ខេត្តសៀមរាប ÷ សិស្សានុសិស្សពូកែនិងឆ្លាតវៃចំនួន ១៤០នាក់ ក្នុងចំណោមសិស្សសរុបជាង៥០០នាក់ សម្រាប់ឆ្នាំសិក្សា២០២១-២០២២ ដែលមានសិស្សភាសាអង់គ្លេស និងសិស្សភាសាខ្មែរ ត្រូវបានគណៈគ្រប់គ្រងសាលាអន្តរជាតិអេអិលអេ(A.L.A) ប្រគល់ ជូននូវប័ណ្ណសរសើរនារសៀលថ្ងៃទី២៤ ខែធ្នូ ឆ្នាំ ២០២២ នេះ។
លោក នង វុត្ថា នាយកសាលា និងជាស្ថាបនិក សាលាអន្តរជាតិ អេ.អេល.អេ បានមានប្រសាសន៍ថា កុមារគ្រប់រូបត្រូវទទួលបានការអប់រំ ដោយការយកចិត្តទុកដាក់បំផុត ហើយក៏ត្រូវទទួលបាននូវការគាំពារខ្ពស់ ក្នុងនោះ មូលដ្ឋានគ្រឹះនៃការអប់រំកុមារតូចនិងបឋមសិក្សា ចាំបាច់បំផុត គឺសាលាត្រូវតែមានធនធានមនុស្ស គឺគ្រូបង្រៀនដែលមានជំនាញនិងឆន្ទៈ ហើយនវានុវត្តន៌ និងការផ្លាស់ប្តូរថ្មី ដើម្បីធ្វើបច្ចុប្បន្នភាព លើការរៀនសូត្ររបស់សិស្សានុសិស្ស និងការបង្រៀនរបស់គ្រូ តាមបែបថ្មីដែលធានាបាននូវគុណភាព ប្រសិទ្ធិភាព និងប្រសិទ្ធិផលខ្ពស់ លើកម្មវិធីអប់រំកុមារតូចនិងបឋមសិក្សា គឺជាមូលដ្ឋានគ្រឹះនិង រឹងមាំ សម្រាប់កិច្ចដំណើរការអប់រំ ស្របតាមគោលនយោបាយនិងក្របខណ្ឌគតិយុត្តិ របស់ក្រសួងអប់រំ យុវជននិងកីឡា ។
លោក នង វុត្ថា ក៏បានមានប្រសាសន៍បន្ថែមថា មូល ដ្ឋានគ្រឹះនៃការអប់រំកុមារតូចៗ និងបឋមសិក្សាចាំ បាច់បំផុត សាលាត្រូវមានធនធានមនុស្ស សម្រាប់អភិវឌ្ឍន៍កម្មវិធីឲ្យបានល្អប្រសើរ ជាមួយនឹងការសិក្សាស្វែងយល់ផងដែរ អំពីវិធីសាស្ត្រថ្មីៗ ដើម្បីជួយដល់ការសិក្សារបស់សិស្ស ស្របតាមការអប់រំជំនាន់ថ្មី និងកម្មវិធីសិក្សាក្នុងសតវត្សន៌ទី២១ នេះ ដូច្នេះតាម រយៈនេះលោកក៏បានសូមសំណូមពរដល់មាតាបិតា អាណាព្យាបាលសិស្ស សូមចែករំលែកនូវសេចក្តីស្រឡាញ់ចំពោះកូនៗ ចំពោះសាលាឲ្យបានច្រើន ព្រោះថាគ្រូបបង្រៀននៅសាលា អេ.អេល.អេ គឺជាគរុគ្រូស្ម័គ្រចិត្តចូលរួមអភិវឌ្ឍសាលាប្រកបដោយគុណភាព បង្ហាត់បង្រៀនសិស្សតាមនិយាមគរុកោសល្យ និងឆន្ទៈលះបង់ខ្ពស់ដើម្បីប្រយោជន៏ដល់សិស្សក្រីក្រី ដែលពុំមានលទ្ធភាពទៅរៀននៅសាលាដែលមានតម្លៃខ្ពស់នោះទេ ហើយសិស្សានុសិស្សទាំងអស់ ត្រូវបន្តប្រឹងប្រែងរៀនសូត្រ ដើម្បីក្លាយខ្លួនជាកូនល្អ ពលរដ្ឋល្អ និងទៅថ្ងៃអនាគត បានក្លាយជាធនធានមនុស្សប្រកបដោយគុណភាព និងសីលធម៌ខ្ពស់ ចូលរួមអភិវឌ្ឍន៌ប្រទេសជាតិ ។
លោកនាយកសាលាក៏បានបញ្ជាក់ទៀតថា សាលាអន្តរជាតិ អេ អិលអេ មានចក្ខុវិស័យ បេសកកម្ម និងគោលដៅផ្តោតលើការអប់រំ បណ្តុះបណ្តាល អោយសិស្សានុសិស្សមានសមត្ថភាពពេញលេញហើយ ព្រមទាំងបន្តខិតខំធ្វើជាអ្នកផ្តល់ការអប់រំឈានមុខគេនៅក្នុងប្រទេសកម្ពុជា ចាប់ពីថ្នាក់មត្តេយ្យឡើងទៅ រួមទាំងមានការអភិវឌ្ឍសមត្ថភាពសិស្សឲ្យក្លាយជាពលរដ្ឋដែលមានទំនួលខុសត្រូវនៅទូទាំងសកលលោកទៀតផងដែរ៕
