ខេត្តសៀមរាប ÷ នាព្រឹកថ្ងៃទី ៣០ ខែ វិច្ឆិកា ឆ្នាំ២០២២នេះ មានធ្វើកិច្ចប្រជុំក្រុមប្រឹក្សាភិបាល សាលាសណ្ឋាគារនិងទេសចរណ៍ ប៉ូលឌុលប្រ៊ូល ក្រោមវត្តមានរបស់ឯកឧត្តម Paul Dubrule ស្ថាបនិករូបបករណ៍ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល ,ឯកឧត្តមបណ្ឌិត ពេជ្រ សោភណ្ឌ័ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ ,ឯកឧត្តម បាក់ សុខុម រដ្ឋលេខាធិការក្រសួងទេសចរណ៍ , លោកស្រី ម៉ននី រងី្ស អភិបាលរងខេត្តសៀមរាប ព្រមទាំងសហការីនៃសាលាសណ្ឋាគារនិងទេសចរណ៍ ប៉ូលឌុលប្រ៊ូល ផងដែរ ។
មានប្រសាសន៍នោះដែរឯកឧត្តម Paul Dubrule ស្ថាបនិករូបបករណ៍ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល បានលើកពីគោលបំណងនៃកិច្ចប្រជុំ ក្នុងការត្រួតពិនិត្យពីលទ្ធផលនៃការងារអនុវត្តបានក្នុងរយៈពេល២០ឆ្នាំមកនេះ ព្រមទាំង ដើមី្បធ្វើការអបអរសាទរខួបលើកទី២០ នៃការបង្កើតសាលាសណ្ឋាគារនិងទេសចរណ៍ ប៉ូលឌុលប្រ៊ូល ដើម្បីគាំទ្រដល់ការអប់រំ និងការអភិវឌ្ឍន៍យុវជនកម្ពុជា សំខាន់លើការបណ្តុះបណ្តាលវិជ្ជាជីវៈ និង ជំនាញផ្សេងៗនៅក្នុងវិស័យទេសចរណ៍នៅកម្ពុជា។
មានប្រសាសន៍នោះដែរឯកឧត្តមបណ្ឌិត ពេជ្រ សោភណ្ឌ័ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ និង ឯកឧត្តម បាក់ សុខុម រដ្ឋលេខា ធិការក្រសួងទេសចរណ៍ ក៏បានធ្វើការវាយតម្លៃខ្ពស់ ចំពោះសាលាសណ្ឋាគារ និងទេសចរណ៍ ប៉ូលឌុល ប្រ៊ូល ដែលបានយកចិត្តទុកដាក់ អនុវត្តការងារកន្លង មក សំខាន់ក្នុងការចូលរួមលើកស្ទួយនូវក្នុងវិជ្ជាជីវៈទេសចរណ៍ បានល្អប្រសើរ ។
ឯកឧត្តមទាំងពីរក៏បានបញ្ជាក់ថា សាលាសណ្ឋាគារនិងទេសចរណ៍ ប៉ូលឌុលប្រ៊ូល បានផ្តល់នូវចំណេះដឹង ការងារដល់យុវជនកម្ពុជា និងបានខិតខំបណ្តុះបណ្តាលក្នុងរយៈពេល២០ឆ្នាំមកនេះ ជួយដល់យុវជន កម្ពុជាយ៉ាងច្រើន ក្នុងការប្រកបរបស់ចិញ្ចឹមក្រុមគ្រួសារ សំខាន់លើការបណ្តុះបណ្តាលវិជ្ជាជីវៈទេស ចរណ៍ និងជំនាញជាច្រើនទៀតក្នុងវិស័យទេសចរណ៍ ។ ក្នុងនោះដែរឯកឧត្តមក៏បានធ្វើការគាំទ្រ ថ្លែងអំណរគុណ ចំពោះទឹកចិត្តដ៏ស្មោះរបស់ឯកឧត្តម Paul Dubrule និងលោកជំទាវ ដែលបានបង្កើតនូវសាលាវិជ្ជាជីវៈនេះឡើង ក្នុងការជួយលើវិស័យទេសចរណ៍នៅកម្ពុជា ព្រមទាំងសហការីបានខិតខំយកនូវចំណេះដឹងចែករំលែក ធ្វើការបណ្តុះបណ្តាលដល់យុវជនកម្ពុជា សំខាន់បានជួយផ្តល់នូវអាហារូបករណ៍ ដល់សិស្សក្រីក្រ នៅតាមតំបន់ជនបទ តាមបណ្តាខេត្តនានា នៃព្រះរាជាណាចក្រកម្ពុជា បានមកចូលរៀនវិជ្ជាជីវៈលើវិស័យសណ្ឋាគារ ទេសចរណ៍ និងជំនាញផ្សេងៗទៀត ។
ឯកឧត្តមក៏បានបន្តទៀតថា ក្រោមការយកចិត្តទុកដាក់របស់សម្តេចតេជោ ហ៊ុន សែន នាយករដ្ឋមន្ត្រី ក្នុងការប្រយុទ្ធប្រឆាំងនឹងជម្ងឺកូវិដ១៩ បានធ្វើការចាក់ស្រោចនូវវ៉ាក់សាំងជូនប្រជាពលរដ្ឋ មិនប្រកាន់និន្នាការនយោបាយ ដោយឥតគិតថ្លៃ ចាប់ពីដូលមូលដ្ឋានរហូតដល់ដូស ជម្រុញ បានធ្វើឲ្យជម្ងឺកូវិដ១៩នៅកម្ពុជា មានភាពធូស្រាល ។ ក្រោយការបើកប្រទេសឡើងវិញ ដែលជាពេលវេលាមួយសមស្របក្នុងការបើកដំណើរការបណ្តុះបណ្តាលជំនាញទេសចរណ៍ ដើមី្បក្នុងការទទួលស្វាគមន៍ភ្ញៀវទេសចរណ៍។ ក្នុង នោះឯកឧត្តមក៏បានសំណូមពរ ដល់សាលាសណ្ឋា គារ និងទេសចរណ៍ ប៉ូលឌុលប្រ៊ូល បន្តក្នុងការបណ្តុះបណ្តាលធនធាន មនុស្ស លើវិស័យទេសចរណ៍ ឲ្យប្រកបទៅដោយជោគជ័យទៀតផង ៕
ដោយ ÷ ពន្លឺ
