ខេត្តសៀមរាប ÷ ទោះបីបច្ចុប្បន្នការយល់ដឹងពីបញ្ហាសំរាមរបស់ប្រជាពលរដ្ឋ ក៏ដូចជាភ្ញៀវទេសចរមានភាពល្អប្រសើរក៏ពិតមែន តែក៏នៅមានករណីមួយចំនួនតូច មិនទាន់ល្អនៅឡើយ ដែលទាមទារឱ្យមានការចូលរួមជាចាំបាច់ ដើម្បីគ្រប់គ្រងសំរាម ក៏ដូចជាបញ្ហាបរិស្ថាននៅតំបន់ប្រាសាទនៃរមណីយដ្ឋានអង្គរ។
អ្នកស្រី កុ ចត់ ភ្នាក់ងារសម្អាតបរិស្ថាននៅមុខប្រាសាទអង្គរវត្តបានលើកឡើងថា សំរាមដែលមានច្រើនសព្វថ្ងៃនេះគឺស្លឹកឈើដែលទាមទារឱ្យបោស សម្អាតជាប្រចាំថ្ងៃ។ ក្រៅពីសំរាមប្រភេទនេះ ក៏មានសំរាមប្លាស្ទិក និងស្បោងមួយចំនួនតូច ដែលភ្ញៀវទុកដាក់មិនបានល្អនៅតាមធុងសំរាមដែរ ដោយអ្នកស្រីស្នើឱ្យភ្ញៀវទេសចរដែលមកលេងរមណីយដ្ឋានអង្គរសូមទុកដាក់សំរាមប្លាស្ទិកនៅកន្លែងអោយបានល្អផង និងសូមសហការចូលរួមដើម្បីបរិស្ថានស្អាតទាំងអស់គ្នា ។ សំរាមប្លាស្ទិកភាគច្រើនមានចានស្នោ និងបំពង់បឺត ដែលមានចោលតាមដងផ្លូវ និងក្រៅធុងសំរាម ហើយពេលខ្លះត្រូវឆ្កែហែកពេញសួនច្បារ ក៏មានផងដែរ។
ភ្នាក់ងារសម្អាតបរិស្ថានក៏បានមានប្រសាសន៍ ទទូច សុំឱ្យភ្ញៀវទេសចរដែលមកដើរកម្សាន្តក្នុងតំបន់ប្រាសាទនៃរមណីយដ្ឋានអង្គរ គួរមានឥរិយាបថល្អ ចូលរួមថែរក្សាបរិស្ថានទាំងអស់គ្នា ដើម្បីជាចំណែកទាក់ទាញទេសចរកាន់តែច្រើនបន្ថែមទៀត មកលេងខេត្តសៀមរាប។ យ៉ាងណាម៉ិញ ភ្នាក់ងារទេសចរណ៍ក៏សង្កេតពីឥរិយាបថដ៏ល្អរបស់ភ្ញៀវទេសចរភាគច្រើន ដែលបានចូលរួមសហការទុកដាក់សំរាមបានត្រឹមត្រូវ និងមានការចូលរួមពីអ្នកលក់ផងដែរ ដែលតែងវេចខ្ចប់បានល្អក្រោយទទួលទានរួច។
បច្ចុប្បន្នមិនមានការលក់ដូរតាមវាលស្មៅទៀតទេ គឺច្រើននៅតាមរោងអង្គុយហូបអាហារ ដែលប្រការនេះធ្វើឱ្យការគ្រប់គ្រងសំរាមនៅតាមប្រាសាទកាន់តែប្រសើរឡើងផងដែរ៕
ដោយ ÷ ពន្លឺ
