ខេត្តសៀមរាប ÷ នៅព្រឹកថ្ងៃទី ០៣ ខែ វិច្ឆិកា ឆ្នាំ ២០២២នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានដឹកនាំកិច្ចប្រជុំ សាមញ្ញលើកទី៤២ ក្នុងឆ្នាំ ទី៤ នៃអាណត្តិទី៣ របស់ក្រុមប្រឹក្សាខេត្តសៀមរាបដោយមានការចូលរួមពីសំណាក់ឯកឧត្តម លោកជំទាវជាសមាជិក សមាជិកានៃក្រុមប្រឹក្សាខេត្ត ព្រមទាំងវត្តមានចូលរួមរបស់ឯកឧត្តម ទៀ សីហា អភិបាលនៃគណៈអភិបាលខេត្ត និង អស់លោកលោកស្រី ជាគណៈអភិបាលខេត្ត អាជ្ញាធរជាតិអប្សរា ថ្នាក់ដឹកនាំមន្ទីរ អង្គភាព និង អាជ្ញាធរក្រុង ស្រុក និង នាយកទីចាត់ការ អង្គភាពចំណុះសាលាខេត្តផងដែរ ។ ឆ្លងទៅតាមរបៀបវារៈដែលបានលើកឡើងចំនួន ៧របៀបវារះនៃកិច្ចប្រជុំសាមញ្ញលើកទី៤២របស់ក្រុមប្រឹក្សាខេត្ត ដែលបានគ្រោងទុកនោះ លើការសុំច្បាប់របស់សមាជិកក្រុមប្រឹក្សាខេត្ត , សេចក្តីព្រាងកំណត់ហេតុកិច្ចប្រជុំសាមញ្ញលើកទី៤១ , សេចក្តីព្រាងប្រជុំវិសាមញ្ញ ,សេចក្តីព្រាងរបាយការណ៍ប្រចាំខែ តុលា ,ការបង្កើតគណៈកម្មការដឹងនាំ វេទិកា ផ្សព្វផ្សាយ និង ពិគ្រោះយោបល់របស់ក្រុមប្រឹក្សាខេត្តឆ្នាំ២០២២ ,សេចក្តីព្រាងសម្រេចពីការទទួលស្គាល់ប្រធាន អនុប្រធាន សមាជិកគណៈកម្មាធិការពិគ្រោះយោបល់កិច្ចការស្រី្តនិងកុមារ និង បញ្ហាផ្សេងៗ ។ ក្នុងនោះសមាជិកនៃ ក្រុមប្រឹក្សាខេត្ត បានធ្វើការពិនិត្យ ពិភាក្សា ព្រមទាំងបានលើកនូវចំណុចមួយចំនួន ពាក់ព័ន្ធលើ ការកែតម្រូវខ្លឹមសារ តួលេខនៅក្នុងរបាយការណ៍ប្រចាំខែតុលា , បញ្ហាចរាចរណ៍ ជូនដល់សិស្សគ្រប់គ្រឹះស្ថានសិក្សា និងប្រជាពលរដ្ឋ ,ការយឺតយ៉ាវក្នុងការផ្តល់ប័ណ្ណកម្មសិទ្ធិដីធ្លីជូនប្រជាពលរដ្ឋ និង ករណីអ្នកសុំទាននៅរមណីយដ្ឋានភ្នំគូលែន ។
មានប្រសាសន៍នោះដែរ ឯកឧត្តម ទៀ សីហា ក៏បានឯកភាពទៅលើចំណុចដែលសមាជិកសមាជិកាបានលើក ឡើងក្នុងកិច្ចប្រជុំ ព្រមទាំងបានធ្វើការបកស្រាយបំភ្លឺ នូវរាល់ចម្ងល់ទាំងឡាយដែលកិច្ចប្រជុំលើកឡើងនោះ ។ ក្នុងនោះដែរឯកឧត្តមក៏បាន ធ្វើការជម្រុញដល់មន្ទីរជំនាញពាក់ព័ន្ធ និងសាលាក្រុង ត្រូវធ្វើការត្រួតពិនិត្យនូវរាល់បញ្ហាពាក់ព័ន្ធទៅនឹងផ្លូវ៣៨ ខ្សែ ទាំងសោភណ្ឌភាពក្នុងក្រុង ភ្លើងបំភ្លឺដងផ្លូវ ដើមី្បទទួលស្វាគមន៍ ដល់ភ្ញៀវទេសចរណ៍ ។ កត្តាសំខាន់នោះដែរឯកឧត្តម ក៏បានសង្កត់ធ្ងន់ទៅលើការងារ សណ្តាប់ធ្នាប់សាធារណៈ អនាម័យ បរិស្ថាន និង បានជម្រុញដល់មន្ទីរអប់រំ ក៏ដូចបណ្តាក្រុង ស្រុក ធ្វើការផ្សព្វផ្សាយដល់សាលារៀន អំពីច្បាប់ចរាចរណ៍ សំខាន់សមត្ថកិច្ចក្នុងការរឹតបណ្តឹងលើការអនុវត្ត នូវច្បាប់ចរាចរណ៍ ទាំងការអប់រំ និង ផាកពិន័យ និង ជម្រុញឲ្យមន្ទីរជំនាញនិងអាជ្ញាធរក្រុង ស្រុកពាក់ព័ន្ធ ធ្វើការស្រងនូវអត្តសញ្ញាណអ្នកសុំទាន និង បំបាត់ឲ្យអស់ចេញពីតំបន់រមណីយដ្ឋានទេសចរណ៍ ។
ម៉្យាងទៀតឯកឧត្តមអភិបាលខេត្តក៏បានឲ្យគ្រប់អាជ្ញាធរមូលដ្ឋានក្រុង ស្រុក បន្តធ្វើការផ្សព្វផ្សាយជាសាធារណៈ និង តាមសាលារៀន ឲ្យបានយល់ច្បាស់អំពីច្បាប់ចរាចរណ៍ដល់សិស្ស ពីព្រោះថា ជម្ងឺគ្រោះថ្នាក់ចរាចរណ៍គ្មានថ្នាំព្យាបាលឡើយ មានតែការ បាត់បង់ជីវិត និង ពិការអស់មួយជីវិតប៉ុណ្ណោះ ។
ក្នុងកិច្ចប្រជុំនោះដែរឯកឧត្តម អ៊ាន ឃុន ប្រធានក្រុមប្រឹក្សាខេត្ត ក៏បានលើកឡើងផងដែរ អំពីព្រឹត្តិការណ៍សំខាន់ៗក្នុងខេត្ត និងបាន បន្តឲ្យរដ្ឋបាលក្រុង-ស្រុកទាំង៦ ជាប់បឹងទន្លេសាប អនុវត្ត និង ពន្លឿនកិច្ចការងារដោះស្រាយ វាស់វែងដីជុំវិញបឹងទន្លេសាបនិងកាត់ឆ្វៀលពីតំបន់៣ មកជាតំបន់២ និងមកជាតំបន់១ ជូនបងប្អូនប្រជាពលរដ្ឋ , សម្របសម្រួលដល់បងប្អូនប្រជាពលរដ្ឋរស់នៅក្នុងសង្កាត់គោកចក និងសង្កាត់ស្លក្រាម ដើម្បីផ្លាស់ប្តូរទីលំនៅទៅរស់នៅតំបន់អភិវឌ្ឍន៍ធម្មជាតិរុនតាឯក និងពាក់ស្នែង និង រៀបចំ សម្របសម្រួលជូនដល់ប្រជាពលរដ្ឋចំនួនប្រហែល ២៥៥គ្រួសារ ដែលទទួលរងផលប៉ះពាល់ក្នុងអំឡុងពេលស្ថាបនាផ្លូវ ៣៨ខ្សែ ទៅរស់នៅតំបន់អភិវឌ្ឍន៍ធម្មជាតិរុនតាឯក , ព្រមទាំងសូមឲ្យមន្ទីរ-អង្គភាពពាក់ព័ន្ធ រដ្ឋបាលក្រុង-ស្រុក កងកម្លាំងប្រដាប់អាវុធទាំង៣ ត្រូវពង្រឹងគោលនយោបាយភូមិឃុំមានសុវត្ថិភាព ជាពិសេសការពារទប់ស្កាត់ និងបង្ក្រាបករណីគ្រឿងញៀន និងក្មេងទំនើង ព្រមទាំងអប់រំផ្សព្វផ្សាយច្បាប់ចរាចរណ៍ផ្លូវគោកឲ្យបានខ្ជាប់ខ្ជួន ដើម្បីកាត់បន្ថយគ្រោះថ្នាក់ចរាចរណ៍ក្នុងខេត្តសៀមរាប ជាពិសេសក្នុងក្រុងសៀមរាបដែលទើបស្ថាបនាហេដ្ឋារចនាសម្ព័ន្ធសាងសង់ផ្លូវ ៣៨ខ្សែ ហើយពេលខាងមុខ រដ្ឋបាលខេត្តនឹងចាប់ផ្តើមអនុវត្តសាងសង់ ៦ខ្សែ បន្តទៀត ។
ដោយក្នុងខេត្តសៀមរាបនាពេលនេះ កំពុងទទួលបាននូវកំណើនភ្ញៀវទេសចរណ៍ជាបន្តបន្ទាប់។ កន្លងមកនេះ កងកម្លាំងនគរបាលខេត្តបានការពារសន្តិសុខ សណ្តាប់ធ្នាប់ជូនដល់គណៈប្រតិភូ ដែលបានអញ្ជើញ មកចូលរួមប្រជុំក្នុងខេត្តសៀមរាបបានល្អប្រសើរ និងសូមឱ្យបន្តកិច្ចការងារនេះបន្តទៀត ព្រោះថានាពេលខាងមុខនេះ នឹងមានកិច្ចប្រជុំថ្នាក់ជាតិ និងអន្តរជាតិជាបន្តបន្ទាប់ ដូចនេះ កិច្ចការពារសន្តិសុខសណ្តាប់ ធ្នាប់ គឺជាកិច្ចការងារដែលបញ្ជាក់ដល់អន្តរជាតិពីសុខសុវត្ថិភាពក្នុងខេត្តសៀមរាប និងជាកត្តាមួយក្នុងការទាក់ទាញភ្ញៀវទេសចរអន្តរជាតិមកទស្សនាខេត្តសៀមរាបបន្ថែមទៀត ៕
ដោយ ÷ ពន្លឺ
