ខេត្តក្រចេះ ៖ ប្រភពព័ត៍មានពីខេត្តក្រចេះបានអោយគេហទំព័រ រស្មីក្រុងយើងដឹងថានៅរៀងរាល់យប់ចាប់ពីម៉ោង១ដល់ ម៉ោង៥ទាបភ្លឺសកម្មភាពដឹកជញ្ជូនដឹកដូចហែរកឋិនគ្មានសមត្ថកិច្ចខាងណាចុះបង្ក្រាបឡើយគឺដេកចាំទទួលសំណូក។ នៅយប់ថ្ងៃទី១៣ ខែមករា ឆ្នាំ២០១៨ កន្លងទៅនេះ មានរថយន្តសាំយ៉ុងដឹកឈើគ្រប់ប្រភេទប្រមាណជាង៥០គ្រឿង និង គោយន្តកន្ត្រៃដឹកឈើជិត២០គ្រឿង និងម៉ូតូដឹកឈើប្រណិតប្រមាណជាង ១០០គ្រឿងបានធ្វើសកម្មភាពយ៉ាងគគ្រឹកគគ្រេងតាមបណ្តោយផ្លូវជាតិលេខ៧។
រថយន្តសាំយ៉ុងដឹកឈើយ៉ាងអាណាធិបតេយ្យធ្វើចរាចរណ៍រញ្ជួយតាមផ្លូវជាតិលេខ៧ ឆ្លងកាត់ស្រុកសំបូរបន្តឆ្លងកាត់មុខ ស្នាក់ការមេព្រៃសណ្ដាន់ មានលោកប៉ាល់ សុកែវ ជាប្រធាន ឆ្លងកាត់ស្នាក់ការមេព្រៃថ្មគ្រែ របស់លោក ម៉ី វុទ្ធី ឆ្លងកាត់ ស្នាក់ការកន្ទួតស្រុកចិត្តបុរី របស់ លោក ឃ្លាំង ណារត្ន័ បន្តឆ្លងកាត់ឃុំស្វាយជ្រះ គ្រប់គ្រងដោយលោក ស្រូយ ធី បន្តឆ្លង កាត់សួនអាពារហ៏ពិពាហ៏គ្រប់គ្រងដោយលោក សុខ គោ ថែមទាំងឆ្លងកាត់ឃុំថ្មពុក និងស្នាក់ការមេព្រៃស្រុកស្នួល គ្រប់គ្រងដោយលោក ឡាយ ធុច និងបន្តធ្វើដំណើរដោយរលូនចូលទៅលក់នៅប្រទេសវៀតណាម តាមច្រកអន្តរជាតិ ទ្វេភាគី ត្រពាំងស្រែ-វ៉ាលឺ ដោយគ្មានមន្ត្រីមានសមត្ថកិច្ចណាមួយចេញមកធ្វើការទប់ស្កាត់ ឬបង្ក្រាបនោះឡើយ។
ដោយឡែក នាយខណ្ឌរដ្ឋបាលព្រៃឈើខេត្តក្រចេះ លោក ទ្រី សុភ័ក្រ ដែលថ្នាក់លើទុកចិត្តប្រគល់ភារកិច្ចអោយទៅ បង្ក្រាបបទល្មើសព្រៃឈើនៅខេត្តក្រចេះ គឺប្រហែលត្រូវថ្នាំសណ្តំសំងំស្ងៀម បណ្តែតបណ្តោយឲ្យកូនចៅដែលជាមេព្រៃ មិនអនុវត្តនូវតួនាទីរបស់ខ្លួនដើម្បីការពារនិងអភិរក្សព្រៃឈើ ដែលរដ្ឋប្រគល់ឲ្យឡើយទោះបីរថយន្តដឹកឈើធំៗ ទាំងអស់នេះបានក្រឡាប់ចាក់ឈើចោលជាច្រើនដង ស្ទើរតែនៅមុខការិយាល័យមេព្រៃរបស់ខ្លួនគ្រប់គ្រងក៏នៅតែ មេព្រៃទាំងនេះមើលមិនឃើញដែរ។
ការដឹកជញ្ជូនឈើដូចហែរកឋិននៅតាមដងផ្លូវជាតិលេខ៧ ត្រូវបានគេអះអាងប្រាប់ថា ឈ្មួញដឹកឈើទាំងអស់ហ្នឹង មានអ្នកកាងរត់ការណ៍សម្របសំរួលបង់ប្រាក់អោយសមត្ថកិច្ចឈរជើងនៅតាមដងផ្លូវជាថ្នូរនិងការសំរបសំរួលដឹកឈើតាមផ្លូវជាតិដោយរលូន ខណៈពេលនេះគេក៏ស្គាល់អ្នករត់ការទាំងអស់នោះហើយដែរ ទី១.ឈ្មោះចែមុំកាងសាំយ៉ុងដឹកឈើ ចំនួន៨គ្រឿង ទី២.ឈ្មោះលោកឃ្នី អតីតអ្នកលក់សាច់ឆ្កែ រត់ការអោយរថយន្ដសាំយ៉ុងដឹកឈើចំនួន៨គ្រឿង ទី៣.ឈ្មោះចែអូន និងមានអ្នករត់ការជាច្រើននាក់ទៀត ។
តាមប្រភពអ្នករកស៊ីដឹកឈើទាំងអស់នេះបានអះអាងប្រាប់ គេហទំព័រ រស្មីក្រុងយើង ថាសមត្ថកិច្ចបានតំរូវឲ្យអ្នកដឹក ឈើតាមម៉ូតូបង់លុយក្នុងមួយម៉ូតូចាប់ពី ៣ម៉ឺនរៀលទៅ ៤ម៉ឺនរៀល រថយន្ដសាំយ៉ុងចាប់ពី៨ម៉ឺនរៀលទៅ ១០ម៉ឺនរៀល ក្នុងមួយរថយន្ត តាមស្នាកការនីមួយៗ ។
មតិប្រជាពលរដ្ឋបានធ្វើការរិះគន់យ៉ាងខ្លាំងៗ និងស្នើសុំ ឯកឧត្ដម សរ ចំរ៉ុង អភិបាលនៃគណៈអភិបាលខេត្តក្រចេះ ឯកឧត្តម អ៊ុង សំអាត ប្រតិភូរាជរដ្ឋបាលទទួលបន្ទុកព្រៃឈើ និង ឯកឧត្តម វេង សាខុន រដ្ឋមន្ត្រីក្រសួងកសិកម្ម គួរចាត់វិធានការបង្ក្រាបផង។
គេហទំព័រ រស្មីក្រុងយើង និងរង់ចាំទទួលនូវរាល់ការស្រាយបំភ្លឺពីលោក ទ្រី សុភ័ក្រ នាយខណ្ឌរដ្ឋបាលខេត្តក្រចេះរាល់ការចោទប្រកាន់ខាងលើនេះដើម្បីធ្វើការចុះផ្សាយបន្តទៀត៕
ដោយ ៖ សំណាង
