ពិធី​ផ្ទេរ​ភារ​កិច្ច​និង​ប្រកាស​តែង​តាំង​អភិបាល​ស្រុក​សូទ្រ​និគម

ខេត្តសៀមរាប ÷ កាលពីរសៀលថ្ងៃទី០៤ ខែ មករា ឆ្នាំ២០២៣ នៅសាលាស្រុកសូទ្រនិគម មានរៀបចំពិធីផ្ទេរភារកិច្ច និងប្រកាសតែងតាំងលោក គឹម វណ្ណៈ ឋានន្តរស័ក្តិឧត្តមមន្ត្រី ថ្នាក់លេខ៦ ប្រធានផ្នែកស៊ើបអង្គេត នៃការិយាល័យប្រជាពលរដ្ឋខេត្ត សៀមរាប ត្រូវបានប្រកាសចូលកាន់តំណែងជាអភិបាលស្រុកសូទ្រនិគម ជំនួសលោក ម៉ក់ ប្រុស ដែលត្រូវបានគ្រប់អាណត្តិរបស់ខ្លួន បានផ្ទេរភារកិច្ចថ្មីទៅបម្រើការនៅសាលាខេត្តសៀមរាប ក្រោមអធិបតីភាពរបស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ។

បន្ទាប់ពីគណៈអធិបតីប្រគល់អនុក្រឹត្យ និងការប្តេជ្ញាចិត្តរបស់លោកអភិបាលស្រុកដែលទើបទទួលបានការតែងតាំងថ្មីរួចមក ឯកឧត្តម ទៀ សីហា បានជម្រុញលោកអភិបាលស្រុកដែលទើបទទួលតំណែងថ្មីនៅ ពេលនេះត្រូវរួមគ្នាជាមួយអភិបាលរងស្រុក និងមន្ត្រីរាជការ ស្ថាប័ន អង្គភាព និងវិស័យឯកជនក្នុងស្រុកធ្វើការអភិឌ្ឍស្រុកឲ្យកាន់តែមានការរីកច្រើន និងបម្រើប្រជាពលរដ្ឋឲ្យមានតម្លាភាព។ ក្នុងនោះត្រូវរួមគ្នាកសាង ពង្រឹងសមត្ថភាព រដ្ឋបាលថ្នាក់ក្រោមជាតិ ជាពិសេស ភូមិ ឃុំ ឲ្យមានភាពធុនទៅនិងវិបត្ត ការប្រែប្រួល នៃព្រឹត្តិការណ៍នានា ជាក់ស្តែងដូចជាយើងកំពុងជួបប្រទះនៅពេលកន្លងមក ដោយឆ្លងរាលដាលនៃមេរោគកូវីដ-១៩ ។  នេះជាបទពិសោធន៍ រដ្ឋបាលមូលដ្ឋាន ជារដ្ឋបាលជួរមុខ ជារដ្ឋបាលឆ្លើយតបបានភ្លាមៗទៅនិងវិបត្តិទៅនិងការប្រែប្រួលទៅនិងជំងឺឆ្លងរាតត្បាតផ្សេងៗ គឺមានតែរដ្ឋបាលមូលដ្ឋានប៉ុណ្ណោះ ជាអ្នកឆ្លើយតប ជាអ្នកអនុវត្តវិធានការនានា។

ឯកឧត្តមបានបន្ថែមថាសេវាសាធារណៈ នៅតាមបណ្តាក្រុង ស្រុក ដែលរាជរដ្ឋាភិបាលបានបង្កើតឡើងនូវយន្តការច្រកចេញចូលតែមួយ នៅតាមរដ្ឋបាលខេត្ត ក្រុង ស្រុក ឲ្យដំណើរការទៅបានល្អ ប្រកបដោយគុណភាព លឿនរហ័ស និង មានការជឿជាក់ទៀតផង។ ក្នុងនោះដែរឯកឧត្តមអភិបាលខេត្ត ក៏បានផ្តាំផ្ញើដល់លោកអភិបាលស្រុកថ្មី ដែលទើបចូលកាន់តំណែង ធ្វើយ៉ាងណាត្រូវខិតខំប្រឹងប្រែងធ្វើការអភិវឌ្ឍន៍ស្រុក របស់ខ្លួន ឲ្យមានការរីកចម្រើនបន្ថែមទៀត គឺយកចិត្តទុកដាក់ដល់សុខទុក្ខប្រជាពលរដ្ឋជាចំបង ហើយក៏ត្រូវចេះសាមគ្គីភាពផ្ទៃក្នុង ជួរគណៈអភិបាលស្រុក លើការដឹកនាំ គ្រប់គ្រង បណ្តាការិយាល័យ មន្ត្រី និង អង្គភាពក្នុងស្រុកឲ្យបានល្អ និងបង្កើនការពង្រឹងនូវរបៀបរបបការងាររដ្ឋបាល នៅក្នុងសាលាស្រុក សំខាន់ជម្រុញបញ្ចប់ការងារឆ្វៀលដីតំបន់បី បឹងទន្លេសាប ជូនប្រជាកសិករ ព្រមទាំងមានការទំនាក់ទំនងឲ្យបានល្អជាមួយបណ្តា ស្ថាប័ន អង្គភាព និង បង្កើនលើការងារសន្តិសុខ សណ្តាប់ធ្នាប់ សុវត្ថិភាពដល់ភ្ញៀវទេសចរណ៍ និងប្រជាជន ព្រមទាំងមាន ទំនាក់ទំនងឲ្យបានល្អជាមួយវិស័យឯកជន លើការងារសន្តិសុខ សណ្តាប់ធ្នាប់ សុវត្ថិភាពដល់ប្រជាជនក្នុងមូលដ្ឋាន ក៏ដូចភ្ញៀវដែលបានធ្វើដំណើរឆ្លងកាត់ក្នុងភូមិសាស្ត្រស្រុកសូទ្រនិគមនេះ ចូលមកទស្សនាកម្សាន្តនៅខេត្តសៀមរាប ។ ក្រោយរាជរដ្ឋាភិបាលកម្ពុជា បានធ្វើការចាក់ស្រោចវ៉ាក់សាំងជូនប្រជាពលរដ្ឋ ដោយឥតគិតថ្លៃ មិនប្រកាន់ពូជសាសន៍ និន្នាការគណបក្សនយោ បាយណាឡើយ និងបានប្រកាសបើកប្រទេសឡើងវិញ សំដៅស្តារសេដ្ឋកិច្ចជាតិ សំខាន់លើវិស័យទេសចរ ពិសេសនៅខេត្តសៀមរាប ។ ម៉្យាងទៀតយើងក៏មិនត្រូវធ្វេសប្រហែសនៃជម្ងឺកូវិដឡើយ គឺ ត្រូវប្រកាន់ឲ្យបានខ្ជាប់ខ្ជួននូវវិធានការរបស់រាជរដ្ឋាភិបាល ៣កុំ និង ៣ការពារ ដើមី្បបន្សាំខ្លួននឹងការរស់នៅតាមគន្លងប្រក្រតីថ្មី នៃបរិបទកូវីដ-១៩ ព្រមទាំងជម្រុញដល់អាជ្ញាធរភូមិ ឃុំ ធ្វើការផ្សព្វផ្សាយដល់ប្រជាពលរដ្ឋឲ្យទៅចាក់វ៉ាក់សាំងនូវដូសបន្តទៀតផងដែរ៕

ដោយ ÷ ពន្លឺ