ខេត្តសៀមរាប ÷ មន្រ្តីជំនាញផលិតកម្មនិងបសុព្យាបាលខេត្តសៀមរាប បន្តធ្វើការចុះចាក់វ៉ាក់សាំងការពារជំងឺអុតក្តាមដល់សត្វពាហនៈនៅស្រុកជីក្រែង នៅព្រឹកថ្ងៃទី២៦ខែតុលាឆ្នាំ២០២២ នេះ។
លោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បាន ឱ្យដឹងថា មន្ត្រីជំនាញសហការជាមួយអាជ្ញាធរមូលដ្ឋាន និងភ្នាក់ងារសុខភាពសត្វភូមិ បានចុះប្រតិបត្តិការចាក់ថ្នាំការពារជំងឺអុតក្តាមគោ ក្របី ក្រោយជួបគ្រោះទឹកជំនន់ នៅភូមិបាក់អង្រុត ឃុំគោកធ្លកក្រោម ស្រុកជីក្រែង ខេត្តសៀមរាប ដោយបានធ្វើការចាក់វ៉ាក់សាំង គោ ក្របី បានចំនួន ៤៥២ ក្បាល និងចែកថ្នាំព្យាបាល វីតាមីន ថ្នាំខៀវ និងទឹកថ្នាំសម្លាប់មេរោគ ដល់ភ្នាក់ងារសុខភាពសត្វភូមិសម្រាប់ចុះអន្តរាគមន៏ព្យាបាលជំងឺដល់សត្វពាហនៈជូនប្រជាពលរដ្ឋទាន់ពេលវេលាផងដែរ។
លោកព្រំ វិច ក៏បានបញ្ជាក់ថា ការចាក់ថ្នាំវ៉ាក់សាំងដល់សត្វពានៈ ជាវិធានការណ៍ល្អប្រសើរ ដើម្បីការ ពារទុកជាមុនកុំឱ្យកើតជំងឺផ្សេងៗ ជាពិសេសនៅរដូវរំហើយនេះភាគច្រើន គោ ក្របី ច្រើនកើតជំងឺអុតក្តាម ដោយសារក្រោយពីទឹកជំនន់ក្រោលសម្រាប់សត្វដេកនោះបែកភក់ខ្វះអនាម័យ ចំណីអាហាររបស់វា ដូចជាស្មៅជាដើម វាពពេញទៅដោយក្លិនស្អុយ មានជាប់ ភក់ ពេលគោ ក្របី ស៊ីទៅធ្វើឱ្យសុខភាពចុះខ្សោយ ងាយធ្វើឱ្យកើតជំងឺអុតក្តាមនេះ។ ហើយចំពោះវ៉ាក់សាំងនេះគ្រាន់តែជាផ្នែកមួយជួយការពារពីជំងឺរបស់សត្វតែប៉ុណ្ណោះ តែបើចង់ឱ្យសត្វពាហនៈមានសុខភាពល្អ គឺផ្តល់ស្មៅ ឬចំណី និងទឹកឱ្យបានគ្រប់គ្រាន់ រួមផ្សំជាមួយការសំអាតអនាម័យក្រោលជាប្រចាំផង ទើបសត្វលូតលាស់និងមានសុខភាពល្អ។ យោងតាមរបាយការណ៍របស់ការិយាល័យផលិតកម្ម និងបសុព្យាបាល ក្នុងរយៈពេល១០ខែឆ្នាំ២០២២ពុំមានជំងឺឆ្លងសត្វផ្ទុះឡើងគួរឱ្យកត់សម្គាល់អ្វីឡើយ ទន្ទឹមនឹងនេះ ការិយាល័យផលិតកម្ម និងបសុព្យាបាល បានចាក់ថ្នាំការពារជំងឺសារទឹក អុតក្តាម ដុំពក ដល់គោក្របីបានចំនួន៥.៥៣៦៩ក្បាល និងចាក់ថ្នាំជាច្រើនប្រភេទដល់សត្វជ្រូកបានជិត២ម៉ឺន៥ពាន់ក្បាល ព្រមទាំងបានចាក់ការពារទៅលើបក្សី មាន់ទាបានជាង ១លាន៥សែនក្បាលផងដែរ។
នៅក្នុងឆ្នាំ២០២២នេះ មន្ទីរកសិកម្មខេត្តសៀមរាបទទួលបានថ្នាំការពារពីអគ្គនាយកដ្ឋានសុខភាពសត្វនិងផលិតកម្មសត្វដូចជា ៖សារទឹកគោក្របី៥ម៉ឺនកម្រិត បុសខ្យល់៨ពាន់កម្រិត អុតក្តាម៣ពាន់កម្រិត បសុឱសថនិងសម្ភារៈបរិក្ខាមួយចំនួនទៀតផងដែរ៕
ដោយ ÷ ពន្លឺ
