ខេត្តសៀមរាប ÷ ថ្លែងក្នុងឱកាសប្រគល់ឯកសណ្ឋាន ថវិកា និងគ្រឿងឧបភោគបរិភោគមួយចំនួន ជូនដល់កម្លាំងប្រជាការពារភូមិ ក្នុងឃុំស្លែងស្ពាន ស្រុកស្រីស្នំ ខេត្តសៀមរាប នៅព្រឹកថ្ងៃទី១៩ ខែវិច្ឆិកា ឆ្នាំ២០២២ នេះ ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្តសៀមរាប បានមានប្រសាសន៍ថា បច្ចុប្បន្ននេះកម្លាំងប្រជាការពារភូមិ គឺបានចូលរួមចំណែកយ៉ាងច្រើនក្នុងការការពារសន្តិសុខ និងសុវត្ថិភាពនៅក្នុងមូលដ្ឋាន បើទោះជាពួកគាត់មិនបានទទួលប្រាក់ខែក៏ដោយ ក៏ឆន្ទៈ និងទឹកចិត្តរបស់ពួកគាត់ នៅតែឈរលើជំហរសាមគ្គីភាព ស្រឡាញ់រាប់អានគ្នា ចេះជួយទុកធុរៈគ្នាទៅវិញទៅមក ចូលរួមបញ្ចៀសនូវបទល្មើសផ្សេងៗដែលកើតឡើងជាយថាហេតុក្នុងមូលដ្ឋាន។
ឯកឧត្តម លីវ សុខុន មានប្រសាសន៍ទៀតថា ការចូលរួមដ៏សកម្មរបស់កម្លាំងប្រជាការពារភូមិនេះដែរ គឺអាចចាត់ទុកថា ជាកម្លាំងស្នូលដ៏សំខាន់នៅមូលដ្ឋានដោយផ្ទាល់ មិនថាស្ថិតនៅក្នុងកាលៈទេសៈលំបាកយ៉ាងណាក៏ដោយ។ លោកក៏បានថ្លែងកោតសរសើរដល់ស្នាដៃសកម្មភាពក្នុងរយៈពេលកន្លងមករបស់ប្រជាការពារក្នុងមូលដ្ឋានទាំងអស់ ដែលបងប្អូនមានឆន្ទៈមុតមាំ ក្នុងការសហការចូលរួមការពារសុវត្ថិភាពក្នុងមូលដ្ឋានរបស់ខ្លួន ជាមួយមន្ត្រីមានសមត្ថកិច្ចគ្រប់ជាន់ថ្នាក់ ដើម្បីចូលរួមអនុវត្តគោលនយោបាយភូមិឃុំមានសុវត្ថិភាព។ ដើម្បីឆ្លើយតបនឹងស្មារតីជួយគ្នាទៅវិញទៅមកនេះ ទើបឯកឧត្តម និងក្រុមការងារបានកៀរគររកថវិកា និងសម្ភារៈផ្សេងៗពីសប្បុរសជននានា រួមនឹងធនធានផ្ទាល់ខ្លួនយកមកជួយឧបត្ថម្ភដល់បងប្អូនជាបន្តបន្ទាប់។
មានប្រសាសន៍ក្នុងឱកាសនោះដែរ លោក ហ៊ន់ ឬទ្ធិ អភិបាលស្រុកស្រីស្នំ បានថ្លែងអំណរគុណចំពោះឯកឧត្តមប្រធានមន្ទីរ រួមនឹងក្រុមការងារទាំងអស់ ដែលតែងតែមានការយកចិត្តទុកដាក់ខ្ពស់ពីសុខទុក្ខរបស់ បងប្អូនប្រជាការពារក្នុងមូលដ្ឋានឃុំស្លែងស្ពាន ដោយបានធ្វើការឧបត្ថម្ភនូវរាល់សម្ភារៈ ថវិការ រួមនឹងគ្រឿងឧបភោគបរិភោគជូនដល់កងកម្លាំងប្រជាការពារភូមិយើងជាបន្តបន្ទាប់។ ជាក់ស្ដែងសម្រាប់ការប្រគល់ជូននូវឯកសណ្ឋានថ្មីបន្ថែមដល់បងប្អូនប្រជាការពារភូមិនាពេលនេះដែរ គឺជាការបង្ហាញឲ្យឃើញពីការយកចិត្តទុកបន្ថែមទៀតដល់កម្លាំងយើង ហើយជាការផ្ដល់នូវកម្លាំងចិត្ត និងពង្រឹងស្មារតីបន្ថែមទៀតដល់កងកម្លាំងទាំងអស់ ដើម្បីមានទំនុកចិត្ត និងទឹកចិត្តក្នុងការពារបំពេញភារកិច្ចការងារ ការពារសន្ថិសុខសុវត្តិភាពក្នុងមូលដ្ឋាន ធ្វើយ៉ាងឲ្យមូលដ្ឋានមានភាពសុខដុមរមនា ភូមិឃុំមានសុវត្ថិភាព មានការរីក ចម្រើនលើគ្រប់វិស័យ លុបបំបាត់រាល់ភាពអសន្តិសុខ ករណីគ្រឿងញៀន ករណីចោរកម្ម និងករណីផ្សេងៗទៀត។
សូមជម្រាបថា អំណោយដែលបាននាំយកមកប្រគល់ ជូនកងកម្លាំងប្រជាការពារភូមិនាពេលនេះដែរ មាន ឯកសណ្ឋានប្រជាការពារចំនួន ៤២កំប្លេរ គ្រឿងឧបភោគបរិភោគ និងថវិកាមួយចំនួន។
ក្នុងឱកាសនោះដែរ លោក ហ៊ន់ ឬទ្ធិ អភិបាលស្រុកស្រីស្នំ ក៏បានឧបត្ថម្ភបន្ថែមនូវ អង្ករ ១បេ, ត្រីខ ៥យួរ, ទឹកត្រី-ទឹកស៊ីអ៊ីវ ៤យួរ និងភេសជ្ជមួយចំនួនទៀតផងដែរ៕
ដោយ ÷ ពន្លឺ
