ខេត្តសៀមរាប ÷ ក្រសួងព័ត៌មាន សហការជាមួយក្រសួងសេដ្ឋកិច្ច និងហិរញ្ញវត្ថុបានរៀបចំសិក្ខាសាលា ស្តីពីពីគោលនយោបាយគ្រប់គ្រងផ្ទៃក្នុង និងនីតិវិធីសវនកម្ម ដើម្បីពង្រឹងសមត្ថភាព បន្ថែមជូនមន្ត្រីជំនាញនៅតាមអង្គភាពចំណុះក្រសួងព័ត៌មាន ក្នុង រយៈពេល២ថ្ងៃ គឺចាប់ពីថ្ងៃទី ២៤ ដល់ថ្ងៃទី២៥ ខែ វិច្ឆិកា ឆ្នាំ២០២២ នៅសណ្ឋាគារអង្គរប៉ារាឌី ក្នុងក្រុងសៀមរាប ក្រោមអធិបតីភាពឯកឧត្តម ថាច់ ផែន រដ្ឋលេខាធិការ និងជាប្រធានក្រុមការងារកំណែទម្រង់ ការគ្រប់គ្រងហិរញ្ញវត្ថុសាធារណ:នៃក្រសួងព័ត៌មាន ។
មានប្រសាសន៍បើកអង្គសិក្ខាសាលានេះ ឯកឧត្តម ថាច់ ផែន បញ្ជាក់ថា សិក្ខាសាលានេះនឹងផ្ដល់ឱកាស ក្នុងការពង្រឹងចំណេះដឹង និងលើកកម្ពស់ការយល់ដឹងបន្ថែមអំពីគោលការណ៍ត្រួតពិនិត្យផ្ទៃក្នុង បច្ចេកវិទ្យាព័ត៌មាន និងគោលការណ៍ណែនាំសវនកម្មលើ បច្ចេក វិទ្យាព័ត៌មានវិទ្យា សំដៅចូលរួមចំណែកលើកកម្ពស់កំណែទម្រង់ការគ្រប់គ្រងហិរញ្ញវត្ថុសាធារណៈនៅកម្ពុជា ហើយក៏ជាវេទិកាមួយដែលអាចឱ្យមន្ត្រីជំនាញទាំងអស់ ចែករំលែកចំណេះដឹងការអនុវត្តល្អៗ និង បទពិសោធន៍ការងារ ពាក់ព័ន្ធនឹងវិស័យហិរញ្ញវត្ថុសាធារណៈទៅវិញទៅមក។
ឯកឧត្តម បន្តថា មន្ត្រីជំនាញនៅតាមអង្គភាពចំណុះក្រសួងព័ត៌មាននីមួយៗ ត្រូវប្រឹងប្រែងស្វែងយល់លម្អិតអំពីគោលការណ៍ត្រួតពិនិត្យផ្ទៃក្នុងបច្ចេកវិទ្យាព័ត៌មាន និងគោលការណ៍ណែនាំសវនកម្មលើ បច្ចេក វិទ្យាព័ត៌មានវិទ្យា ដើម្បីឱ្យការអនុវត្តការងារគ្រប់គ្រង ហិរញ្ញវត្ថុសាធារណៈ ប្រកបដោយប្រសិទ្ធភាពខ្ពស់ ហើយការទទួលខុសត្រូវខ្ពស់របស់លោក លោកស្រីទាំងអស់គ្នានេះ គឺជាការរួមចំណែកដ៏ថ្លៃថ្លាដល់ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជា។
ក្នុងឱកាសនោះដែរ ឯកឧត្តម ថាច់ ផែន ក៏បានជំរុញដល់សិក្ខាកាមទាំងអស់ តាមដានស្តាប់នូវបទបង្ហាញដែលនឹងឧទ្ទេសនាមជូន ដោយ លោក អ៊ុ យុត្ថារ៉ូ ប្រធានការិយាល័យសវនកម្មបច្ចេកវិទ្យាថ្នាក់មូលដ្ឋាននៃក្រសួងសេដ្ឋកិច្ច និងហិរញ្ញវត្ថុ ពិសេសត្រូវលើកជាសំណួរ និងចម្ងល់ ដើម្បីទទួលនូវការបកស្រាយ និងបញ្ជាក់បន្ថែមពីវាគ្មិន ដើម្បីពង្រឹងសមត្ថភាពរបស់ខ្លួនឱ្យយល់កាន់តែច្បាស់អំពីគោលនយោបាយគ្រប់គ្រងផ្ទៃក្នុង និងនីតិវិធីសវនកម្ម សម្រាប់ការចូលរួមចំណែកក្នុងការអនុវត្តកម្មវិធីកែទម្រង់ការគ្រប់គ្រង ហិរញ្ញវត្ថុសារធាណៈ ប្រកបដោយប្រសិទ្ធភាពខ្ពស់៕
ដោយ ÷ ពន្លឺ
