មាតា បិតា សិស្ស ប្រតិកម្មទៅលើនាយកវិទ្យាល័យសម្ដេចតេជោហ៊ុនសែនសំពៅលូន ស្រុកសំពៅលូន ដែលឈូសសក់ក្បាលសិស្ស កែលែងកើត

ខេត្តបាត់ដំបង ÷ ថ្មីៗនេះ មានការរិះគន់យ៉ាងខ្លាំងក្នុងបណ្តាញសង្គម បន្ទាប់ពីមានការបង្ហោះនូវរូបភាពមួយចំនួនស្តីពីទង្វើរបស់លោកនាយកសាលា ដែលបានប្រើប្រាស់កន្ត្រៃ ឬត្រង់ដឺ ឈូសសក់ក្បាលសិស្សប្រុសៗដល់លលាដ៏កែលែងឡើង។

បើតាមការពិនិត្យទៅលើផេករបស់សាលាវិទ្យាល័យ សម្តេចតេជោ ហ៊ុន សែន សំពៅលូន បានតម្រូវអោយសិស្សចាប់ពីថ្នាក់ទី១០ ដល់ថ្នាក់ទី១២ ត្រូវកាត់សក់អោយខ្លី (ដូចប៉េអឹម ឬ ពីឡុត) បើមិនដូច្នោះទេ សាលានឹងមានវិធានការ ទៅតាមបទបញ្ជាផ្ទៃក្នុងរបស់សាលា។

ស្រាប់តែនៅថ្ងៃទី២៣ ខែមករា ឆ្នាំ២០២៣ ម្សិលមិញនេះ លោកនាយកសាលា ប៊ុន ណា បានចូលទៅតាមថ្នាក់រៀនដោយបានប្រើប្រាស់ត្រង់ដឺឈូសសក់ក្បាលសិស្សប្រុសៗ ស្ទើរគ្រប់គ្នា ដែលឲ្យមជ្ឈដ្ឋានជាច្រើន ពិសេសគឺអាណាព្យាបាលសិស្ស ប្រតិកម្មយ៉ាងខ្លាំង ព្រោះបើទោះបីជាកូនៗរបស់គាត់ទៅអោយជាងកែក៏កែលែងកើតដែរ រហូតខ្លះត្រូវកោរត្រងោលតែម្តង។

នៅរសៀលថ្ងៃទី២៤ ខែមករា ឆ្នាំ២០២៣ នេះ អ្នកយកព័ត៌មានយើង បានទូរស័ព្ទទៅលោកនាយកសាលា លោក ប៊ុន ណា ដើម្បីសុំការបំភ្លឺ ជុំវិញករណីនេះ តែពុំមានអ្នកលើកទូរស័ព្ទឡើយ ដោយឡែកលោក ហម សំខាន់ អភិបាលស្រុកសំពៅលូន បានបញ្ជាក់ថា លោកទើបតែទទួលបាននូវរឿងនេះ ដោយ សារតែលោកនាយកសាលា ចែងបទបញ្ជាផ្ទៃក្នុងមិនមានចម្លងជូនទៅរដ្ឋបាលស្រុកឡើយ ដូច្នេះទើបលោកចាត់អោយការិយាល័យអប់រំស្រុកចុះទៅសិក្សាក្នុងរឿងនេះ ហើយលោកក៏ចង់ដឹងដែរថា តើបទបញ្ជាផ្ទៃក្នុងរបស់សាលាមានប៉ុន្មានចំណុច ? និយាយអំពីអ្វីខ្លះ ? ហើយការកំណត់អោយសិស្សកាត់សក់ កម្រិតត្រឹម ណា?៕

ដោយ ÷ គង់ សឿន