ភ្នំពេញ ៖ ឯកឧត្តម ឃួង ស្រេង អភិបាលរាជធានីភ្នំពេញ បានបើកកិច្ចប្រជុំជាមួយមន្ត្រីជុំនាញពាក់ព័ន្ធ អាជ្ញាធរខណ្ឌទាំង១២ និងកងកម្លាំងប្រដាប់អាវុធទាំង៣ប្រភេទដើម្បីត្រៀមផែនការ រៀបចំព្រះរាជពិធី និងពិធីបុណ្យជាតិធំៗជាបន្តបន្ទាប់គ្នា នាពេលឆាប់ៗខាងមុខនេះ។
កិច្ចប្រជុំនេះ ធ្វើឡើងនៅរដ្ឋបាលរាជធានីភ្នំពេញ នារសៀលថ្ងៃទី២២ ខែតុលា ឆ្នាំ២០១៨ ដោយមានការចូលរួមពីអភិបាលគ្រប់ខណ្ឌ មន្ទីរនានាក្រោមឱវាទរដ្ឋបាលរាជធានីភ្នំពេញ តំណាងស្នងការនគរបាល និងកងរាជអាវុធហត្ថរាជធានីភ្នំពេញ និងមន្ត្រីពាក់ពន្ធ័ជាច្រើនរូបទៀត។
មន្ត្រីរដ្ឋបាលរាជធានីភ្នំពេញ បានឲ្យដឹងថា កិច្ចប្រជុំខាងលើនេះ ដើម្បីប្រកាសសេចក្តីសម្រេច បង្កើតគណ:កម្មការ និងអនុគណ:កម្មការទទួលបន្ទុករៀបចំព្រះរាជពិធីបុណ្យអុំទូក រៀបចំខួបអនុស្សាវរីយ៍ លើកទី៦៥ នៃទិវាបុណ្យឯករាជ្យជាតិ៩វិច្ឆិកា និងទិវាកំណើត នៃកងយោធពលខេមរភូមិន្ទឆ្នាំ២០១៨ និងបុណ្យចូលឆ្នាំសកលដែលប្រារព្ធធ្វើឡើងនៅរាជធានីភ្នំពេញ ជាបន្តបន្ទាប់គ្នានេះ។
ឆ្នាំនេះក៏ដូចឆ្នាំមុនៗ សាលារាជធានីភ្នំពេញ នឹងរៀបចំតុបតែងភ្លើងតាមដងវិថី និងសួនច្បារនានា ដើម្បីទទួលស្វាគមន៍បងប្អូនដែលអញ្ជើញ មកទទួលភាពសប្បាយរីករាយក្នុងព្រះរាជពិធីបុណ្យអុំ
ទូក។ ដោយឡែកឆ្នាំនេះរដ្ឋបាលរាជធានីភ្នំពេញនឹងរៀបចំការប្រកួតរចនាម៉ូតខ្លោងរបារកាត់ទទឹងផ្លូវអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៨ ដើម្បីផ្តល់ឱកាសដល់បងប្អូនអ្នកជំនាញខាងរចនាទាំងអស់ ជាពិសេសប្អូនៗនិស្សិត នៃសកលវិទ្យាល័យភូមិន្ទវិចិត្រសិល្បៈ បានចូលរួមចំណែកបង្ហាញស្នារដៃរបស់ខ្លួន នូវម៉ូតខ្លោងរបាដែលមានសោភ័ណភាព ស្រស់ស្អាត និងបង្កប់ទៅដោយរចនាបថខ្មែរពិតៗ។ខ្លោងរបាដែលទទួលបានការគាំទ្រច្រើនជាងគេតាមរយៈការចុច Like នឹងទទួលបានរង្វាន់លើកទឹកចិត្ត និងដាក់តម្លើងនៅតាមទីតាំង ដែលបានត្រៀមទុកជាស្រេច។
ខ្លឹមសារអក្សរ៖ អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ថ្ងៃពុធ ១៤កើត ព្រហស្បតិ៍ ១៥កើត និងថ្ងៃសុក្រ ១រោច ខែកត្តិក ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១-២៣ ខែវិច្ឆិកា ឆ្នាំ២០១៨។
ខ្លោងរបាមាន៤ទីតាំង រួមមាន៖
១. របារកាត់ទទឹងមហាវិថីព្រះនរោត្តមមុខវិមានឯករាជ្យ
២. របារកាត់ទទឹងមុខនាឡិការមណីយដ្ឋានវត្តភ្នំ
៣. របារកាត់ទទឹងវិថីព្រះសីហនុចំណុចខាងលិចរង្វង់មូលសម្ដេចជួនណាត
៤. និងរបារកាត់ទទឹងតិរវិថីព្រះស៉ីសុវត្ថិចំណុចសួនព្រះគន្លុង។
ដោយ ៖ វិចិត្រ
