ខេត្តសៀមរាប ÷ នៅរសៀលថ្ងៃអង្គារ ៥កើត ខែបុស្ស ឆ្នាំខាល ចត្វាស័ក ព.ស២៥៦៦ត្រូវថ្ងៃទី២៧ខែ ធ្នូ គ.ស២០២២នេះ នៅវត្តរាជបូណ៌ សង្កាត់សាលាកំរើក ក្រុង ខេត្តសៀមរាប មានធ្វើពិធីស្រោចស្រង់ព្រះសុគន្ធវារី ប្រគេនព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ ឧត្តមទីប្រឹក្សាសម្តេចព្រះសង្ឃនាយក សមា ជិកថេរសភាក្នុងព្រះពុទ្ធសាសនា នៃព្រះរាជាណា ចក្រកម្ពុជា ព្រះនាយកពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌ ក្រោមព្រះអធិបតីរបស់សម្តេចព្រះអគ្គសង្ឃរាជធិបតី គតិឧទ្ទេសបណ្ឌិត ទេព វង្ស សម្តេចព្រះសង្ឃរាជ គណៈមហានិកាយនៃព្រះរាជាណាចក្រកម្ពុជា និង សម្តេចព្រះពុទ្ធជ័យមុនីបណ្ឌិត ឃឹម សន ព្រះមេគណរាធានីភ្នំពេញ សម្តេចព្រះឧត្តមចរិយាបណ្ឌិត ឈឹង ប៊ុនឈា និង សម្តេចព្រះធម្មលិខិត សៅរ៍ ចន្ទថុល្ល ដោយមានការនិមន្ត និង មានការអញ្ជើញចូលរួមពីឯកឧត្តម ទេស ច័ន្ទគីរី សមាជិកក្រុមប្រឹក្សាខេត្ត លោក សុខ ថុល អភិបាល រងខេត្ត តំណាងដ៏ ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្ត ព្រះគ្រូចៅអធិការគ្រប់វត្តក្នុងក្រុង សីលវ័ន្ត សីលវតី និង ពុទ្ធបរិស័ទចំណុះជើងវត្តចូលរួមយ៉ាងច្រើនកុះករ ។
មានសង្ឃដីកានោះដែរសម្តេចព្រះពុទ្ធជ័យមុនីបណ្ឌិត ឃឹម សន ព្រះមេគណរាធានីភ្នំពេញ បានធ្វើការថ្វាយនូវព្រះពរប្រគេនព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ព្រមទាំងបានកោតសរសើរអំពីស្នា ព្រះហស្បត៌របស់ព្រះមហាវិមលធម្ម ក្នុងការបង្កើតឲ្យមានកម្មវិធីសិក្សាសម្រាប់ព្រះសង្ឃ និង ពុទ្ធបរិស័ទ យុវជន យុវតី ព្រមទាំងកសាងនូវ សមទ្ធិផលធំៗក្នុងទីវត្ត ក៏ដូចនៅលើទឹកដីសៀមរាបអង្គរ សំដៅបណ្តុះបណ្តាលនូវធនធានមនុស្ស លើ ការអភិវឌ្ឍន៍សង្គមជាតិ និង ធ្វើការផ្សព្វផ្សាយព្រះពុទ្ធសាសនា ឲ្យកានតែមានវិសាលភាពតទៅអនាគត ។
ក្នុងនោះដែរ ព្រះមហាវិមលធម្ម ព្រះអង្គបានដើរតាមព្រះពុទ្ធដិកា ដែលទ្រង់សំដែងថា ព្រះស្ឃក្នុងព្រះពុទ្ធសាសនា ត្រូវមានធុរៈចម្បង ពីរយ៉ាង នោះគឺ( គន្ថធុរៈ និង វិបស្សនាធុរៈ ) ជាមេរៀនដែលបណ្តាលឲ្យព្រះអង្គមានគោលបំណង ៣យ៉ាង គឺ (កសាងសាលាបាលី កសាងស្ថានីយ៍វិទ្យុ កសាងមណ្ឌលវិបស្សនា ) ។
សម្តេចព្រះពុទ្ធជ័យមុនីបណ្ឌិត ក៏បានផ្តល់នូវពុទ្ធឱវាទប្រគេនជូនដល់ព្រះភិក្ខុសង្ឃពុទ្ធបរិស័ទទាំងឡាយ យកទៅគោរពបដិបត្តិ ទៅតាមគន្លងនៃវិន័យព្រះសម្មាសាម្ពុទ្ធ ដែលជា ព្រះបរម្យគ្រូនៃយើង បានចងក្រងជាគម្ពីបិដកឲ្យគោរព ទៅតាមព្រះធម៌វិន័យរបស់ព្រះពុទ្ធសាសនា ។ សម្តេចព្រះពុទ្ធជ័យមុនីបណ្ឌិត ក៏បានផ្តល់នូវព្រះដំបូន្មានមួយចំនួន តាមផ្លូវព្រះធម៌ និង ផ្លូវលោក ពុទ្ធចក្រ និងអាណាចក្រ សំខាន់នូវព្រះធម៌ សាមគ្គីធម៌ និង កសាងអភិវឌ្ឍន៍វិស័យព្រះពុទ្ធសាសនា ដោយសាសនាជ្រកក្រោមម្លប់តែមួយនៃរដ្ឋធម្មនុញ្ញ នៃព្រះរាជាណាចក្រកម្ពុជា ដែលជាសាសនារបស់រដ្ឋ។ សម្តេចព្រះពុទ្ធជ័យមុនីបណ្ឌិត ឃឹម សន ក៏បានលើកនូវព្រះវិន័យរបស់ព្រះសម្មាសម្ពុទ្ធ ក្នុងការដឹកនាំព្រះសង្ឃនៅក្នុងទីវត្ត ដែលជាភារកិច្ចរបស់ព្រះគ្រូចៅអធិការវត្តនិមួយៗ ត្រូវគោរពប្រតិបត្តិ នូវនាយកធម៌ ទាំង០៦យ៉ាង ដែលជាប្រទីប ក្នុងការគ្រប់គ្រងវត្តអារាម ប្រកបដោយប្រសិទ្ធភាព និង គ្មានអធិករណ៍អ្វីកើតឡើងនោះ ឡើយ ដោយប្រកាន់នូវធម៌ខន្តី ព្រះសិរីសម្មត្តិវង្សបានបញ្ជាក់ថា ទីវត្តអារាមជាទីជំរកអប់រំចរិយាធម៌ ដល់ពុទ្ធបរិស័ទ យុវជន ដែលជាទំពាំង ស្នងឬសី្ស និង ជាឱកាសល្អក្នុងការរួបរួមគ្នា ដើមី្បថែរក្សាការពារ សេចក្តីសុខសាន្ត សង្គមជាតិ ដោយប្រកាន់យកព្រះពុទ្ធ ឱវាទជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌សង្គម ក្នុងការលុបបំបាត់អំពើហិង្សាសង្គម ។
សម្តេចព្រះពុទ្ធជ័យមុនីបណ្ឌិត ឃឹម សន ក៏មានសង្ឃដិកាលើកឡើងផងដែរថា វិស័យសាសនាមានការអភិវឌ្ឍន៍រីកចម្រើនទៅបាន ក៏ស្ថិតនៅក្រោមដំបូលសុខសន្តិភាព បើគ្មានសន្តិភាពនោះទេ លើគ្រប់វិស័យក៏ពុំមានការអភិវឌ្ឍន៍ផងដែរ ។ ដើមី្បភាពសុខសាន្ត និង ភាពរីកចម្រើនលើវិស័យព្រះពុទ្ធសាសនា ពុទ្ធបរិសទ័ ញាតញោមគ្រប់រូប ចូលរួមសាមគ្គីគ្នាការពារថែរក្សាសន្តិភាពនៅកម្ពុជា ឲ្យបានគង់វង្សតទៅអនាគត ៕
