ខេត្តសៀមរាប ÷ កាលពីវេលាម៉ោង ១០និង៣០នាទី ព្រឹកថ្ងៃទី ០៧ ខែ មករា ឆ្នាំ២០២៣ មានករណីឆ្លងចរន្តអគ្គិសនី កន្លែងជួសជុល ទិញ លក់ម៉ូតូគ្រប់ប្រភេទ ដែលមានយីហោ ( ជាង ពេជ្រ) ស្ថិតនៅក្នុងភូមិវិហារចិន សង្កាត់ស្វាយដង្គំ ក្រុង ខេត្តសៀមរាប បានបណ្តាលឲ្យឆេះខូចខាតម៉ូតូធុនធំ ចំនួន ៤គ្រឿ របួសស្រាលមនុស្ស៣នាក់ និង បានជួយសង្គ្រោះម៉ូតូធុនធំ បានជាច្រើនគ្រឿងផងដែរ ។
នៅក្នុងហេតុការណ៍អគ្គីភ័យនេះ ក៏មានវត្តមានរបស់លោកឧត្តមសេនីយ៍ត្រី ជឹម សាវណ្ណ ស្នងការរងនគរបាលខេត្ត ទទួលបន្ទុកផ្នែកចរាចរណ៍ បានដឹកនាំកម្លាំងចុះជួយអន្តរាគមន៍ពន្លត់អគ្គីភ័យនេះ និង លោកប្រធានប៉ុស្តិ៍នគរបាលរដ្ឋបាលសង្កាត់ស្វាយដង្គំ រួមនឹងកម្លាំងអន្តរាគមន៍ស្នងការនគរបាលខេត្ត ដោយបានប្រើប្រាស់រថយន្ត អគ្គីភ័យ ចំនួន ៤គ្រឿង មានរថយន្តពន្លត់អគ្គីភ័យស្នងការនគរបាលខេត្ត និង អាជ្ញាធរជាតិអប្សរា ។
តាមសាកី្សនៅកន្លែងកើតហេតុ ដែលបានឃើញហេតុការណ៍ បានបញ្ជាក់ថា ក្នុងពេលខ្លួនកំពុងអង្គុយនៅខាងក្នុង កន្លែងជួសជុលម៉ូតូ ស្រាបតែឭសម្លេងផ្ទុះនៅកន្លែងព្រីភ្លើង ហើយមានអណ្តាតភ្លើងឆេះឆាបឡើងទៅលើម៉ូតូដែលកំពុងធ្វើ ការជួសជុល នឹងបានរាលដាលឆេះទៅម៉ូតូផ្សេងទៀតដែលធ្វើការជួសជុល ហើយម៉ូតូផ្សេងទៀតក៏ត្រូវបានអ្នកជិតខាងជួយ សង្រ្គោះចេញពីភ្លើង ហើយមួយចំនួនបានយកបំពង់ពន្លត់អគ្គីភ័យធ្វើការបាញ់ពន្លត់ភ្លើង បានរលត់ទៅវិញមុនរថយន្តពន្លត់អគ្គីភ័យមកដល់ ។ចំពោះអ្នករងរបួសទាំងបីនាក់នោះ ម្នាក់ត្រូវបានភ្លើងឆេះរោលរលាក និង ពល់ផ្សែងបំពង់ពន្លត់អគ្គីភ័យ ហើយត្រូវបាន ប្រជាពលរដ្ឋនាំយកទៅសង្រ្គោះនៅមន្ទីរពេទ្យ ។
តាមការបញ្ជាក់របស់សមត្ថកិច្ចនគរបាលជំនាញ ក្នុងករណីអគ្គីភ័យនេះ យើងមិនទាន់បានកំណត់ទៅលើករណីផ្ទុះ ឆេះនេះ នៅឡើយទេ ដោយបានកំពុងបន្តធ្វើការស្រាវជ្រាវផងដែរ ៕
ដោយ ÷ ពន្លឺ
