ឆ្នោតកន្ទុយលេខយួននិងភ្នាល់បាល់ បើកលេងយ៉ាងតិច៧ទីតាំង ខាងក្រោយផ្សារម៉ុងឌីយ៉ាល់ តើនៅជុំវិញផ្សារមានប៉ុន្មានទីតាំងទៀត? លោក អ៊ូ ណារឹទ្ធ មេប៉ុស្តិ៍សង្កាត់ផ្សារដើមគ ផ្គើនបំរាមប្រមុខរដ្ឋាភិបាល ឬ មកពីមេកន្ទុយលេខខ្នងក្រាស់?

រាជធានីភ្នំពេញ ៖ ល្បែងសុីសងចាក់កន្ទុយលេខឆ្នោតយួននិងល្បែងភ្នាល់បាល់កំពុងបើកអោយលេងយ៉ាងគគ្រឹកគគ្រេង នៅចំណុចខាងក្រោយផ្សារម៉ុងឌីយ៉ាល់ តាមផ្លូវឌឿងហែមផ្នែកខាងកើត ផ្នែកខាងត្បូងនិង តាមផ្លូវ២៣១ យ៉ាងតិច៧ទីតាំង បើនៅជុំវិញផ្សារម៉ុងឌីយ៉ាល់វិញអាចមានលើសពី១៥ទឺតាំងក្នុងសង្កាត់ផ្សារដើមគ ក្នុងទឹកដីរបស់លោកមេប៉ុស្តិ៍នគរបាលរដ្ឋបាលផ្សារដើមគរ។

ប្រភពពីអ្នកចូលទៅលេងល្បែងកន្ទុយលេខនិងចាក់បាល់ក្រោយផ្សារម៉ុងឌីយ៉ាល់អោយដឹងថា៖ក្នុង ចំណោម ផ្ទះកត់កន្ទុយលេខនិងកត់បាល់គឺនៅផ្ទះលេខ៣ផ្លូវលេខ២៣១ ជាហាងលក់កាហ្វេ ភ្នាល់បាល់ចាក់កន្ទុយលេខយួនធំជាងគេបង្អស់ក្នុងចំណោមហាងបង្កប់ល្បែងម្តុំនោះ។

ប្រភពថា ម្ចាស់ហាងកត់ឆ្នោតកន្ទុយលេខយួនផ្ទះ លេខ៣ផ្លូវ២៣១ជាជនជាតិមហាមិត្តយួនសុទ្ធ ម្ចាស់ផ្ទះនេះបើក កត់កន្ទុយលេខយួន ចាក់ភ្នាល់បាល់ទ្រង់ទ្រាយ​ធំយូរហើយ។ មិនដឹងថាគាត់មានខ្នងក្រាស់បុិនណាអោយមេប៉ុស្តិ៍គាត់ព្រឺរោម ឬលោកមេប៉ុស្តិ៍គាត់ផ្គើនបទបញ្ជាឯ.ឧស្នងការ ស ថេត ដោយខ្លួនឯងឬយ៉ាងណាទេ ទើបបន្ទាប់ពីមានបំរាមតឹងដូចចងស្លាបសេកមក គាត់ផ្អាកបានមួយដង្ហើមចង្រិតដែរ។ តែផ្អាកលេងពីមុនលួចបុកពីក្រោយបិទទ្វារលេងរំភើយ ធ្វើដូចគោរពតាមអនុសាន៍ហាមឃាត់របស់សម្តេចនិងបទបញ្ជាក្រសួង មហាផ្ទៃនឹងគេដែរអីចឹង!។ពេលនេះម៉ោងនេះកំពុងដំណើរការ​យ៉ាង​រលូន​ នៅក្នុងទឹកដីសង្កាត់ផ្សារដើមគរ។

លោកចៅសង្កាត់ផ្សារដើមគរ និងលោកមេប៉ុស្តិ៍ផ្សារដើមគរ ព្រមទាំងលោកអធិការ​នគរបាល​ខណ្ឌទួល គោក មិនអាចសុំបំភ្លឺអំពី ការបើកដៃបើកអោយលេងល្បែងខុសច្បាប់ផ្គើនបទបញ្ជាសម្តេច និងបទបញ្ជាក្រសួងមហាផ្ទៃបានទេកាលពីព្រឹកមិញ៕

ដោយ ÷ ពុទ្ធី