ខេត្តសៀមរាប ÷ នៅថ្ងៃទី០២ ខែធ្នូ ឆ្នាំ២០២២ នេះ បានបើកកិច្ចប្រជុំផ្សព្សផ្សាយបើកការិយាល័យចុះឈ្មោះបោះឆ្នោតជ្រើសរើសសមាជិកជ្រើសតាំងសភា ពាណិជ្ជកម្មខេត្តសៀមរាប-ឧត្តរមានជ័យ អាណត្តិទី៣ លើកទី១ ក្រោមអធិបតីភាព ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម លោក នាក់ ណេរ៉ុន អភិបាលរងខេត្តសៀមរាប រួមនឹងប្រតិភូអមដំណើរ តំណាងមន្ទីរ ប្រធាន-អនុប្រធាន សមាជិកសមាជិកាសភាពាណិជ្ជកម្មមណ្ឌលសៀមរាប-ឧត្តរមានជ័យ និងអាជីវករ ពាណិជ្ជករជាច្រើនរូប។
បើតាមលោកឧកញ្ញ៉ាបណ្ឌិត ហ៊ុយ ភាវ ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ បានបញ្ជាក់ថា សភាពាណិជ្ជកម្មកម្ពុជា នឹងរៀបចំបោះឆ្នោតជ្រើសរើសសមាជិកសមាជិកាជ្រើសតំាងសម្រាប់បំពេញការងារការិយាល័យប្រតិបត្តិអាណត្តិថ្មី សភាពាណិជ្ជកម្មមណ្ឌលសៀមរាប-ឧត្តរមានជ័យ នៅថ្ងៃទី២២ ខែមករា ឆ្នាំ២០២៣។ ក្នុងការបោះឆ្នោតអាណត្តិថ្មីនេះ សភាពាណិជ្ជកម្មកម្ពុជា ត្រូវបោះឆ្នោតជ្រើសរើសសមាជិកសមាជិកាជ្រើសតំាង ចំនួន១០រូប ដើម្បីបង្រប់កូរ៉ុម បោះឆ្នោតជ្រើសរើសប្រធាន អនុប្រធាន ហេរញ្ញិក លេខាធិការ សម្រាប់បំពេញការជាប្រចំាថ្ងៃជាមួយស្ថាប័នអង្គភាពផ្សេងៗ។ ក្នុងនោះសមាជិកសមាជិកាទាំងអស់ដែលចង់ឈរឈ្មោះជាសមាជិកសមាជិកាជ្រើសតំាង ត្រូវមកដាក់ពាក្យឈរឈ្មោះឲ្យហើយមុខថ្ងៃទី២៨ ខែធ្នូ ឆ្នាំ២០២២។
លោក នាក់ ណេរ៉ុន បានបង្ហាញថា ខេត្តសៀមរាប ជាខេត្តដែលមានសក្ដានុពលខ្លាំងទាំងវិស័យទេសចរណ៍ រួមនឹងវិស័យផ្សេងៗជាច្រើនទៀត ប៉ុន្តែលទ្ធផលដែលធ្វើបានសក្ដានុពលទាំងនោះ គឺមានតិចតួចតែប៉ុណ្ណោះដែលយើងមិនទាន់ធ្វើឲ្យអស់លទ្ធភាព។ បច្ចុប្បន្នខេត្តសៀមរាបទើបតែទទួលបាននូវសមិទ្ធិផលផ្លូវ ៣៨ខ្សែ ដែលជាអំណោយរបស់សម្ដេចតេជោ ដែលជាសមិទ្ធិ ផលមួយដ៏អស្ចារ្យសម្រាប់ប្រជាពលរដ្ឋខេត្តសៀម រាប។ ហើយសម្រាប់ថ្ងៃអនាគតផ្លូវតភ្ជាប់ពីខេត្តសៀមរាប ទៅកាន់បណ្ដាខេត្តផ្សេងៗ ក៏នឹងត្រូវបានរាជរដ្ឋាភិបាលគ្រោងធ្វើជាបន្តបន្ទាប់ ដូចជាផ្លូវពីខេត្តសៀមរាប ទៅខេត្តបាត់ដំបង ក៏ជាសសៃឈាមមួយដែលបង្កឲ្យខេត្តសៀមរាប កាន់តែលេចធ្លោបន្ថែមទៀតនៅក្នុងប្រទេសក្នុងវិស័យដឹកជញ្ជូន ការធ្វើដំណើរទៅកាន់ទីគ្រប់កន្លែងជិតឆ្ងាយ។
ឯកឧត្តម ម៉ៅ ថូរ៉ា មានប្រសាសន៍ថា សភាពាណិជ្ជកម្មពុំមានគោលនយោបាយផ្ទាល់ខ្លួននោះទេ គឺត្រូវអនុវត្តទៅតាមគោលនយោបាយរបស់រាជរដ្ឋាភិបាល ដែលបានកំណត់។ ក្នុងនោះក្រសួងមហាផ្ទៃកាលពីពេលថ្មីៗនេះ ក៏បានចេញនូវលិខិតមួយណែនាំដល់អាជ្ញាធរខេត្ត សហការជាមួយសភាពាណិជ្ជកម្ម ដើម្បីដោះស្រាយបញ្ហាដែលកើតមានឡើងក្នុងខេត្ត។ សព្វថ្ងៃនេះមានបញ្ហាចម្បងមួយ គឺការតាំងពិពរណ៌ ជាពិសេសប្រទេសជិតខាងចង់តាំងពិពរណ៌នៅប្រទេសកម្ពុជា ហើយភាគច្រើនផលិតផលរបស់ប្រទេសជិតខាងមានច្រើនជាងផលិតផលក្នុងស្រុក ដូចនេះសភាពាណិជ្ជកម្ម គួរតែធ្វើការសហការជាមួយប្រទេសជិតខាងរៀបចំជាពិពរណ៌ ឬធ្វើការតាំង ពិពរណ៌យើងនៅក្នុងប្រទេសជិតខាងក៏បាន ដើម្បីបង្ហាញផលិតផលក្នុងស្រុកយើងឲ្យកាន់តែទូលំទូលាយ។
ឯកឧត្តមរដ្ឋលេខាធិការ បានថ្លែងការកោតសរសើរ និងវាយតម្លៃខ្ពស់ ចំពោះខេត្តសៀមរាប ដែលមានសមាជិកសភាពាណិជ្ជកម្មក្នុងខេត្តច្រើនគួរឲ្យកត់ សម្គាល់ ដែលគាត់ចង់ចូលរួមជាមួយសភាពាណិជ្ជកម្មខេត្ត ដើម្បីពង្រឹងសភាពាណិជ្ជកម្មឲ្យកាន់តែរឹងមាំ ហើយអ្នកទាំងអស់នោះ គឺជាអាជីវករស្របច្បាប់ដែលកំពុងធ្វើអាជីវកម្មរបស់ខ្លួនផងដែរ។ ជាមួយគ្នានោះដើម្បីទទួលបានលទ្ធផលជាវិជ្ជមាន ក្នុងកិច្ចប្រជុំបើកការិយាល័យចុះឈ្មោះបោះឆ្នោតនាពេលនេះដែរ ឯកឧត្តម ក៏សូមសំណូមពរដល់អ្នកចូលរួមទាំងអស់ធ្វើការសាកសួរអោយបានផុលផុសសម្រាប់ជាប្រយោជន៍ដល់ការរីកចំរើនក្នុងសកម្មភាពធុរកិច្ចរបស់ខ្លួនផងដែរ៕
ដោយ ÷ ពន្លឺ
