ថ្នាក់ដឹកនាំសភាពាណិជ្ជកម្មសៀមរាប-ឧត្តរមានជ័យជួបសំណេះសំណាល និងពិភាក្សាការងារជាមួយឯកអគ្គរដ្ឋទូតអ៊ីស្រាអែលប្រចាំកម្ពុជា

ខេត្តសៀមរាប ÷ កាលពីរសៀលថ្ងៃទី ០១ ខែ វិច្ឆិកា ឆ្នាំ២០២២នេះ ឧកញ៉ា បណ្ឌិត ហ៊ុយ ភៀវ ប្រធានសភាពាណិជ្ជកម្មខេត្តសៀមរាប-ឧត្តរមានជ័យ បានអញ្ជើញទទួលជួបសម្តែងការគួរសម និងពិភាក្សាការងារ ជាមួយលោកស្រី Orna Sagiv ឯកអគ្គរដ្ឋទូតអ៊ីស្រាអែលប្រចាំកម្ពុជា នៅសាលប្រជុំសភា ពាណិជ្ជកម្មមណ្ឌលខេត្តសៀមរាប-ឧត្ដរមាន ជ័យ។

ឧកញ៉ាបណ្ឌិត ហ៊ុយ ភៀវ ក៏បានសម្តែងនូវការសប្បាយរីករាយដែល បានទទួលជួបជាលើកដំបូងជាមួយលោកជំទាវអគ្គរដ្ឋទូតអ៊ីស្រាអែលប្រចាំកម្ពុជា ដែលប្រទេសអ៊ីស្រាអែលគឺជាប្រទេសមួយល្បីល្បាញពិសេសការអភិវឌ្ឍន៍វិស័យកសិកម្មមានភាពទំនើប ជឿនលឿន។

ក្នុងឱកាសនោះដែរ ឧកញ៉ាបណ្ឌិត ហ៊ុយ ភៀវ ក៏បានជម្រាបជូន លោកជំទាវឯកអគ្គរដ្ឋទូត និងប្រតិភូអមដំណើរ អំពីស្ថានភាពទូទៅនៃខេត្តសៀមរាប អំពីការ យកចិត្តទុកដាក់លើការអភិវឌ្ឍន៍ខេត្តសៀមរាប ពីប្រមុខរាជរដ្ឋាភិបាលកម្ពុជា និងរដ្ឋបាលខេត្តសៀម រាប លើហេដ្ឋារចនាសម្ព័ន្ធ និងសេដ្ឋកិច្ចឱ្យមានភាពកាន់តែប្រសើរឡើងវិញ បន្ទាប់ពីទទួលរងនូវផលប៉ះពាល់ពីបញ្ហាកូវីដ១៩កន្លងមក។ ដោយសារប្រទេស អ៊ីស្រាអែលគឺជាប្រទេស ដែលមានការអភិវឌ្ឍន៍ ជឿនលឿនខាងវិស័យ កសិកម្ម ឧកញ៉ាបណ្ឌិត ក៍បានមានប្រសាសន៍ សំណូមពរ ដល់លោកជំទាវឯកអគ្គរដ្ឋទូតព្រមទាំងប្រតិភូអមដំណើរ សូមជួយផ្សព្វផ្សាយពីសក្តានុពលនិងឱកាសវិនិយោគនៅក្នុងខេត្តសៀម រាបដល់អ្នកវិនិយោគរបស់អ៊ីស្រាអែល។ ហើយម្យ៉ាងវិញទៀត ដោយសារការធ្វើកសិកម្មរបស់ប្រជាកសិករនៅក្នុងខេត្តសៀមរាប ភាគច្រើន ជាកសិកម្មបែបគ្រួសារ ខ្វះបច្ចេកទេសផ្សេងៗជាច្រើនផងដែរ ។

ឧកញ៉ាបណ្ឌិត ហ៊ុយ ភៀវ ក៏បានសំនូមពរបន្ថែមដល់ លោកជំទាវឯកអគ្គរដ្ឋទូត សូម ជួយធ្វើការផ្តល់ការបណ្តុះបណ្តាល ជំនាញបច្ចេកទេសកសិកម្មដល់ប្រជាកសិករក្នុងខេត្តសៀមរាប ហើយប្រសិនបើមានអ្នកវិនិយោគរបស់ប្រទេសអ៊ីស្រាអែល មកធ្វើការវិនិយោគដោយបង្កើតជារោងចក្រ ក្រុមហ៊ុនផ្សេងៗសម្រាប់នំាចេញកាន់តែប្រសើរថែមទៀតផងដែរ។

ជាការឆ្លើយតបនៅក្នុងឱកាស នោះដែរ លោកជំទាវអគ្គរដ្ឋទូតអ៊ីស្រាអែលមានការសប្បាយចិត្ត និងបានទទួលយកនូវសំណើរខាងលើព្រមទាំងសហការបន្តទំនាក់ទំនងបន្ថែមទៀត រួមទាំងមានជំនួបសំណេះសំណាលប្រជ៉ំពិភាក្សាការងារនៅដើមឆ្នាំក្រោយទៀតជាមួយសភាពាណិជ្ជកម្មអ៊ីស្រាអែល សភា ពាណិជ្ជកម្មកម្ពុជា និងសភាពាណិជ្ជកម្មមណ្ឌលខេត្តសៀមរាប-ឧត្ដរមានជ័យឬអាចនឹងមានអញ្ជើញដំណើរទស្សនកិច្ចទៅកាន់ប្រទេសអ៊ីស្រាអែលផងដែរ៕

ដោយ ÷ ពន្លឺ