ខេត្តសៀមរាប ÷ អាជ្ញាធរខេត្តសៀមរាបបានប្រារព្ធទិវាពិភពលោកប្រយុទ្ធនឹងជំងឺអេដស៍១ធ្នូឆ្នាំ២០២២ ក្រោមប្រធានបទ “ធ្វើឲ្យមានសមភាព” នាព្រឹកថ្ងៃទី១៤ ខែធ្នូ ឆ្នាំ២០២២ ក្រោមអធិបតីភាព លោក ពិន ប្រាកដ អភិបាលរងនៃគណៈអភិបាលខេត្តសៀមរាប ព្រមទាំងមានការអញ្ជើញចូលរួមពីសំណាក់ លោក លោកស្រី ប្រធាន អនុប្រធានមន្ទីរ-អង្គភាពជុំវិញខេត្តលោក លោកស្រី អភិបាល អភិបាលរង ក្រុង-ស្រុកលោក លោកស្រី ចៅសង្កាត់ លោក លោកស្រី ប្រធានអង្គការដៃគូជាតិ-អន្តរជាតិ និង គរុសិស្ស និស្សិត សិស្សានុសិស្សជាច្រើននាក់ចូលរួមផងដែរ។ ឆ្នាំ២០២២ នេះការប្រារព្ធទិវាពិភព លោកប្រយុទ្ធនឹង ជំងឺអេដស៍លើកទី៣៣ នៅលើ សកលលោក និងជាលើកទី៣០ សម្រាប់ព្រះរាជា ណាចក្រកម្ពុជាក្រោម ប្រធានបទ “ធ្វើអោយមានសមភាព” ហើយការរៀបចំប្រាព្ធទីវានេះគឺក្នុងគោល បំណងរួមគ្នាជាសកល ដើម្បីបង្ហាញពីការប្តេជ្ញាចិត្តខ្ពស់របស់ប្រជាជននៅលើសកលលោក ចូលរួមចែករំលែកជំនាញ ចំណេះដឹង និងបទពិសោធន៍ថ្មីៗ ក្នុងការទប់ស្កាត់ការឆ្លងរីករាលដាលមេរោគឣេដស៍ឱ្យមានប្រសិទ្ធភាព និងបង្ហាញពីការគាំទ្រ ការយកចិត្តទុកដាក់ដល់ឣ្នកផ្ទុក ឣ្នករងផលប៉ះពាល់ពីមេរោគ ឣេដស៍ ក្នុងការទទួលបានសេវាថែទាំ ព្យាបាល និងសេវាសង្គមឲ្យកាន់តែទូលំទូលាយ។
លោក ពិន ប្រាកដ បានមានប្រសាសន៍ថាមេរោគអេដស៍នៅតែជាបញ្ហាសុខភាពសាធារណៈដ៏សំខាន់ដែលប៉ះពាល់ដល់មនុស្សរាប់លាននាក់នៅទូទាំងពិភពលោក ។ ជាមួយគ្នានេះដែរ មេរោគអេដស៍អាចឆ្លងតាមការរួមភេទ ការប៉ះពាល់ឈាមដែលមានមេរោគអេដស៍ និងពីម្តាយទៅទារកអំឡុងពេលមានផ្ទៃពោះផងដែរ ហើយលើសពីនេះវាអាចបំផ្លាញប្រព័ន្ធសុំាការពារប្រឆាំងនឹងជំងឺនានា ហើយថែមទាំងអាចបណ្ដាលឲ្យបាត់បង់ជីវិតទៀតផង។
លោកអភិបាលរងខេត្តក៍បានបន្តទៀតថាទោះបីយើងទទួលបានជោគជ័យជាបន្តបន្ទាប់ លើការទប់ស្កាត់ការរាលដាលមេរោគអេដស៍ដ៏គួរជាទីមោទនភាពនេះហើយក៏ដោយ ក៏យើងត្រូវខិតខំប្រឹងប្រែងឱ្យបានខ្លាំងក្លាបន្តទៀត ដើម្បីកាត់បន្ថយអត្រាប្រេវ៉ាឡង់មេរោគអេដស៍ឱ្យបានជាអតិបរិមាបន្ថែមទៀត ក្នុងចំណោមក្រុម ដែលប្រឈមមុខខ្ពស់ ដូចជា៖ ក្រុមបុគ្គលិកគ្រឹះស្ថានសេវាកម្សាន្តសប្បាយ ក្រុមបុរសស្រលាញ់ បុរស ក្រុមបុរស បំប្លែងភេទ ក្រុមអ្នករងគ្រោះដោយ សារគ្រឿងញៀន ក្រុមយុវវ័យ និងឈានទៅ កាត់ផ្តាច់ទាំងស្រុងការចំលងមេរោគអេដស៍ពីម្ដាយទៅកូន។ លោកក៏បានអំពាវនាវដល់ថ្នាក់ដឹកនាំមន្ទីរ-អង្គភាព រដ្ឋបាលក្រុង-ស្រុក រដ្ឋបាលឃុំ-សង្កាត់ និងអង្គការមិនមែន រដ្ឋាភិបាលជាតិ-អន្តរជាតិ និងអ្នកពាក់ព័ន្ធទាំងអស់ ត្រូវយកបញ្ហាជំងឺអេដស៍ជាអាទិភាពក្នុងការ បញ្ជ្រាប និងបញ្ចូលទៅគ្រប់សេវាទាំងអស់ក្នុងអង្គភាព ស្ថាប័ន និងសហគមន៍របស់ខ្លួន ដើម្បីធានាថា មន្ត្រី បុគ្គលិក ប្រជាជនរបស់ខ្លួនមានចំណេះដឹងត្រឹមត្រូវពីមេរោគអេដស៍ និងជំងឺអេដស៍ និងមានមធ្យោបាយគ្រប់គ្រាន់ក្នុងការបង្ការខ្លួនពីការចំលងមេរោគអេដស៍ និងជំងឺអេដស៍។ ត្រូវបន្តលើកកម្ពស់សមត្ថភាព ក្នុងភាពជាអ្នកដឹកនាំល្អ ក្នុងការប្រយុទ្ធនឹងជំងឺអេដស៍ ទៅគ្រប់លំដាប់ថ្នាក់ ទាំងអស់ និងត្រូវបន្តអប់រំ ផ្សព្វផ្សាយឱ្យបានជាប្រចាំ និងទូលំទូលាយនៅទូទាំង ប្រទេសខេត្ត ក្រុង-ស្រុក ជាពិសេសតំបន់ដាច់ស្រយាល ក្រុមប្រជាជនចំណាកស្រុក និងក្រុម ប្រជាជនប្រឈមមុខខ្ពស់នឹងមេរោគអេដស៍។
លោក ពិន ប្រាកដ ក៏បានអំពាវនាវបន្ថែមសូមឲ្យ អង្គការជាតិ-អន្តរជាតិ សង្គមស៊ីវិល ដៃគូអភិវឌ្ឍន៍នានា និងអ្នកផ្ទុកមេរោគអេដស៍ អ្នកជំងឺអេដស៍ទាំងអស់បន្តការចូលរួម គាំទ្រឱ្យបានខ្លាំងក្លាថែមទៀត តាមគ្រប់រូបភាព ទាំងកំលាំងកាយ ប្រាជ្ញាស្មារតី និងសម្ភារថវិកា ដើម្បីពង្រីកអន្តរាគមន៍ឱ្យបានទូលំទូលាយ និងប្រកប ដោយប្រសិទ្ធភាពឈានទៅសម្រេចបានគោលដៅយុទ្ធសាស្ត្រ ៩៥ ៩៥ ៩៥ នាឆ្នាំ២០២៥។ ហើយរាជរដ្ឋាភិបាលកម្ពុជាយល់ឃើញ ថា ការបញ្ចប់ ការរីករាលដាលមេរោគអេដស៍ ជំងឺអេដស៍ គឺជាសមាសភាគដ៏សំខាន់មួយនៅក្នុងការសម្រេចគោលដៅអភិវឌ្ឍន៍ប្រកបដោយនិរន្តរភាព(SDG)ផងដែរ ៕
