កិច្ចប្រជុំពិសេសលើកទី២ ឆ្នាំ២០២២ របស់គណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា)

ខេត្តសៀមរាប ÷ កម្ពុជាធ្វើជាម្ចាស់ផ្ទះរៀបចំកិច្ចប្រជុំពិសេសលើកទី២ ឆ្នាំ២០២២ របស់គណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា-AICHR) នៅថ្ងៃទី១៦ ខែវិច្ឆិកា ឆ្នាំ២០២២ នៅសណ្ឋាគារ អេមព្រីស អង្គរ ខេត្តសៀមរាប ដែលមានរយៈពេល២ ថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែសីហា ឆ្នាំ២០២២ ។កិច្ចប្រជុំនេះដឹកនាំដោយ        ឯកឧត្តម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី ជាប្រធានគណៈកម្មាធិការសិទ្ធិមនុស្សកម្ពុជា តំណាងកម្ពុជាប្រចាំអាយឆា និងជាប្រធានអាយឆាឆ្នាំ២០២២ ដោយមានការចូលរួមពីតំណាងប្រទេសជាសមាជិកអាស៊ាន ទាំងអស់ប្រចាំអាយឆា និង លេខាធិការដ្ឋានអាស៊ានផងដែរ ។

កិច្ចប្រជុំនេះ នឹងធ្វើការពិនិត្យទៅលើ ខ្លឹមសារនៃសេចក្ដីព្រាងរបាយការណ៍មួយចំនួន ពាក់ព័ន្ធទៅនឹងកិច្ចប្រជុំរបស់អាយឆា កិច្ចជំនួបនានារវាងអាយឆាជាមួយភាគីពាក់ព័ន្ធ និងកម្មវិធីផ្សេងៗ ដែលបានរៀបចំនាពេលកន្លងមក ។ បន្ថែមលើនេះ កិច្ចប្រជុំក៏បានពិភាក្សាទៅលើវឌ្ឍនភាពនៃឯកសារ ទស្សនទាន សកម្មភាព និងរបាយការណ៍នៃសកម្មភាព/កម្មវិធីមួយចំនួនរបស់អាយឆា ដែលពាក់ព័ន្ធនឹងការប្រើប្រាស់បច្ចេកវិទ្យាព័ត៌មាននិងទូរគមនាគមន៍ក្នុងការលើកកម្ពស់និងការពារសិទ្ធិសុខភាព សិទ្ធិទទួលបានទឹក ស្អាតនិងអនាម័យ អន្តរសាសនា ការវាយតម្លៃលើផលប៉ះពាល់បរិស្ថានដោយផ្អែកលើអភិក្រមសិទ្ធិមនុស្ស និងការបញ្ជ្រាបសិទ្ធិជនមានពិការភាព ។

នៅរសៀលថ្ងៃនេះផងដែរ ឯកឧត្តម កែវ រ៉េមី ប្រធានអាយឆា នឹងដឹកនាំគណៈប្រតិភូអាយឆាជួបប្រជុំដាច់ដោយឡែកមួយ ជាមួយក្រុមការងារអង្គការសហប្រជាជាតិ ដឹកនាំដោយ លោកស្រី Cynthia Veliko តំណាងប្រចាំតំបន់អាស៊ី អគ្នេយ៍ នៃការិយាល័យឧត្តមស្នងការសិទ្ធិមនុស្សអង្គការសហប្រជាជាតិ ក្នុងគោលបំណងពង្រឹងទំនាក់ទំនង និងកិច្ចសហប្រតិបត្តិការរវាងអាយឆា និង អង្គការសហប្រជាជាតិ សំដៅធ្វើការការពារនិងលើកកម្ពស់សិទ្ធិមនុស្សក្នុងតំបន់អាស៊ាន ។

នៅថ្ងៃបញ្ចប់នៃកិច្ចប្រជុំ ក៏នឹងមានពិធីផ្ទេរតួនាទីជាប្រធានអាយឆាឆ្នាំ២០២២ ពី អាយឆា-កម្ពុជា ទៅឱ្យ អាយឆា-ឥណ្ឌូនេស៊ី ជាប្រធានក្នុងឆ្នាំ២០២៣៕

ដោយ ÷ ពន្លឺ