កិច្ចប្រជុំបូកសរុបការងារចលនាយុវជនកម្ពុជា ក្រុម១៥៧សាខាខេត្តសៀមរាប ប្រចាំឆ្នាំ២០២២

ខេត្តសៀមរាប ÷ នៅចុងសប្តាហ៍ថ្ងៃទី ១៥ ខែ មករា ឆ្នាំ២០២៣ នៅទីស្នាក់ការសាខា សមាគមចលនាយុវជនកម្ពុជាក្រុម១៥៧ ខេត្តសៀមរាប មានបើកកិច្ចប្រជុំបូកសរុបការងារសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប ឆ្នាំ២០២២ និង លើកទិសដៅអនុវត្តបន្តឆ្នាំ២០២៣ និងការប្រកាសតែងតាំងសមាជិកថ្មី ក្រោមអធិបតីភាពរបស់លោក ហ៊ុន  ប៉ូគា ប្រធានសមាគមចលនាយុវជនកម្ពុជា ក្រុម១៥៧សាខាខេត្តសៀមរាប ដោយមានការអញ្ជើញចូលរួមពីអស់លោក លោកស្រីជាប្រធាន អនុប្រធានសមាគមចលនាយុវជនកម្ពុជា ក្រុម១៥៧ ប្រចាំក្រុង ស្រុក ក្នុងខេត្តសៀមរាប ។

ឆ្លងតាមសេចក្តីរាយការណ៍របស់លោកប្រធាន សមាគមចលនាយុវជនកម្ពុជា ប្រចាំក្រុង ស្រុក ស្តីពីសកម្មភាពក្នុង ចលនាមនុស្សធ៌ម និងការងារសង្គម ដែលសមាគមចលនាយុវជនកម្ពុជា១៥៧ ក្រុង ស្រុក បានអនុវត្តប្រចាំឆ្នាំ២០២២ ដោយផ្តោត លើការចុះជួយសង្រ្គោះ និង ផ្តល់នូវស្បៀងអាហារ សម្ភារៈប្រើប្រាស់ដល់គ្រួសាររងគ្រោះ។  លទ្ធផលដែលសមាជិក សមាជិកានៃសមាគមចលនាយុវជនកម្ពុជា ១៥៧ បានចូលរួមយ៉ាងសកម្មនោះ លើការងារសង្គម និងការប្រយុទ្ធប្រឆាំងជម្ងឺកូវិដ១៩ និងការងារអប់រំសិក្សាក្នុងការបណ្តុះបណ្តាលធនធានមនុស្ស ។

មានប្រសាសន៍នោះដែរលោក ហ៊ុន ប៉ូគា ក៏បានធ្វើការកោតសរសើរ និងវាយតម្លៃខ្ពស់ទៅលើលទ្ធផលដែលនៅគ្រប់បណ្តាសមាគមចលនាយុវជនកម្ពុជា ក្រុម១៥៧ ប្រចាំក្រុង ស្រុក អនុវត្តបានក្នុងឆ្នាំ២០២២ ដែលបានគោរពទៅតាមគោលការណ៍របស់សមាគមចលនាយុវជនកម្ពុជា ក្រុម១៥៧ ដែលជាបន្ទាត់មួយសម្រាប់សមាជិកសមាជិកាយកទៅអនុវត្ត ប្រកប ដោយតម្លាភាព យុត្តិធម៌ មិនលំអៀងនោះឡើយ ។

លោកក៏បានគូសបញ្ជាក់ថា ការងារមនុស្សធម៌ និង ការងារសង្គម គឺជាភារកិច្ច ស្នូលរបស់សមាគមចលនាយុវជនកម្ពុជា ក្រុម១៥៧ ក្នុងពេលកន្លងមក រាល់សកម្មភាពទាំងឡាយដែលកើតមាននៅក្នុងខេត្តសៀមរាប សមាគមចលនាយុវជនកម្ពុជា ក្រុម១៥៧ ប្រចាំតាមបណ្តាក្រុង ស្រុក បានធ្វើកិច្ចសហការជាមួយអាជ្ញាធរមូលដ្ឋាន ព្រមទាំងកម្លាំងសហភាពសហព័ន្ធយុជនកម្ពុជា ខេត្ត ក្រុង ស្រុក ក្នុងការចុះជួយប្រជាពលរដ្ឋរងគ្រោះដោយគ្រោះទឹកជំនន់ បងប្អូនជួបការខ្វះខាតស្បៀងអាហារ និងគ្រួសាររស់នៅជាមួយមេរោគអេដស៍ ។  ក្នុងនោះដែរលោក ហ៊ុន ប៉ូគា ក៏បានធ្វើការជម្រុញដល់សមាគមចលនាយុវជនកម្ពុជាក្រុម១៥៧ ប្រចាំក្រុង ស្រុក ធ្វើការជ្រើសរើសសិស្សក្រីក្រ ដែលទើបប្រឡងជាប់សញ្ញាបត្រមធ្យមសិក្សាទុតិយភូមិ នៅក្នុងមូលដ្ឋានខ្លួន ដែលគ្មានលទ្ធភាពក្នុងការទៅរៀនបន្តនៅថ្នាក់ឧត្តមសិក្សានោះ សមាគមចលនាយុវជនកម្ពុជា១៥៧ មានអាហារូបករណ៍ជូនដល់ពួកគាត់ បានបន្តសិក្សានៅថ្នាក់ឧត្តមសិក្សានៅខេត្តសៀមរាប ។ ក្នុងនោះដែរលោកប្រធាន ក៏បានធ្វើការក្រើនរំលឹកដល់ អនុសាខានៅតាមបណ្តាក្រុង ស្រុក បង្កើនការពង្រីកនូវសមាជិករបស់ខ្លួន នៅតាមបណ្តាឃុំ សង្កាត់ ព្រមទាំងធ្វើការបណ្តុះបណ្តាលដល់សមាជិកខ្លួន ឲ្យស្គាល់ពីតួនាទី ភារកិច្ច របស់ខ្លួន ដើមី្បយកទៅបម្រើការងារស្នូលរបស់ខ្លួនឲ្យចំគោល ដៅមិនលំអៀង ព្រមទាំងត្រូវធ្វើការពង្រឹងផងដែរ អំពីរបបកិច្ចប្រជុំប្រចាំខែ ត្រីមា ឆមាស និង ឆ្នាំ និង ធ្វើរបាយការណ៍ឲ្យបានជាប្រចាំ អំពីសកម្មភាព លទ្ធផលការងារដែលអនុវត្តបានប្រចាំខែសំដៅធ្វើការវាយតម្លៃ លើកសរសើរ ដល់អង្គភាព និងបុគ្គលផងដែរ។ ក្នុងនោះដែរ លោកបានធ្វើការបកស្រាយបំភ្លឺ នូវរាល់សំណួរសំណូមពរ របស់លោក លោកស្រីប្រធាននៅតាមបណ្តាក្រុង ស្រុក ដែលបានលើកឡើង ព្រមទាំងបានដាក់នូវវិធានការ មួយចំនួនដល់សមាជិក សមាជិកាសមាគមចលនាយុវជនកម្ពុជាក្រុម១៥៧ ទាំងអស់ ដើមី្បបញ្ជៀសនូវរាល់ការភ័ន្តច្រឡំពីមហាជននៅក្នុងមូលដ្ឋាន មកលើសមាគមចលនាយុវជនកម្ពុជាក្រុម១៥៧ ។

ក្នុងពិធីបិទកិច្ចប្រជុំ លោកក៏បានធ្វើការផ្តាំផ្ញើ ដល់សមាជិកសមាជិកាទាំងអស់ ត្រូវយកចិត្តទុកដាក់ខ្ពស់ លើការងារស្នូលរបស់ខ្លួន ព្រមទាំងត្រូវសកម្មចូលរួមសហការជាមួយអាជ្ញាធរមូលដ្ឋាន និងសហភាពសហព័ន្ធយុវជនកម្ពុជាខេត្ត ក្នុងការរៀបចំនូវព្រឹត្តិការ ណ៍ធំៗនៅខេត្ត សំដៅស្តារនូវសេដ្ឋកិច្ចរបស់ប្រជាពលរដ្ឋ ក្រោយពីមានភាពធូស្រាលនៃជម្ងឺកូវិដ១៩ នៅកម្ពុជា និងត្រូវបន្តអនុវត្តវិធានការរបស់រាជរដ្ឋា ភិបាល ៣កុំ ៣ការពារ ទោះបីយើងបានទទួលចាក់វ៉ាក់សាំងគ្រប់ដូស ក៏ពិតមែន ត្រូវអញ្ជើញទៅចាក់វ៉ាក់សាំងនូវដូសបន្តបន្ទាប់ផងដែរ៕

ដោយ ÷ ពន្លឺ