ខេត្តសៀមរាប ÷នៅសាលប្រជុំសាលាខេត្តសៀមរាប នាព្រឹកថ្ងៃទី ២១ ខែ ធ្នូ ឆ្នាំ២០២២ ឯកឧត្តម អ៊ាន ឃុន ប្រធានក្រុមប្រឹក្សាខេត្ត លោក លី សំរិទ្ធ អភិបាលស្តីទី តំណាងខ្ពង់ខ្ពស់ឯកឧត្តម ទៀ សីហា អភិបាល នៃ គណៈអភិបាលខេត្ត ព្រមទាំងឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត នាយក នាយករងរដ្ឋបាលខេត្ត និងទីចាត់ការ អង្គភាព នាយការិយាល័យ មន្ត្រីរាជការចំណុះសាលាខេត្តសៀមរាប និង មន្ទីរសុខាភិបាលខេត្ត បានចូលជួបធ្វើកិច្ចសម្ភាសជាមួយក្រុមការងារអគ្គនាយកដ្ឋានរដ្ឋបាល នៃក្រសួងមហាផ្ទៃ ដឹកនាំដោយឯកឧត្តមបណ្ឌិត ជូន រក្សា អនុប្រធាននាយកដ្ឋានកិច្ចការរដ្ឋបាលរាជធានី ខណ្ឌ និងខេត្ត ។
ក្នុងកិច្ចស្វាគមន៍នោះដែរលោក លី សំរិទ្ធ អភិបាលស្តីទី បានធ្វើសេចក្តីរាយការណ៍ អំពីសកម្មភាព សមិទ្ធផលរបស់ ខេត្តសៀមរាប សំខាន់លើការងារគ្រប់គ្រង ដឹកនាំមន្ត្រីរាជការ ព្រមទាំងបានបញ្ជាក់អំពីតួលេខក្របខណ្ឌ័នៃមន្ត្រីរាជការ បម្រើការងារនៅរដ្ឋបាលខេត្ត និង ការបម្រើលើការងារសេវាសាធារណៈ ជូនប្រជាពលរដ្ឋផងដែរ ។
ក្នុងនោះដែរលោក អភិបាលខេត្តស្តីទី ក៏បានលើកផងដែរ ពីកិច្ចអភិវឌ្ឍន៍របស់ខេត្តលើគ្រប់វិស័យ សំខាន់ក្រោយពេលដែលមានភាពធូស្រាលនៃជម្ងឺកូវិដ១៩ ប្រមុខរាជរដ្ឋាភិបាលកម្ពុជា បានធ្វើការបើកប្រទេសឡើងវិញ បានធ្វើឲ្យវិស័យសេដ្ឋកិច្ចទេសចរណ៍ បានកំពុងធ្វើការស្តារឡើងវិញ និងធ្វើឲ្យកំណើនភ្ញៀវជាតិ អន្តរជាតិកើនឡើងជាបណ្តើរៗមកខេត្តសៀមរាប។
ក្នុងនោះលោកក៏បានបញ្ជាក់ផងដែរ អំពីកិច្ចទំនាក់ទំនងសហប្រតិបត្តិការល្អ ជាមួយបណ្តាប្រទេសចង សម្ព័ន្ធមេត្រីភាព ជាមួយខេត្តសៀមរាបផង ។
ក្នុងនោះដែរឯកឧត្តមបណ្ឌិត ជូន រក្សា ក៏បានគូសបញ្ជាក់ថាកិច្ចសម្ភាសជាមួយក្រុមប្រឹក្សាខេត្ត គណៈអភិបាលខេត្ត មន្ត្រីរាជការនាពេលនេះ ក្នុងគោល បំណង ដើមី្បពង្រឹងប្រព័ន្ធគ្រប់គ្រងកិច្ចការរដ្ឋបាល នៅថ្នាក់ក្រោមជាតិ ឲ្យកាន់តែមាន តម្លាភាព គណនេយ្យភាព និង ប្រសិទ្ធភាពខ្ពស់ សំដៅលើកកម្ពស់ស្មារតីទទួលខុសត្រូវ ក្នុងការអនុវត្តមុខងារ តួនាទី ភារកិច្ច និងការគ្រប់គ្រង ការចាត់ចែង ការផ្តល់សេវាសាធារណៈ និង ការប្រើប្រាស់ធនធាន ដោយផ្អែកតាមគោលការណ៍ នីតិវិធី ស្តង់ដាសេវា និងស្របតាមគោលការណ៍ច្បាប់ លិខិតបទដ្ឋានគតិយុត្តដែលបានកំណត់ ។
ឯកឧត្តមក៏បានបន្តទៀតថា ក្រុមការងារក្រសួងមហាផ្ទៃ និងធ្វើការតាមដាន ត្រួតពិនិត្យ និងវាយតម្លៃទៅលើការអនុវត្តប្រព័ន្ធគ្រប់គ្រង ការចាត់ចែងកិច្ច ការរដ្ឋបាល , ការបំពេញតួនាទី ភារកិច្ច និងសិទ្ធិអំណាចរបស់ក្រុមប្រឹក្សា ព្រមទាំងការគ្រប់គ្រងវត្តមានបុគ្គលិក មន្ត្រីរាជការ និងពិនិត្យនីត្យានុកូលភាព លើសំណុំឯកសារ លិខិតរដ្ឋបាល និងលិខិតបទដ្ឋាន គតិយុត្តពាក់ព័ន្ធនានា និងកិច្ចការមានការ ពាក់ព័ន្ធ របស់រដ្ឋបាលខេត្តសៀមរាប ។
ឯកឧត្តមក៏បានលើកផងដែរថា ដើមី្បធានាឲ្យបានការអនុវត្តសេវាសាធារណៈនោះ យើងទាមទារក្នុងការពង្រឹងនូវសមត្ថភាពរបស់មន្ត្រី តាមរយៈវគ្គបណ្តុះបណ្តាលទៅតាមជំនាញ ។ ក្នុងនោះឯកឧត្តម ក៏បាន ធ្វើការកោតសរសើរលើការគ្រប់គ្រងសេវាសាធារណៈរបស់រដ្ឋបាលខេត្តសៀមរាប ក្នុងការទទួលស្វាគមន៍ដល់ភ្ញៀវទេសចរ ជាតិ អន្តរជាតិ ព្រមទាំងគ្រប់គ្រងសេវាលើចំណីអាហារ សណ្ឋាគារ ផ្ទះសំណាក់បានល្អ ក្នុងការទាក់ទាញដល់ភ្ញៀវចូលមក ស្នាក់នៅកម្សាន្ត កាន់តែច្រើននៅបុណ្យឆ្លងឆ្នាំសកលពេលខាងមុខនេះ ។ ឯកឧត្តមក៏បានផ្តល់នូវគន្លឹះល្អៗ ជាមូលដ្ឋានគ្រឹះ សម្រាប់ក្រុមប្រឹក្សាខេត្ត គណៈអភិបាលខេត្ត មន្ត្រីថ្នាក់ដឹកនាំក្រោមឱវាទយកទៅអនុវត្តទទួលបានជោគជ័យ និង បានមានសង្ឃឹមជឿជាក់ថា ក្រោយពេលកិច្ចសម្ភាសនេះទៅ គ្រប់រាល់បញ្ហាផ្សេងៗដែលកើតមានឡើងនៅក្នុងខេត្តសៀមរាប និង ត្រូវបានធ្វើការកាត់បន្ថយជាបណ្តើរៗ និងត្រូវបង្កើនការយកចិត្ត ក្នុងការតាមដានរាល់កិច្ចការអនុវត្តរបស់មន្ត្រីក្រោមឱវាទគ្រប់ម៉ោងការងារ ក្នុងការលុបបំបាត់នូវមន្ត្រីអសកម្ម បក្សពួកនិយម សំដៅលើកកម្ពស់ការងារឲ្យកាន់តែមានប្រសិទ្ធភាព ក្នុងការបម្រើសេវាជូនដល់ប្រជាពលរដ្ឋ ៕
