ខេត្តកំពង់ធំ ៖ ប្រភពព័ត៍មានពីប្រជាពលរដ្ឋស្ថិតនៅឃុំដំរីស្លាប់ ស្រុកកំពង់ស្វាយ ខេត្តកំពង់ធំ បានអោយគេហទំព័រ រស្មីក្រុងយើង ដឹងថាព្រៃសហគមន៏ (ដីព្រៃអ្នកតា) ដែលអ្នកភូមិរក្សាទុកសម្រាប់រកអុស បោចវល្លិ និងគោរពបូជា តាំងពីដូនតាជំនាន់មុនៗមក បច្ចុប្បន្នកំពុងត្រូវបានឈ្មួញ ឈ្មោះ ឆេង គូ មានទីលំនៅស្ថិតនៅឃុំសាន់គរ ស្រុកកំពង់ស្វាយ ប្រើប្រាស់គ្រឿងចក្រឈួសឆាយដីព្រៃអ្នកតានេះធ្វើជាកម្មសិទ្ធផ្ទាល់ខ្លួន ដោយមាន លោក ឡឹក យ័ន្ត តួនាទីត្រឹមជាប្រធានការិយាល័យ រៀបចំដែនដី នគរូបនីយកម្ម សំណង់ និងភូមិបាលស្រុកកំពង់ស្វាយចេញប័ណ្ណកម្មសិទ្វ អោយប្រើប្រាស់ក្លាយធ្វើជាដីកម្មសិទ្វស្របច្បាប់មិនញញឹតនិងអនុសាសន៏របស់សម្តេចប្រមុខរាជរដ្ឋាភិបាល។
ជាក់ស្តែងកាលពីថ្ងៃសុក្រ ៤រោច ខែ បុស្ស ឆ្នាំរកា ព.ស.២៥៦១ត្រូវនឹងថ្ងៃទី៥ ខែមករា ឆ្នាំ២០១៨ លោកព្រះរាជអាជ្ញាសាលាដំបូងខេត្តកំពង់ធំ និងមន្ត្រីជំនាញរដ្ឋបាលព្រៃឈើបានឃាត់ខ្លួនឈ្មោះ ឆេង គូ ទៅសួរនាំអំពីរឿង ហេតុអ្វីបានជាហ៊ានឈូសឆាយដីព្រៃសហគមន៏ ដែលត្រូវបានហាមឃាត់ដោយច្បាប់ភូមិបាល ប៉ុន្តែត្រូវបានម្ចាស់គ្រឿងចក្ររូបនេះបានអះអាងថាខ្លួនមានប្លង់កម្មសិទ្ធិត្រឹមត្រូវស្របច្បាប់ចេញដោយមន្ត្រីសុរិយាដីពិតប្រាកដ។
មតិប្រជាពលរដ្ឋជាច្រើនបានខ្សឹបប្រាប់ឲ្យដឹងថាមេឈ្មួញដុះស្លែរូបនេះអាងមានអ្នកធំនៅពីក្រោយ ដូច្នេះហើយមិនមានសមត្ថកិច្ចជំនាញក្នុងស្រុកកំពង់ស្វាយ ណាម្នាក់ហ៊ានចេញបង្ក្រាបនោះទេប្រជាពលរដ្ឋជាច្រើនដែលរស់នៅក្នុងស្រុកកំពង់ស្វាយ រង់ចាំមើលកណ្តាប់ដៃដែករបស់ ឯកឧត្តម សុខ លូ អភិបាលនៃគណៈអភិបាលជាប្រធានគណៈបញ្ជាការឯកភាពខេត្តកំពង់ធំផងដែរតើមានប្រសិទ្ធិភាពក្នុងកំរិតណាដើម្បីបង្ក្រាបបទល្មើសឈូសឆាយដីព្រៃសហគមនថែរក្សាតាំងពីដូនតាជំនាន់មុនៗមកនៅក្នុងស្រុកកំពង់ស្វាយនេះ ។
ប្រជាពលរដ្ឋនិងអ្នកច្បាប់ដាក់ការសង្ស័យថា ព្រៃសហគមន៏ជាទ្រព្យសម្បត្តិរបស់រដ្ឋ ចុះហេតុអ្វី លោក ឡឹក យ័ន្ត មានសិទ្ធរៀបចំចេញកម្មសិទ្ធស្របច្បាប់ទៅវិញ តើរឿងនេះមានអ្វីនៅពីក្រោយ តើប្រធានមន្ទីរ រៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ធំ បានជ្រាបទេជុំវិញការចោទប្រកាន់ពីប្រជាសហគមន៏ ឫមួយការរៀបចំចេញប័ណ្ណនេះត្រូវរូវគ្នាជាប្រព័ន្ធ។ ប្រសិនបើការរៀបចំចេញកម្មសិទ្វដីសហគមន៏នេះខុសច្បាប់មែនប្រាកដជាមានអំពើពុករលួយនៅក្នុងនេះជាមិនខានដូច្នោះមាត្រា ៥៩៤ នៃច្បាប់ប្រឆាំងនិងអំពើពុករលួយ (បទស៊ីសំណូក) អាចមានចំណាក់ការលើមន្ត្រីដែលពាក់ព័ន្ធជាពិសេស លោក ឡឹក យ័ន្ត ដែលជាមន្ត្រីរាជការសាធារណៈថ្លើមធំហានចេញបណ្ណ័កម្មសិទ្ធលើដីសហគមន៏។
ប្រសិនដូចការចោទប្រកាន់ពីប្រជាសហគមន៏ដូចនេះមែន ព្រមទាំងមានចំណាត់ការរបស់តុលាការ តើឯកឧត្តមទេសរដ្ឋមន្ត្រី ជា សុ ផារា រដ្ឋមន្ត្រី ក្រសួងដែនដី នគរូបនីយន៏កម្ម សំណង់ និងសុរិយោដី តើមានវិធានការយ៉ាងដូចម្តេះចំពោះមន្ត្រីខិលខូច ឃុបឃិត និងឈ្មួញលក់ដីសហគមន៏ គិតពីប្រយោជន៏ស៊ូនតួរប្រមូលប្រាក់ដាក់ចូលហោប៉ាវជាកម្មសិទ្ធរបស់ខ្លួនទៅវិញមិនគិតពីប្រយោជន៏រួម។
ចំពោះការចោទប្រកាន់ខាងលើនេះ គេហទំព័រ រស្មីក្រុងយើង មិនអាចសុំការបំភ្លឺពីលោក ឡឹក យ័ន្ត ប្រធានការិយាល័យ រៀបចំដែនដី នគរូបនីយកម្ម សំណង់ និងភូមិបាលស្រុកកំពង់ស្វាយ បាននៅឡើយទេ តែយើងនិងព្យាយាមបន្តទៀត៕
ដោយ ៖ សំណាង
