ខេត្តសៀមរាប ÷ នៅរសៀលថ្ងៃទី១៤ខែវិច្ឆិកាឆ្នាំ២០២២នេះ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធលើផ្ទៃប្រទេស បានដឹកនាំកម្លាំងជំនាញ មេបញ្ជាការ មេបញ្ជាការរង និងមន្ត្រីជំនាញនៃកងរាជអាវុធហត្ថខេត្តសៀមរាប សហការជាមួយអ្នកគ្រប់គ្រងសណ្ឋាគារ ចុះត្រួតពិនិត្យផ្ទាល់តាមគោលដៅសំខាន់ៗ ដែលបានកំណត់ ដើម្បីត្រៀមការពារ សន្តិសុខ សុវត្ថិភាព ក្នុងពេលប្រជុំនិងស្នាក់នៅ របស់គណៈប្រតិភូយោធាជាន់ខ្ពស់ នៃកិច្ចប្រជុំក្រសួងការពារជាតិអាស៊ានដែលនឹងរៀបចំឡើងក្នុងពេលឆាប់ៗនៅទឹកដីអង្គរខេត្តសៀមរាប។
ឯកឧត្តម នាយឧត្តមសេនីយ៍ សៅ សុខា បានអញ្ជើញពិនិត្យនៅតាមទីតាំងគោលដៅដែលបានកំណត់ ដូចជា សណ្ឋាគារសុខាសៀមរាប បន្ទាយមូលដ្ឋានកងរាជអាវុធហត្ថក្រុងសៀមរាប សណ្ឋាគារ FCCសណ្ឋាគារ ផាកហៃយ៉ាត់ សៀមរាប មហាសណ្ឋាគារអង្គរ ដោយបានពិនិត្យនិងកំណត់ទៅលើទីតាំងបន្ទប់សម្រាប់កិច្ចប្រជុំ បន្ទប់បដិសណ្ឋារកិច្ច ទីកន្លែងទទួលទានអាហារ បន្ទប់ស្នាក់នៅរបស់ភ្ញៀវ ព្រមទាំងប្រព័ន្ឋកាមេរ៉ាសុវត្ថិភាពរបស់សណ្ឋាគារទាំងនោះ ពិនិត្យស្ថានភាពភូមិសាស្ត្រតាមដងផ្លូវសំខាន់ៗមួយចំនួនក្នុងក្រុងសៀមរាបផងដែរ។ល។
ឯកឧត្តមនាយឧត្តមសេនីយ៍ សៅ សុខា បានណែនាំដល់អ្នកគ្រប់គ្រងសណ្ឋាគារទាំង៥គោលដៅ ឱ្យយកចិត្តទុកដាក់ខ្ពស់ ក្នុងការរៀបចំដើម្បីរក្សាបាននូវសណ្តាប់ធ្នាប់ របៀបរៀបរយនិងសុវត្ថិភាព សេចក្តីថ្លៃថ្នូរ ចៀសវាងនូវបញ្ហាកើតឡើងជាយថាហេតុ។
ឯកឧត្តម នាយឧត្តមសេនីយ៍ ក៏បានណែនាំនិងផ្តល់អនុសាសន៍ ដល់មន្ត្រីក្រោមឱវាទ ជាពិសេស មេបញ្ជាការ មេបញ្ជាការរង នៃកងរាជអាវុធហត្ថខេត្តសៀមរាប ត្រូវសហការដឹកនាំរៀបចំ ពិនិត្យដោយហ្មត់ចត់ទៅលើសម្ភារៈនិងមធ្យោបាយនាំក្បួនគណៈ ប្រតិភូ កំណត់គោលដៅឈរជើងប្រចាំបញ្ជា និងចាត់តាំងកម្លាំងផ្លាស់ប្តូរយាមកាមតាមគោល ដៅឱ្យបានច្បាស់លាស់ សហការជាមួយកម្លាំងសមត្ថកិច្ចនគរ បាលខេត្ត និងកម្លាំងសមត្ថកិច្ចពាក់ព័ន្ឋ ដើម្បីពង្រឹងយន្តការងាររក្សាសន្តិសុខសុវត្ថិភាពសម្រាប់កិច្ចប្រជុំដ៍មានអត្ថន័យនិងសារៈសំខាន់នេះ ឱ្យមានប្រសិទ្ឋភាពខ្ពស់ ដោយឈរលើស្មារតីសហការ ឯកភាព សាមគ្គីភាព និងភាពទទួលខុសត្រូវ សំដៅធ្វើយ៉ាងណារក្សាសន្តិសុខសុវត្ថិភាពឱ្យមានប្រសិទ្ឋិភាពខ្ពស់ ទាំងទិដ្ឋភាពភូមិសាស្ត្រខាងក្រៅនិងទិដ្ឋភាពខាងក្នុងអគារសណ្ឋាគារ ដោយយកគំរូតាមយុទ្ឋសាស្ត្រការពារសន្តិសុខ សុវត្ថិភាពនៃកិច្ចប្រជុំកំពូលអាស៊ានលើកទី៤០និងទី៤១ក្នុងរាជធានីភ្នំពេញដែលកម្ពុជាធ្វើជាម្ចាស់ផ្ទះ ទទួលបានជោគជ័យយ៉ាងត្រចះត្រចង់។
សូមជំរាបថា៖កិច្ចប្រជុំការពារជាតិអាស៊ាននឹងរៀបចំ ពីថ្ងៃទី២១ដល់២៣ខែវិច្ឆិកាឆ្នាំ២០២២ នៅសណ្ឋាគារសុខាសៀមរាប និងមានវត្តមានថ្នាក់ដឹកនាំយោធាជាន់ខ្ពស់មកពីបណ្តាប្រទេសក្នុងតំបន់អាស៊ាន បណ្តាប្រទេសដៃគូអភិវឌ្ឍន៏និងប្រទេសមហាអំណាចក្នុងពិភពលោកផងដែរ៕
ដោយ ÷ ពន្លឺ
