អភិបាល​រង​ខេត្ត​កែប​ម្នាក់​ស្រវឹង​ស្រា​បៀត​បៀន​ប្រពន្ធ​គេ​និង​ប្រើ​អំពើ​ហិង្សា​លើ​ស្ត្រី​ម្នាក់​រង​របួស​ក្បាល​ធ្ងន់​ធ្ងរ​!

ខេត្តកែប៖ អភិបាលរងខេត្តកែប លោក ភូ លិ ស្រវឹងស្រាដែលត្រូវបានរងការចោទប្រកាន់ពីការប្រើអំពើហិង្សាលើស្ត្រីម្នាក់ដោយគប់ដបស្រាបណ្តាលឱ្យរងរបួសត្រង់ក្បាលដេរជិត២០ថ្នេរ និងបានបៀតបៀន លើស្ត្រីម្នាក់ដែលមានគ្រួសាររួចហើយក្នុងកម្មវិធី ជប់លៀងឡើងតំណែងជាប្រធានមន្ទីរបរិស្ថានខេត្ត កែបថ្មីរបស់លោក អ៊ិន សៅ កាលពីយប់ថ្ងៃទី២៩ ខែធ្នូ ឆ្នាំ២០២២។

សាច់ញាតិជនរងគ្រោះបានអះអាងប្រាប់សារព័ត៌មានក្នុងស្រុកថា អភិបាលរងខេត្តកែប លោក ភូ លិ បាន ផឹកស្រាស្រវឹង រួចបានដើរមកតុជនរងគ្រោះ ហើយបានបៀតបៀនលើស្ត្រីម្នាក់ដែលជាប្រពន្ធគេ។ ខណៈពេលនោះនាងប្រាប់ទៅអភិបាលរងខេត្តកែបនោះថា ៖«លោកធ្វើអ៊ីចឹងមិនត្រឹមត្រូវទេ ខ្ញុំមានប្តីរួចហើយ»។

បន្ទាប់មកលោកអភិបាលរងខេត្តកែបរូបនោះបានដើរចេញទៅតុខ្លួនវិញបានមួយភ្លែតក៏ស្រាប់តែដើរត្រឡប់ មកតុជនរងគ្រោះម្តងទៀត។ ដោយមានការភ័យខ្លាច ជនរងគ្រោះទាំងពីរបានដើរចេញពីតុបម្រុងទៅផ្ទះ ស្រាប់តែអភិបាលរងខេត្តកែប ភូ លិ បានយកកែវស្រាគប់សំដៅជនរងគ្រោះបណ្តាលឱ្យរបួសក្បាលធ្ងន់ធ្ងរ ដែលត្រូវបានសាច់ញាតិជនរងគ្រោះជញ្ជូនទៅមន្ទីរពេទ្យភ្លាមៗ និងបានដេររបួសជិត២០ថ្នេរ។

ជុំវិញករណីនេះព្រះរាជអាជ្ញានៃអយ្យការអមសាលដំបូងខេត្តកែប លោក ខាន់ សុផល បានបញ្ជាក់ប្រាប់សារព័ត៌ក្នុងស្រុក ថាពិតជាមានករណីប្រើ ប្រាស់អំពើហិង្សាបង្កដោយអភិបាលរងខេត្តកែបឈ្មោះ ភូ លិ មែន ហើយមន្ត្រីនគរបាលយុត្តិធម៌កំពុងតែមានចំណាត់ការផ្លូវច្បាប់។

មកដល់រសៀលថ្ងៃទី៣០ ខែធ្នូ ឆ្នាំ២០២២នេះ គេនៅមិនទាន់ឃើញចំណាត់ការលើអភិបាលរងខេត្តកែបរូបនេះនៅឡើយទេ។

គូសរំលឹកផងដែរថា កាលពីថ្ងៃទី០៦ ខែសីហា ឆ្នាំ២០២២ កន្លងទៅនេះ អភិបាលរងខេត្តកែប ភូ លិ រូបនេះក៏ធ្លាប់បានផឹកស្រាស្រវឹង ស្រែកឡូឡាក្អេង ក្អាង និងបានបោកកែវ បោកចាន នៅក្នុងភោជនីយដ្ឋានមួយក្នុងរាជធានីភ្នំពេញផងដែរ ហើយបានបណ្តាលឱ្យមានការភ្ញាក់ផ្អើលដល់ភ្ញៀវភ័យរត់ ចោលតុអស់។

កាលនោះមន្ត្រីយុត្តិធម៌នៃស្នងការដ្ឋាននគរបាលរាជធានីភ្នំពេញបានឃាត់អភិបាលរងខេត្តកែបរូបនេះអស់មួយយប់។ ប៉ុន្តែដោយសារតែការយល់ យោគ ពីម្ចាស់ភោជនីយដ្ឋាន ក៏មានការសម្រប សម្រួលបញ្ចប់រឿងករណីប្រើប្រាស់អំពើហិង្សាបំផ្លិចបំផ្លាញទ្រព្យសម្បត្តិសាធារណៈម្តងរួចទៅហើយ ប៉ុន្តែបុគ្គលរូបនេះហាក់ដូចជាមិនមានការរាងចាល ដើម្បីរក្សាខ្លួនឱ្យមានតម្លៃសមជាមន្ត្រីរបស់រដ្ឋនោះទេ។

ជនរងគ្រោះទាំងពីរបានស្នើឱ្យដល់នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងរដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង ជួយ រកយុត្តិធម៌ដល់ពួកគាត់ និងចាត់វិធានការលើបុគ្គលអភិបាលរងខេត្តកែប ភូ លិ ទៅតាមច្បាប់៕

ដោយ ÷ វិបុល