ខេត្តសៀមរាប ÷ នៅក្នុងពិធីបើកការបោះជំរំយុវជនជាសាកលលើកទី៨ ក្រោមប្រធានបទ «ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ» នាជើងភ្នំគូលែន ស្រុកបន្ទាយស្រី ខេត្តសៀមរាប កាលពីរាត្រីថ្ងៃទី២០ ខែធ្នូ ឆ្នាំ២០២២ នេះ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការនៃក្រសួងអប់រំ យុវជន និងកីឡា បានមានប្រសាសន៍លើកឡើងថាការអភិវឌ្ឍយុវជនគឺជាអាទិភាពមួយរបស់រាជរដ្ឋាភិបាលកម្ពុជា ដូចបានកំណត់នៅក្នុងយុទ្ធសាស្រ្តចតុកោណដំណាក់កាលទី៤ ជាពិសេសបានសង្កត់ធ្ងន់អំពីភាពចាំបាច់ក្នុងការអភិវឌ្ឍយុវជន ដើម្បីក្លាយជាសសរទ្រូងប្រទេសជាតិ តាមរយៈការផ្តល់ការអប់រំប្រកប ដោយគុណភាព និងជំនាញដែលឆ្លើយតបទៅនឹងទីផ្សារការងារ ទាំងនៅក្នុងប្រទេសនិងនៅក្នុងតំបន់។
ឯកឧត្តមបណ្ឌិត មានប្រសាសន៍បន្តថា ដើម្បីបង្ហាញពីការប្តេជ្ញាចិត្តក្នុងការអភិវឌ្ឍយុវជនកម្ពុជា រាជរដ្ឋាភិបាលកម្ពុជាបានដាក់ចេញនូវ «គោលនយោបាយជាតិស្តីពីការអភិវឌ្ឍយុវជនកម្ពុជា» ដែលមានចក្ខុវិស័យវែងឆ្ងាយ ក្នុងការប្រមូលផ្តុំកម្លាំងគ្រប់មជ្ឈដ្ឋាន សំដៅរួមចំណែកអភិវឌ្ឍយុវជនឱ្យកាន់តែមានលក្ខណៈសម្បត្តិវិជ្ជមាន និងផ្តល់ឱកាសដល់យុវជន អភិវឌ្ឍសក្តានុពលរបស់ខ្លួន ទាំងនៅក្នុងការទទួលបានការអប់រំ របរការងារ សុខភាព ការចូលរួមធ្វើសេចក្តីសម្រេចចិត្ត និងការចូលរួមចំណែកអភិវឌ្ឍគ្រួសារ សហគមន៍ ប្រទេសជាតិ និងពិភពលោក។ ស្ថិតក្នុងបរិការណ៍នៃការវិវត្តខាងផ្នែកសង្គមសេដ្ឋកិច្ចរបស់ប្រទេស តំបន់ និងពិភពលោកនាពេលបច្ចុប្បន្ន និងការឈានទៅសម្រេចគោលដៅអភិវឌ្ឍប្រកបដោយចីរភាពនៅឆ្នាំ២០៣០ កម្ពុជាមានតម្រូវការចាំបាច់ក្នុងការប្រើប្រាស់សក្តានុពលពេញលេញរបស់មនុស្សគ្រប់ជំនាន់ ជាពិសេសយុវជន ដែលជាគន្លឹះសម្រាប់ការអភិវឌ្ឍប្រកបដោយចីរភាព ក្នុងនោះទាមទារឱ្យយើងទាំងអស់គ្នាត្រូវតែសហការគ្នា ដើម្បីជំរុញទំនាក់ទំនងនិងភាពជាដៃគូអន្តរជំនាន់ប្រកប ដោយជោគជ័យ និងប្រកបដោយសមភាព ហើយយុវជនម្នាក់ៗ គឺពិតជាតួអង្គដ៏សំខាន់ ប៉ុន្តែកិច្ចសហការគ្នារវាងយុវជនបច្ចុប្បន្ន និងយុវជនជំនាន់មុនៗគឺ រឹតតែសំខាន់ថែមទៀត ដើម្បីផ្តល់នូវដំណោះស្រាយជាក់ស្តែង និងមានរយៈពេលវែង ចំពោះបញ្ហារួមនានាផងដែរ។
ក្នុងឱកាសនោះដែរ លោក អ៊ឹង គឹមលាង អភិបាលរងខេត្តសៀមរាប បានមានប្រសាសន៍ថា សាមគ្គីភាពអន្តរជំនាន់ នឹងធ្វើឱ្យការប្រាស្រ័យទាក់ទង និងការយល់ពីគ្នាទៅវិញទៅមកកាន់តែប្រសើររវាងអ្នកជំនាន់មុននិងអ្នកជំនាន់ក្រោយ ការរក្សាគុណតម្លៃសង្គមក្នុងភាពបត់បែនសម្រាប់ការផ្លាស់ប្តូរថ្មីៗ ការធ្វើសេចក្តីសម្រេចចិត្តប្រកបដោយចីរភាពកាន់តែប្រសើរ និងភាពប្រសើរឡើងនៃសមភាពអន្តរជំនាន់។ ដូច្នេះការបោះជំរំយុវជនជាសាកលលើកទី៨ ក្រោមប្រធានបទ «ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ ដែលបានរៀបចំឡើងដោយគណៈកម្មការអន្តរក្រសួង ដែលមានក្រសួងអប់រំ យុវជន និងកីឡាជាអ្នកដឹកនាំ ធ្វើឡើងក្នុងគោលបំណងអភិវឌ្ឍសមត្ថភាព និងបណ្តុះបណ្តាលយុវជនលើជំនាញបច្ចេកវិទ្យាព័ត៌មាន និងឌីជីថល ដើម្បីឆ្លើយតបទៅនឹងយុទ្ធសាស្ត្រកំណែទម្រង់វិស័យអប់រំបែបឌីជីថលក្រោមក្របខណ្ឌនៃគោលនយោបាយរដ្ឋាភិបាលឌីជីថលកម្ពុជា (២០២២-២០៣៥)។ លោកអភិបាលរងខេត្ត មានប្រសាសន៍បន្តថា ជាមួយនឹងយុទ្ធសាស្ត្រកំណែទម្រង់វិស័យអប់រំបែបឌីជីថលនេះដែរ យុវជនចូលរួមនឹងទទួលបានការបណ្តុះបណ្តាលជំនាញ ការបង្កើតគំនិតថ្មី និងចាប់យកឱកាសការងារ និងអាជីពសមរម្យក្នុងយុគសម័យបដិវត្តឧស្សាហកម្ម៤.០ ។ ជាមួយគ្នានោះយុវជនក៏នឹងទទួលបាននូវទម្រភ្ជាប់ទំនាក់ទំនង ការបណ្តុះស្មារតីសហគ្រិនភាពបែបឌីជីថល ភាពជាអ្នកដឹកនាំក្នុងការចូលរួមលើកស្ទួយ និងផ្សព្វផ្សាយទេសចរណ៍ និងបំណិតជីវិតក្នុងយុគសម័យរីកចម្រើននៃបច្ចេកវិទ្យាព័ត៌មាន។ ដោយឡែកសម្រាប់ការបោះជំរំយុវជនជាសាកលលើកទី៨ នាពេលនេះដែរ ក៏ជាបទពិសោធន៍ថ្មីមួយបន្ថែមទៀតដល់ប្អូនៗយុវជនរបស់យើង ជុំវិញការរស់នៅជាក្រុម ការសហការគ្នាក្នុងការចែករំលែកនូវរាល់ចំណេះដឹងពីគ្នាទៅវិញទៅមក ហើយអាចយកនូវបទពិសោធន៍ទាំងនោះប្រើប្រាស់សម្រាប់បំពេញផ្លូវនៃគោលដៅទៅអនាគតរបស់ប្អូនៗ ដែលជាអ្នកស្នងបន្ត ជាអ្នកដឹកនាំ និងជួយអភិវឌ្ឍន៍សង្គមជាតិយើងនាថ្ងៃអនាគតផងដែរ។គួរឲ្យដឹងថា បើតាមរបាយការណ៍របស់អគ្គនាយកដ្ឋានយុវជន ការបោះជំរំយុវជនជាសាកលបានចាប់ផ្តើមតាំងពីឆ្នាំ២០១០ ក្រោមគំនិតផ្តួចផ្តើមរបស់ សម្តេចតេជោ ហ៊ុន សែន នាយករដ្ឋមន្ត្រី។ ហើយក្នុងឆ្នាំ២០២១ ដើម្បីផ្តល់ឱកាសដល់យុវជននៅតាមរាជធានីខេត្តបានជួបជុំ អគ្គនាយកដ្ឋានយុវជនបានធ្វើទំនើបកម្មលើកម្មវិធី និងទម្រង់នៃការបោះជំរំយុវជនជាសាកលលើកទី៧ តាមទម្រង់ឌីជីថល និងបច្ចេកវិទ្យាព័ត៌មានទាំងស្រុង។ ដោយឡែកសម្រាប់ការបោះជំរំយុវជនជាសាកលលើកទី៨ ក្រោមប្រធានបទ «ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ» នៅឆ្នាំ២០២២នេះ គឺប្រព្រឹត្តទៅរយៈពេល ៦ថ្ងៃ ចាប់ពីថ្ងៃទី១៩-២៤ ខែធ្នូ ឆ្នាំ២០២២ ដែលមានចំនួនយុវជនចូលរួមសរុប ១៨៣នាក់ មកពី ២៥រាជធានីខេត្ត ក្នុងនោះយុវជនជាប្រតិភូចំនួន ១៥៣នាក់ និងយុវជនស្ម័គ្រចិត្ត ៣០នាក់ផងដែរ៕
