វត្តស្វាយរមៀតរៀបចំពិធីប្រណាំងទូកលក្ខណៈប្រពៃណីលើកទី៥ដើម្បីរក្សាប្រពៃណីទំនៀមទំលាប់ក្នុងសហគមន៍និងអបអរសាទរអង្គកឋិនទាន

ខេត្តសៀមរាប÷ នៅព្រឹកថ្ងៃទី០៥ ខែ វិច្ឆិកាឆ្នាំ២០២២ ព្រះគ្រូចៅអធិការ គណៈកម្មការវត្តនិងប្រជាពុទ្ឋបរិស័ទចំណុះជើងវត្តបារាយមហានទីរតនា រាម ហៅវត្តស្វាយរមៀតបានរៀបចំពិធីប្រណាំង ទូកលក្ខណៈប្រពៃណី លើកទី៥ ក្នុងគោលបំណងរឹតចំណងបង្កើនសាមគ្គីភាពរវាងវត្តអារាមនិងពុទ្ឋបរិស័ទ រក្សាប្រពៃណីទំនៀមទំលាប់របស់ខ្មែរ ដោយពិធីអុំទូកលក្ខណៈប្រពៃណីនៅអារាមនេះត្រូវបានអាក់ខានអស់រយៈពេលពីរឆ្នាំជាប់គ្នា ដោយសារតែការឆ្លងរីករាលដាលនៃជំងឺកូវីដ-១៩។

ព្រះសច្ចានុបាល នឿម វុទ្ឋី ព្រះចៅអធិការវត្ត បានមានសង្ឃដីកាថា ពិធីប្រណាំងទូក បែបប្រពៃណីនេះ ប្រារព្ធឡើងក្នុងគោលបំណង ដើម្បីចូលរួមថែរក្សានូវប្រពៃណីជាតិដែលជាប់ទាក់ទងទៅនឹងប្រវត្តិសាស្រ្ត សមយុទ្ធនៃកម្លាំងសាមគ្គីកងទ័ពជើងទឹក និង ដើម្បីថែរក្សាប្រពៃណីរវាងវត្តនិងសហគមន៍ដែលធ្លាប់មាន មកកុំឱ្យបាត់បង់ ព្រមទាំង ដើម្បីអបអរសាទរចំពោះបុណ្យកឋិនទានសាមគ្គីដង្ហែចូលវត្តអោយមានភាពអធិកអធម និងប្រកបដោយបរិយាកាសសប្បាយរីករាយ ដោយផ្សារភ្ជាប់ទំនៀមទំលាប់ប្រពៃណី និងវប្បធម៌ លើសពីនេះទៀតក៏មានគោលបំណងទាក់ ទាញភ្ញៀវទេសចរជាតិ-អន្តរជាតិ ប្រជាពលរដ្ឋពីគ្រប់ទិសទីមកលេងកម្សាន្ត រួមទាំងទស្សនានូវសមិទ្ធផលផ្សេងៗក្នុងវត្តដែលកំពុងមានការអភិវឌ្ឍរីកចម្រើនគួរឱ្យកត់សម្គាល់ ។

ព្រះសច្ចានុបាល នឿម វុទ្ឋី បានមានសង្ឃដីកាបញ្ជាក់ ថាបាការរៀបចំពិធីប្រណាំងទូក(ត្រី)លក្ខណៈប្រពៃ ណីក្នុងឆ្នាំនេះមានរយៈពេលពីរថ្ងៃគឺនៅថ្ងៃទី០៥និង ទី០៦ខែវិច្ឆិកាឆ្នាំ២០២២ដោយមានទូកចូលរួមចំនួន ១៣ គូរ ដោយក្នុងទូកនីមួយៗមានចំណុះ៦នាក់ លទ្ឋផលនៅវគ្គផ្តាច់ព្រ័ត្តយកចំណាត់ទូកលេខ១ ដល់ លេខ៣នឹងទទួលបានថវិកាឧបត្ថម្ភប្រមាណជាជាង ១លានរៀល និងពាន១ ចំណែកទូកដែលមិនជាប់ចំណាត់ថ្នាក់ក៏ទទួលបានថវិកាលើកទឹកចិត្តផងដែរ។

ក្នុងនោះដែរ ព្រះវិជ័យរង្សី បណ្ឌិត ឡាច លាង ព្រះរាជាគណៈថ្នាក់កិត្តិយស ព្រះគ្រូប្រាសាទរង្សី អនុគណក្រុងសៀមរាប ព្រះធម្មធរគណខេត្ត បានមានសង្ឃដីកាថាការរៀបចំឱ្យមានពិធីប្រណាំងទូកជាមួយនឹងអង្គកឋិនទាន ថាជាការលើកតម្កើងវប្បធម៌ជាតិ តាមរយៈព្រះពុទ្ធសាសនា ព្រោះថា ព្រះពុទ្ធសាសនាបានដើរតួនាទីយ៉ាងសំខាន់និងមានគុណតម្លៃមិនអាចកាត់បានចំពោះ សង្គមខ្មែរស្ទើរគ្រប់វិស័យ ដូចជាវិស័យសុខាភិបាល វិស័យសង្គមកិច្ច វប្បធម៌ នយោបាយ អប់រំ ជាដើមផងដែរ ។

លោកឧត្តមសេនីយ៍ទោ តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប មានប្រសាសន៍ ថា ក្រោមការដឹកនាំផ្ទាល់របស់ថ្នាក់ដឹកនាំដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីដ៏ឆ្នើម សុខសន្តិភាព និងការអភិវឌ្ឍប្រទេសជាតិត្រូវបានធានាក្រោមស្មារតីនៃរដ្ឋធម្មនុញ្ញ ព្រះរាជាណាចក្រកម្ពុជា ហើយបានប្រែក្លាយប្រទេសជាតិពីការយកជីវិតជាដើមទុន មកជានីតិរដ្ឋ ការគោរពសិទ្ធិមនុស្ស លទ្ធិប្រជាធិបតេយ្យ និងការអភិវឌ្ឍប្រកបដោយចីរភាព តាមកម្មវិធីនយោបាយ និងយុទ្ធសាស្ត្រចតុកោណគ្រប់ដំណាក់កាល។

លោកស្នងការខេត្តបញ្ជាក់ថា៖វត្តអារាម ព្រះពុទ្ធសាសនាបានរួមចំណែកស្ទើរគ្រប់វិស័យ ក្នុងការកសាងអភិវឌ្ឍសង្គមកម្ពុជាយើង តាំងពីអតីត រៀងរហូតដល់បច្ចុប្បន្ន ហើយក៏បន្តទៅអនាគតផងដែរ។ព្រះពុទ្ធសាសនានិងវត្តអារាមជាចំណុចកណ្ដាលនៃធ្លុងសាមគ្គីភាពជាតិ និងប្រជាធិបតេយ្យ ពោលគឺគ្មានកន្លែងណាដែល នាំឱ្យប្រជាជនខ្មែរទៅរកសាមគ្គីភាព និងប្រជាធិបតេយ្យបានល្អប្រសើរដូចទីវត្តអារាមឡើយ។ ប្រជាពលរដ្ឋទាំងអស់ បើទោះជាមាននិន្នាការខុសគ្នាខ្លះយ៉ាងណាក៏ដោយ ក៏អាចរួបរួមសាមគ្គីគ្នា ធ្វើការរួមគ្នា ធ្វើបុណ្យរួមគ្នានៅក្នុងទីវត្ត អារាមដោយក្តីសោមនស្សជាភារតភាព បានដែរ ៕

ដោយ ÷ ពន្លឺ