កំពង់ឆ្នាំង ៖ ប្រភពពីមន្ត្រីនិងភ្នាក់ងារគយក្នុងខេត្តកំពង់ឆ្នាំង មួយចំនួនបានបង្ហើបឲ្យដឹងថា ឈ្មួញមួយចំនួនដែលដឹកជញ្ជូនទំនិញគេចពន្ធ ទំនិញបង់ពន្ធមិនគ្រប់ពីច្រកព្រំដែនក្នុងខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ឆ្លងកាត់ផ្លូវជាតិលេខ៥ ខេត្តកំពង់ឆ្នាំង គឺត្រូវលោក ហ៊ាល ទូច ប្រើអំណាចគាបយកលុយតាមអំពើចិត្ត។ សូម្បីតែឈ្មួញដែលដឹកជញ្ជូនទំនិញបង់ពន្ធគយត្រឹមត្រូវនៅច្រកព្រំដែនក៏ត្រូវលោក ហ៊ាល ទូច មេគយ ខេត្តកំពង់ឆ្នាំង ព្រមទាំងបក្ខពួករាប់ក្បាលរថយន្តគាបយកលុយលើតុក្រោមតុតាមអំពើចិត្តផងដែរ ។
ប្រភពដែលស្និទ្ធនិងលោក ហ៊ាល ទូច បានឲ្យដឹងថា មួយរយៈកន្លងទៅនេះលោក ហ៊ាល ទូច និងបក្ខពួកកំពុងសប្បាយប្រមូលលុយពីក្រុមឈ្មួញដឹកជញ្ជូនទំនិញគេច ពន្ធទំនិញបង់ពន្ធមិនគ្រប់ និងទំនិញខុសច្បាប់យ៉ាងសុខស្រួល ហើយមិនខ្វល់ពីមតិរិះគន់អ្វីទាំងអស់។ ឈ្មួញមួយចំនួនដែលបង្កប់ទំនិញគេចពន្ធតាមរថយន្តក្រុងដឹកជញ្ជូនអ្នកដំណើររបស់ក្រុមហ៊ុនមួយចំនួនត្រូវបង់លុយតាមការកំណត់របស់លោក ហ៊ាល ទូច ទើបអាចចៀសផុតពីការបង្ក្រាប ហើយបើឈ្មួញណាហ៊ានគេចវេះត្រូវប្រឈមនឹងការបង្ក្រាបជាមិនខាន។
ក្រុមឈ្មួញតូចតាចដែលរកស៊ីដឹកជញ្ជូនផ្លែឈើ និងទំនិញផ្សេងៗតាមរថយន្តសាំយ៉ុង រថយន្តកូរ៉េ បានឲ្យដឹងថា សម្រាប់ផ្លែឈើ និងទំនិញក្នុងមួយរថយន្តត្រូវលោក ហ៊ាល ទូច គាបយកលុយពី៨ម៉ឺនរៀលទៅ១០ម៉ឺនរៀលដោយគ្មានបង្កាន់ដៃឬវិក្កយបត្រត្រឹមត្រូវឡើយ។ ក្នុងមួយថ្ងៃៗមានរថយន្តសាំយ៉ុង រថយន្តកូរ៉េ ដឹកជញ្ជូនផ្លែឈើនិងទំនិញផ្សេងៗឆ្លងកាត់ផ្លូវជាតិលេខ៥ ខេត្តកំពង់ឆ្នាំង រាប់រយគ្រឿងដូច្នេះលោក ហ៊ាល ទូច ប្រធានសាខាគយខេត្តកំពង់ឆ្នាំង ប្រមូលលុយបានយ៉ាងច្រើនសន្ធឹកសន្ធាប់ ដែលជាហេតុធ្វេីអោយបាត់បង់ចំណូលរដ្ធក្នុងមួយឆ្នាំៗរាប់សិបមុឺនដុល្លារដោយសារលោកប្រធានសាខាមួយនេះ។
គួរណាស់លោកគុណ ញឺមមេត្តាប្រមោលមេីលលោកទូច ហ៊ាល ផងទាន។ ប្រភពពីមន្ត្រីនិងភ្នាក់ងារគយក្នុងខេត្តកំពង់ឆ្នាំង មួយចំនួនបានឲ្យដឹងថា សម្រាប់ឈ្មួញធំៗដែលដឹកជញ្ជូនទំនិញគេចពន្ធឆ្លងកាត់ផ្លូវជាតិលេខ៥ ខេត្តកំពង់ឆ្នាំង សុទ្ធតែមានទំនាក់ទំនងជិតស្និទ្ធជាមួយលោក ហ៊ាល ទូច ទើបអាចដឹកជញ្ជូនទំនិញទៅដល់គោលដៅប្រកបដោយសុវត្ថិភាពបាន ។
ដោយឡែកលោកហ៊ាលទូចមិនអាចសុំការបំភ្លឺបានឡេីយដោយទូរសព្ឌ័គ្មានអ្នកទទួល៕
ដោយ៖ ប៊ុនថន
