ខេត្តសៀមរាប ÷ នៅរសៀលថ្ងៃទី៧ ខែវិច្ឆិកាឆ្នាំ២០២២ អង្គកឋិនទានសាមគ្គី ផ្តួចផ្តើមដោយ គណៈកម្មការអាចារ្យអាជ្ញាធរមូលដ្ឋានភូមិសង្កាត់ព្រមទាំង ពុទ្ឋបរិស័ទក្នុងមូលដ្ឋានចំណុះជើងវត្តនិងប្រជាពុទ្ឋបរិស័ទជិតឆ្ងាយ បានដង្ហែអង្គឋិនចូល វត្តប្រាសាទគោកចកស្ថិតក្នុងសង្កាត់គោកចក ក្រុង សៀមរាប ខេត្តសៀមរាប ។ ក្រៅពីសំពត់ស្បង់ ត្រៃ ចីពរ និងសម្ភារៈជាបរិវារអមកឋិន សម្រាប់វេរប្រគេនព្រះសង្ឃគង់ចាំវស្សាអសើត្រីមាសក្នុងវត្តៗប្រាសាទគោកចកក៏ទទួលបានបច្ច័យ ចំនួនជាង៥៥លានរៀលនិងម៉ាស៊ីនភ្លើងមួយគ្រឿងកម្លាំង៤៥KVAមានតម្លៃជាង៥ពាន់ដុល្លារពីសប្បុរសជននិងអ្នកផ្តួចផ្តើមនៃអង្គកឋិនផងដែរ ។
ព្រះគ្រូវិចិត្រវង្សា ញាតិធម្មោ ហែម គឹមសាន ព្រះគ្រូចៅអធិការវត្ត មានថេរៈដិការថា៖បច្ច័យអមត្រៃដែលទទួលបានពីអង្គកឋិនទាននៅឆ្នាំនេះ នឹងយកទៅទូទាត់ការរៀបពិធី មួយផ្នែកសម្រាប់បែងចែក ចតុ បច្ច័យដល់ព្រះសង្ឃនិងមួយផ្នែកទៀតនឹងសន្សំទុកសម្រាប់កសាងសាលាឆាន់ថ្មី ខណៈសាលាឆាន់ចាស់មានសភាពទ្រុឌទ្រោមតូចចង្អៀត។ ចំណែកម៉ាស៊ីនភ្លើងបានផលប្រយោជន៍ជាច្រើនសម្រាប់វត្តនៅពេលដាច់ចរន្តអគ្គិសនីម្តងៗ ជាពិសេសជួយផ្តល់ឋាមពលដល់បង្គោលអង់តែនវិទ្យុទាក់ទងសម្រាប់ធ្វើទំនាក់ទំនងរវាងសមត្ថកិច្ចជាមួយប្រជាការពារភូមិនិងអាជ្ញាធរមូលដ្ឋាន ដើម្បីរួមគ្នាអនុវត្តឱ្យមានប្រសិទ្ឋភាពនូវគោលនយោបាយភូមិឃុំមានសុវត្ថិភាព។
ព្រះអង្គបន្តថា៖ម៉ាស៊ីនភ្លើងនេះទទួលបានពីសទ្ឋាជ្រះថ្លាប្រគេនមកវត្តរបស់ពុទ្ឋបរិស័ទនៅភ្នំពេញ ដូចជា លោក លី វណ្ណៈ និងអ្នកស្រីឃុត ស្រីវង់ លោកស្រី លីឈីងអ៊ី និងលោក ង៉ែត ឆៀងលី ព្រមទាំងបងប្អូនក្រុមគ្រួសារ ថែមទាំងទទួលបានប្រេងម៉ាស៊ូតចំនួន ៩០លីត្រពីសប្បុរសខ្លះទៀតជាដើម។ ព្រះអង្គថា៖ជាធម្មតា ព្រះសង្ឃពឹងលើទាននិងបច្ច័យពីប្រជាពុទ្ឋបរិស័ទ ទីវត្តអារាមដែលមានការរីកចំរើនទៅបានគឺមិនអាចខ្វះបានពីការចូលរួមរបស់ប្រជាពុទ្ឋបរិស័ទជិតឆ្ងាយដែលមានសទ្ឋាជឿជាក់លើព្រះពុទ្ឋសាសនា ក្រោម គោលការណ៍ជាមូលដ្ឋាន ព្រះពុទ្ធសាសនា ផ្សារភ្ជាប់ សង្គម ទើបអាចអភិវឌ្ឍន៍និងកសាងទីអារាមបានសមរម្យ។
បើតាមការប្រកាសក្នុងពិធីវេរអង្គកឋិនប្រគេនដល់ព្រះសង្ឃរបស់ គណៈកម្មការអាចារ្យវត្តថា៖ អង្គកឋិនទានរៀងរាលឆ្នាំ កើតឡើង ដោយសារជំនឿដ៍មុតមាំរបស់ដូនជីតាជីបងប្អូនប្រជាពុទ្ឋបរិស័ទដែលគោរពនិងជឿជាក់លើព្រះពុទ្ឋសាសនា បានស្តាប់ព្រះធម៌ហើយបាន ដឹងថាកឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជា អ្នកទទួលក្រាលគ្រង ផង និងបានគិតពិចារណាដឹងច្បាស់ថាអាយុសង្ខាររបស់ខ្លួនមិនទៀងមិនស្ថិតស្ថេរ ទើបរៀបចំផ្តួចផ្តើមមូលមតិគ្នាជាឯកច្ចឆ័ន្ទធ្វើបុណ្យទានផ្សេងៗ ជាពិសេសកឋិនទានជាទានប្លែកពីទានដ៍ទៃ ប្លែកដោយកាល មានត្រឹមតែ២៩ ថ្ងៃប៉ុណ្ណោះប្លែកដោយវត្ថុ គឺវត្ថុសម្រាប់កឋិនមាន៣ សង្ឃាដី ចីវរ ស្បង់ តែប៉ុណ្ណោះ ៕
ដោយ ÷ ពន្លឺ
