គភាព ត្រូវរួមសហការចាត់ចែងរៀបចំផែនការការពារសន្តិសុខ សុវត្ថិភាព សណ្ដាប់ធ្នាប់សាធារណៈ តាមគោលដៅដែលកីឡាករ កីឡាការនីទាំងអស់ ដែលបានចូលរួមក្នុងព្រឹត្តិការណ៍នោះផងដែរ ។ ម៉្យាងទៀតសមត្ថកិច្ចគ្រប់ជាន់ថ្នាក់ ត្រូវយកចិត្តទុកដាក់ខ្ពស់ក្នុងការរៀបចំ ដើម្បីរក្សាបាននូវសណ្តាប់ធ្នាប់ របៀបរៀបរយ និងសុវត្ថិភាព សេចក្តីថ្លៃថ្នូរ ចៀសវាងនូវបញ្ហាកើតឡើងជាយថាហេតុ ។ ត្រូវជំរុញឱ្យប្រជាពលរដ្ឋនិងអ្នកចូលរួមព្រឹត្តិការណ៍ទាំងអស់ត្រូវរក្សាអនាម័យ បរិស្ថាន និងសូមណែនាំដល់ ប្រជាពលរដ្ឋខ្មែរ នៅតំបន់អង្គរនិងតំបន់ដែលកីឡាករ កីឡាការនី ឆ្លងកាត់ ត្រូវចូលរួមអបអរសាទរ ការរត់របស់កីឡាករ- កីឡាការិនីជាតិ និងអន្ដរជាតិ ដើម្បីជំរុញព្រឹត្តិការណ៍មួយនេះ ឲ្យកាន់តែទទួលបាន ជោគជ័យទៀតផងដែរ ៕

ដោយ ÷ ពន្លឺ