ពិធីសម្ពោធដាក់ឲ្យប្រើប្រាស់ជាផ្លូវការអគារអង្គភាពនគរបាលការពារបេតិកភណ្ឌប្រចាំតំបន់អង្គរ 

ខេត្តសៀមរាប ÷ អគារអង្គភាពនគរបាលការពារបេតិកភណ្ឌប្រចាំតំបន់អង្គរ ស្ថិតនៅភូមិគោកតាចាន់ សង្កាត់គោកចក ក្រុងសៀមរាប ត្រូវបានសម្ពោធកាត់ខ្សែបូរ ដាក់ឲ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់សម្តេចក្រឡាហោម ស ខេង នាយករដ្ឋមន្ត្រីស្តីទី នៅព្រឹកថ្ងៃទី១៧ ខែមករា ឆ្នាំ២០២៣ ដោយមានការអញ្ជើញអមដំណើរសម្តេចក្រឡាហោម ក្នុងពិធីនោះមានវត្តមានរស់ លោកជំទាវបណ្ឌិត សភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងថ្នាក់ដឹកនាំក្រសួងមហាផ្ទៃ អាជ្ញាធរជាតិអប្សរា រដ្ឋបាល ខេត្តសៀមរាប និងអង្គភាពពាក់ព័ន្ធ មន្ត្រីរាជការ ព្រមទាំងមន្ត្រីនគរបាលជាច្រើនរូបទៀត ។

ថ្លែងក្នុងកិច្ចស្វាគមន៍នោះដែរ លោកជំទាវបណ្ឌិត សភាចារ្យ ភឿង សកុណា បានអោយដឹងថា ទីតាំងថ្មីនៃអង្គភាពនគរបាលការពារបេតិកភណ្ឌប្រចាំតំបន់អង្គរនេះ ត្រូវបានសង់ឡើងនៅលើដីដែលមានផ្ទៃក្រឡាសរុបចំនួន ១៩.៩៤៧ ម៉ែត្រក្រឡា ក្នុងនោះហេដ្ឋារចនាសម្ព័ន្ធនានានៃអគារនិងទីតាំងប្រើប្រាស់ចាំបាច់មានចំនួន១៦ ប្រភេទ មានទំហំសរុបចំនួន ១.៧០៨ ម៉ែត្រក្រឡា។ ទីតាំងខាងលើនេះ សាងសង់ដោយក្រុមហ៊ុន ប៊ី ប៊ី្រលលាន ប៊ីលឌើរ ក្នុងតម្លៃសរុបចំនួន ៧.១៩៨.០០០.០០០រៀល (ប្រាំពីរប៊ីលាន មួយរយកៅសិបប្រាំបីលានរៀលគត់) តាមរយៈថវិកាបានមកពីមូលនិធិអភិរក្ស និងអភិវឌ្ឍន៍តំបន់អង្គរ ឆ្នាំ២០១៨នៃអាជ្ញាធរជាតិអប្សរា ដែលសាងសង់មានរយៈពេល២៤ខែ ។ សំណង់នេះ គឺជាសមិទ្ធផលសំខាន់មួយទៀត កើតចេញពីកិច្ចខិតខំប្រឹងប្រែងរួមគ្នា រវាងអាជ្ញាធរជាតិអប្សរា និងអង្គភាពនគរបាលការពារបេតិកភណ្ឌ ក្រោមការគាំទ្ររបស់អគ្គស្នងការដ្ឋាននគរបាលជាតិ អាជ្ញាធរដែនដីខេត្តសៀមរាប ក្រសួងសេដ្ឋកិច្ចនិងហិរញ្ញវត្ថុ និងក្រសួង/ស្ថាប័នពាក់ព័ន្ធ ជាច្រើនទៀត ក្នុងកិច្ចអភិរក្ស និងអភិវឌ្ឍន៍រមណីយដ្ឋានអង្គរដោយចីរភាពសំដៅ កែលម្អឡើងវិញនិងពង្រីក ទេសភាពបៃតងដើម្បីលើកតម្លៃបន្ថែមដល់ភាពលេចធ្លោជាសកលនៃរមណីយដ្ឋានអង្គរ។

ក្នុងឱកាសនោះដែរ សម្តេចក្រឡាហោម ស ខេង នាយករដ្ឋមន្ត្រីស្តីទី ក៏បានមានប្រសាសន៍កោតសរសើរ និងថ្លែងអំណរគុណចំពោះកិច្ចខិតខំប្រឹងប្រែងរបស់អាជ្ញាធរជាតិអប្សរាក្នុងការជម្រុញ និងផ្តួចផ្តើមគំនិតនូវការ ស្នើផ្លាស់ប្តូរទីតាំងស្នាក់ការចាស់ របស់អង្គភាពនគរបាលការពារបេតិកភណ្ឌ ដែលមានសភាពទ្រុឌទ្រោម មិនរៀបរយ សាងសង់នៅកៀកជិតប្រាសាទអង្គរវត្ត អាចនឹងប៉ះពាល់ដល់ស្រទាប់បុរាណវិទ្យានៅក្រោមដី។ សម្តេចក្រឡាហោមបានមានប្រសាសន៍បន្តទៀតថាអគារថ្មីរបស់អង្គភាពនគរបាលការពារបេតិកភណ្ឌ មានភាពស្រស់ស្អាត តាមរចនាបថ តាមទម្រង់ស្ថាបត្យកម្មខ្មែរ សាមញ្ញ បង្កប់នូវភាពថ្លៃថ្នូរ ស័ក្តិសមជាសមិទ្ធផលថ្មី នៃអត្តសញ្ញាណជាតិ ដែលនឹងជួយបង្កើនសោភណ្ឌភាពរមណីយដ្ឋានអង្គរ ផ្តល់ភាពងាយស្រួលក្នុងការបំពេញតួនាទីភារកិច្ចនិងផាសុកភាព ជូនកម្លាំងអង្គភាពនគរបាលការពារបេតិកភណ្ឌ ក្នុងការថែរក្សា ការពារ រមណីយដ្ឋានអង្គរដែលជាមរតកដូនតាមានតម្លៃមិនអាចកាត់ថ្លៃបានរបស់ជាតិ និងប្រជាជនកម្ពុជា។ ក្នុងន័យនេះផងដែរ សម្តេចក្រឡាហោមក៏បានផ្តល់អនុសាសន៍ណែនាំមួយចំនួនជូនអាជ្ញាធរខេត្តសៀមរាប អង្គភាពនគរបាលការពារបេតិកភណ្ឌប្រចាំតំបន់អង្គរ និងអាជ្ញាធរជាតិអប្សរា ដើម្បីពង្រឹងប្រសិទ្ធភាព និងភាពរលូននៃកិច្ចសហការការងារ មួយចំនួន គឺត្រូវបន្តសហការជិតស្និទ្ធ ជាមួយអាជ្ញាធរជាតិអប្សរា ក្នុងកិច្ចការថែរក្សា ការពារបេតិកភណ្ឌជាតិ ក្នុងរមណីយដ្ឋានអង្គរ និងខេត្តសៀមរាប ជាពិសេសកិច្ចការស្រាវជ្រាវ និងអនុវត្តវិធានការឱ្យបាន ជាដាច់ខាត ក្នុងការបង្ការទប់ស្កាត់ និងបង្រ្កាបរាល់អំពើល្មើសច្បាប់ ការបំផ្លិចបំផ្លាញ ការជីកកកាយវត្ថុបុរាណ ការកាប់បំផ្លាញព្រៃឈើ ការលួចលាក់ ប្លន់ ការទិញ លក់ និងការដឹកជញ្ជូនបេតិកភណ្ឌសម្បត្តិវប្បធម៌ប្រវត្តិសាស្រ្តដែលជាភារកិច្ចចម្បងរបស់ខ្លួន ។ អង្គភាពនគរបាលការពារបេតិកភណ្ឌត្រូវពិនិត្យ រៀបចំកំណត់ទីតាំងឈរជើងការពារ អាទិភាពជាថ្មី និងការចល័តយាមល្បាតជាអចិន្ត្រៃយ៍ ជាពិសេសនៅពេលយប់ តាមចំណុចសំខាន់ៗនៃតំបន់រមណីយដ្ឋានអង្គរ និងតំបន់ពាក់ព័ន្ធផ្សេងទៀត។ ត្រូវបង្កើនការអប់រំពង្រឹងសីលធម៌ វិន័យកងកម្លាំង និងមនសិការវិជ្ជាជីវៈស្រលាញ់បេតិកភណ្ឌវប្បធម៌ជាតិសំដៅបង្ការ និងកាត់បន្ថយឲ្យបាន ដាច់ខាតនូវអំពើអនាធិបតេយ្យនានា ក្នុងតំបន់រមណីយដ្ឋានអង្គរ និងតំបន់ផ្សេងៗទៀត តាមរយៈការអនុវត្តនូវវិន័យច្បាស់លាស់ព្រមទាំងវិធានការច្បាប់នានាប្រកបដោយតម្លាភាព និងយុត្តិធម៌ជាដាច់ខាត និងត្រូវបន្តពង្រឹងកិច្ចសហការជាមួយកម្លាំងមានសមត្ថកិច្ច និងអាជ្ញាធរដែនដីគ្រប់លំដាប់ថ្នាក់ក្នុងកិច្ចការពារសុវត្ថិភាព សន្តិសុខ និងរក្សារបៀបរៀបរយ សណ្តាប់ធ្នាប់សាធារណៈ ជាពិសេសកិច្ចការពារសុវត្ថិភាព សន្តិសុខភ្ញៀវជាតិ និងអន្តរជាតិ ដែលមកបំពេញបេសកកម្ម ធ្វើទស្សនកិច្ច ឬធ្វើទេសចរណ៍ ក្នុងតំបន់រមណីយដ្ឋានអង្គរ សៀមរាប និងតំបន់ផ្សេងៗ។ ម៉្យាងទៀតអាជ្ញាធរខេត្តសៀមរាប អាជ្ញាធរជាតិអប្សរាអង្គភាពនគរបាលការពារបេតិកភណ្ឌ និងស្ថាប័នពាក់ព័ន្ធ ត្រូវបន្តខិតខំថែរក្សាបរិស្ថានធម្មជាតិដែលជាផ្នែកមួយនៃទេសភាព វប្បធម៌របស់រមណីយដ្ឋានអង្គរ តាមរយៈការដាំដើមឈើឡើងវិញបង្កើនភាពបៃតង បន្តស្តារប្រព័ន្ធធារាសាស្រ្តបុរាណ ដើម្បីពង្រឹងកិច្ចការអភិរក្សក៏ដូចជាបង្កើតបាននូវផាសុកភាពសម្រាប់ប្រជាពលរដ្ឋ ភ្ញៀវទេសចរជាតិ និងអន្តរជាតិលំហែ និងកំសាន្ត និងត្រូវបន្តចូលរួមនិង ទំនាក់ទំនងជាមួយអង្គការយូណេស្កូ និងអង្គការអន្តរ ជាតិនានា ដើម្បីទទួលការណែនាំ និងការផ្សព្វផ្សាយគោលការណ៍ផ្សេងៗ សំដៅបម្រើឲ្យការងារការពារបេតិកភណ្ឌវប្បធម៌។

ក្នុងឱកាសនោះ សម្តេចក្រឡាហោម ស ខេង បានផ្តល់ជាអំណោយដល់កម្លាំងនគរបាល ការពារបេតិកភណ្ឌ នូវប៉ុស្តិ៍យាមប្រចាំការតាមគោលដៅចំនួន១០ ទោចក្រយានយន្តចំនួន២០គ្រឿង សម្រាប់កងកម្លាំងជិះល្បាតក្នុងតំបន់អង្គរ ។ ក្នុងនោះ ឯកឧត្តម នាយឧត្តមសេនីយ៍ សន្តិបណ្ឌិត នេត សារឿន អគ្គស្នងការនគរបាលជាតិ បានផ្តល់ជាអំណោយនូវ ទោចក្រយាន ចំនួន៥០គ្រឿង និងអាវយឺត ចំនួន៥០០អាវ សម្រាប់កងកម្លាំងជិះល្បាតក្នុងតំបន់អង្គរនោះផងដែរ ៕

ដោយ ÷ ពន្លឺ