ភ្នំពេញ ៖ នៅថ្ងៃនេះថ្ងៃពុធ ទី២៤ ខែតុលា ឆ្នាំ២០១៨ ក្រសួងមហាផ្ទៃ បានទម្លាយឯកសារចំណារបដិសេធរបស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដែលមិនឯកភាពចំពោះសំណើសុំដោះដូរទីតាំង អគារអគ្គស្នងការដ្ឋាននគរបាលជាតិ ពីសង្កាត់ទន្លេបាសាក់ ខណ្ឌចំការមន (អគារធ្វើការរាងថ្ងៃ) ទៅខណ្ឌដង្កោ រាជធានី ភ្នំពេញ ដែលចំណារបដិសេធនេះ បានធ្វើឡើងតាំងពីជិត១ឆ្នាំមុនមកម្ល៉េះគឺតាំងពីថ្ងៃទី១១ ខែមករា ឆ្នាំ២០១៨ មកម្ល៉េះ។
នាយឧត្តមសេនីយ៍ ខៀវ សុភ័គ នាយកខុទ្ទកាល័យ សម្តេចក្រឡាហោម ស ខេង បានបញ្ជាក់ប្រាប់ បណ្តាញសារព័ត៌មានក្នុងស្រុក ឱ្យដឹងនៅថ្ងៃទី២៤ ខែតុលា ឆ្នាំ២០១៨នេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានចារបដិសេធចំពោះសំណើរបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ ដែលស្នើសុំដោះដូរទីតាំងដី និងអគារ អគ្គស្នងការដ្ឋាន នគរ បាលជាតិ ទៅទីតាំងថ្មីដែលស្ថិតនៅខណ្ឌដង្កោនោះទេ ដែលចំណារនេះបានធ្វើឡើងតាំងពីថ្ងៃទី១១ ខែមករា ឆ្នាំ២០១៨ មកម្ល៉េះ។
បើតាមនាយកខុទ្ទកាល័យសម្តេចក្រឡាហោម ស ខេង, មូលហេតុដែលសម្តេចក្រឡាហោម ស ខេង មិនឯកភាពនឹងសំណើសុំដោះដូរទីតាំងអគារ អគ្គស្នងការដ្ឋាននគរបាលជាតិនាពេលនេះ ក៏ព្រោះតែ រដ្ឋមានដី និងថវិកាសម្រាប់ធ្វើកន្លែងថ្មីរួចហើយ។
ការបង្ហាញឯកសារចំណារបដិសេធរបស់សម្តេចក្រឡាហោម ស ខេង បានធ្វើឡើងបន្ទាប់ពីមាន បណ្តាញសង្គម និងសារព័ត៌មានមួយចំនួន នាពេលថ្មីៗនេះ បានយកសំណើរបស់ អគ្គស្នងការ នគរបាល ជាតិ ទៅផ្សព្វផ្សាយថា រាជរដ្ឋាភិបាលបានសម្រេចដោះដូរទីតាំង អគ្គស្នងការដ្ឋាននគរបាលជាតិ តាមរយៈក្រុមហ៊ុនឯកជនមួយ (LONG MA INVEST AND REALESTATE Co., LTD)។
នាយឧត្តមសេនីយ៍ ខៀវ សុភ័គ បានចាត់ទុកថា ការទម្លាយឯកសារផ្ទៃក្នុងទៅផ្សព្វផ្សាយបំភ្លៃបែបនេះ ទំនងជាចេតនាមិនល្អណាមួយ ដើម្បីវាយប្រហារលើសម្តេចក្រឡាហោម ស ខេង ដែលកំពុងមានប្រជាប្រិយ៏ភាព និងជាអ្នកដឹកនាំដ៏ល្អមួយរូបក្នុងជួរគណៈបក្ស និងរាជរដ្ឋាភិបាលកម្ពុជា។
សូមបញ្ជាក់ថា នាយឧត្តមសេនីយ៍ នេត សាវឿន អគ្គស្នងការនគបាលជាតិ កាលពីខែធ្នូ ឆ្នាំ២០១៧ កន្លងទៅ បានស្នើសុំគោលការណ៍ពីសម្តេចក្រឡាហោម ស ខេង ដើម្បីពិនិត្យ និងសម្រេច ចំពោះការ ដោះដូរទីតាំង អគ្គស្នងការដ្ឋាននគរបាលជាតិ ដែលស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដើម្បីទៅសាងសង់អគារថ្មី រសង្កាត់ដង្កោ ខណ្ឌដង្កោ រាជធានីភ្នំពេញ ។
បើតាមលិខិតរបស់ នាយឧត្តមសេនីយ៍ នេត សាវឿន ការស្នើផ្លាស់ប្តូរទីតាំងនេះ ដោយសារតែទីតាំង ចាស់ទ្រុឌទ្រោម តូចចង្អៀត ស្របពេលដែលកម្លាំងនគរបាល បច្ចុប្បន្នមានចំនួនកើនឡើង៕
ដោយ ៖ វិចិត្រ
