ខេត្តសៀមរាប ÷ នៅព្រឹកថ្ងៃទី៦ខែមករាឆ្នាំ២០២៣ នេះ សាលាវេសហ្គេតអន្តរជាតិ បានរៀបចំពិធីប្រគល់ប័ណ្ណសរសើរប្រចាំឆ្នាំសិក្សា២០២១-២០២២ ជូនដល់សិស្សានុសិស្សមធ្យមសិក្សាទុតិយភូមិ ជ័យលាភីនិទ្ទេស A វិញ្ញាបនបត្របណ្ដោះអាសន្នមធ្យមសិក្សា បឋមភូមិនិងចំណាត់ថ្នាក់ល្អដល់សិស្សចំនួន ៣២០នាក់ស្រី១៨០នាក់ ក្រោមអធិបតីភាព លោក អ៊ឹង គឹមលាង អភិបាលរងខេត្តសៀមរាបព្រមទាំង វត្តមានលោក លោកស្រី ប្រធានមន្ទីរ-អង្គភាព កម្លាំងប្រដាប់អាវុធ គណៈគ្រប់គ្រង លោកគ្រូ អ្នកគ្រូ មាតាបិតា អ្នកអាណាព្យាបាល និង សិស្សានុសិស្ស ជាច្រើនរយនាក់ចូលរួមផងដែរ។
តាមរបាយការណ៏របស់ លោក រ័ត្ន រស្មី នាយកគ្រប់គ្រងសាលាវេសហ្គេតអន្តរជាតិ បានបង្ហាញថា៖ ឆ្នាំសិក្សា២០២១-២០២២ កន្លងទៅនេះ គ្រប់សាខាទាំងអស់នៃសាលានេះ បានទទួល សិស្សានុសិស្សចុះឈ្មោះចូលរៀនក្នុងកម្មវិធីសិក្សាចំណេះទូទៅខេមរ ភាសា កម្មវិធីសិក្សាភាសាអង់គ្លេសពេញម៉ោង និងក្រៅម៉ោង ជាពិសេសកម្មវិធីចំនេះទូទៅ៣ភាសាក្នុងពេលតែ១ ដែលមានភាសាខ្មែរ អង់គ្លេស ចិន រាប់ចាប់ពីថ្នាក់មត្តេយ្យសិក្សា ដល់ថ្នាក់មធ្យមសិក្សា មានចំនួនសរុបប្រមាណ១.៩០០នាក់ ក្នុងនោះ សិស្សានុ សិស្ស ចូលរួមការប្រឡងសញ្ញាបត្រមធ្យមសិក្សាទុតិយភូមិ (ថ្នាក់ទី១២) មានចំនួន ៤៩នាក់ ទទួលជោគជ័យប្រមាណ ៩០ភាគរយ ដោយសិស្សជ័យលាភីនិទ្ទេស A ចំនួន ៤នាក់ផងដែរ។ ក្រៅពីការផ្តល់កំលំាងចិត្តតាមរយះប័ណ្ណសរសើរ សាលាក៏បានរៀបចំផ្ដល់រង្វាន់ និងអាហារូបករណ៏បន្ថែមដល់សិស្សឆ្នើម ជាពិសេសសិស្សជ័យលាភីនិទ្ទេស ដោយម្នាក់ៗទទួលបានកុំព្យូទ័រយួរដៃ១ម្នាក់ដើម្បីសម្រាប់ យកទៅប្រើនៅថ្នាក់ឧត្តមសិក្សារបស់ប្អូនៗ។
លោកនាយកសាលាក៍បានបញ្ជាក់ថា៖ក្រៅពីផ្តោតលើការបណ្តុះបណ្តាលចំណេះដឹង និងសមត្ថភាព សាលាក៏បានបញ្ចូលនូវមេរៀនបំនិនជីវិត (STEAM)ប្រចាំថ្ងៃដល់ពួកគេនិងបានយកចិត្តទុកដាក់វាយតម្លៃជ្រើសរើស និងសម្រិតសម្រាំង ដោយគោរពតាមគោលការណ៍ និងគរុកោសល្យអប់រំ ក្នុងការធានាគុណភាព និងទទួលបានគ្រូបង្រៀនមានបទពិសោធន៏ ដែលមានចិត្តគំនិតមោះមុត សម្រាប់បេសកម្មដុសខាត់ឱ្យមានធនធានមនុស្សប្រកបដោយចំណេះដឹង សមត្ថភាព ភាពក្លាហាន និងសេចក្តីគោរព ដោយសុជីវធម៌។
លោក រ័ត្ន រស្មី ក៍បានមានប្រសាសន៍បញ្ជាក់បន្ថែមទៀតថាចំពោះលទ្ធផលសិក្សា និងលទ្ធផលនៃការប្រលងកន្លងមកនេះ គឺមានផលប៉ះពាល់យ៉ាងខ្លាំងដោយជំងឺរាតត្បាតកូវីដ១៩ ដែលធ្វើឲ្យសាលាទាំងវិស័យសាធារណៈ និងឯកជនត្រូវបានបិទទ្វារមិនអនុញ្ញាតអោយចូលរៀននៅសាលាផ្ទាល់ ដោយក្នុងនោះសាលាវេសហ្គេតអន្តរជាតិបានរៀបចំផ្តល់ការសិក្សាអប់រំ ពីចំងាយ និងតាមប្រព័ន្ធអេឡិចត្រូនិចពីកំរិតមត្តេយ្យសិក្សាដល់កំរិតមធ្យមសិក្សា តាមការណែនាំរបស់ក្រសួងអប់រំយុវជន និងកីឡាកន្លងមកផងដែរ។
មានប្រសាសន៍សំណេះសំណាលក្នុងឱកាសនោះ លោក អ៊ឹង គឹមលាង អភិបាលរងខេត្តបានសម្តែងនូវការអបអរសាទរ ចំពោះលទ្ធផលសិក្សារបស់ក្មួយៗសិស្សានុសិស្សទាំងអស់ ដែលទទួលបានជ័យលាភីនិទ្ទេសA និងចំណាត់ថ្នាក់ល្អ ព្រមទាំង កោតសរសើរដល់គណៈគ្រប់គ្រងសាលា បុគ្គលិក ព្រមទាំងសហ ការី នៃសាលាវេសហ្គេតអន្តរជាតិទាំងអស់ ដែលបានចំណាយពេលវេលា និងការខិតខំប្រឹងប្រែងអស់ពីកម្លាំងកាយចិត្ត ដើម្បីផ្ទេរនូវចំណេះដឹង និងបទពិសោធន៍ល្អៗទៅឱ្យក្មួយៗ ទទួលបាននូវចំណេះដឹងប្រកបដោយគុណភាព ដែលទាំងអស់នេះបានបញ្ជាក់ពីការផ្សារភ្ជាប់រវាងកិច្ចអភិវឌ្ឍន៍សេដ្ឋកិច្ច សង្គមកិច្ច ការបម្រើសេវាសាធារណៈ និងប្រសិទ្ធភាព គុណភាព ស្តង់ដារអប់រំ ដែលអាចទទួលយកបានក្នុងស្ថានភាព នៃការរីកចម្រើនរបស់ពិភពលោកដែលយើងរស់នៅ។
លោក អ៊ឹង គឹមលាង ក៏បានមានប្រសាសន៍ថា៖កម្ពុជា មានចក្ខុវិស័យវែងឆ្ងាយដែលទាមទារឱ្យមានការអភិវឌ្ឍធនធានមនុស្សប្រកប ដោយគុណភាព សមត្ថភាព និងគុណធម៌ សម្រាប់ជាកត្តាគន្លឹះទ្រទ្រង់កំណើនសេដ្ឋកិច្ចជាតិ និងភាពប្រកួតប្រជែងរបស់ប្រទេស ទាំងពេលបច្ចុប្បន្ន និងសម្រាប់អនាគត ក្នុងការប្រែក្លាយប្រទេសឱ្យមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍនៅឆ្នាំ២០៥០។ លោក អភិបាលរងខេត្តបានបន្ថែមថា៖សិស្សានុសិស្ស ដែលអាចនឹងទទួលបានលទ្ធផលល្អ និងជោគជ័យក្នុងការសិក្សារបស់ខ្លួន គឺអាស្រ័យដោយកត្តា ៥យ៉ាង ដែលមិនត្រូវមើលរំលងបាននោះ គឺកត្តាមាតាបិតា .កត្តាសាលារៀន. កត្តាខ្លួនឯង .កត្តាគ្រូបង្រៀន៕
ដោយ ÷ ពន្លឺ
